Chi̍t nn̄g-kang-á hiông-hiông hoat-kiàn chi̍t hāng put-chí giâm-tiōng ê tāi-chì, Tâi-oân Iûⁿ Ún-giân ê bāng-tsām kui-nn̂g-ê khì hō· Tiong-kiōng tsa̍h-tsa̍h- -khì! Tiong-kiōng chin-chiàⁿ chhut-chhiú- -à, chin-chiàⁿ tùi Tâi-oân ê hiuⁿ-thó· bô-gí hoah “m̄-thang”- -ā….
Iûⁿ Ún-giân sian-siⁿ ê bāng-tsām sī tsoan-tô· teh tsò Chiang-tsoân-gí- -ê, bāng-tsām lōe-iông chin phông-phài, thang kóng sī hiān-tsú-sî bāng-lō· Chiang-tsoân-gí ê tōa-pún-iâⁿ. Tang-tiong, siōng-kài si̍t-iōng ê mi̍h-kiāⁿ sī sòaⁿ-téng Tâi-Hôa sû-tián kah jī-tián.
Má Eng-kiú tih-beh chiūⁿ-tāi, Tiong-kiōng kám kóng beh tī chit-khoán lâu-pái lâi tùi Tâi-oân lâng ê hiuⁿ-thó· bó-gí tāng-chhiú, kā chit-ê beh sí m̄-chiâⁿ sí ê gí-giân tsò-chi̍t-ē tsām-chháu tî-kin, hō· i tiàm chit-ê sè-kan bia̍t-bô- -khì?
Góa khoàⁿ bōe-hiáu- -tit, chin-chiàⁿ khoàⁿ bōe-hiáu- -tit. Ah m̄-koh, hoān-tú-sè Tiong-kiōng bô chiah pháiⁿ sim-hēng- -là, bô-tek-khak i sī kan-na siūⁿ-beh kā “Tâi-to̍k” lia̍h- -khì-lāi koah-bah niâ.
Tsóng- -sī, m̄-koán án-tsoáⁿ, che khak-khak sī pi-ai ê tāi-chì. Bîn-tsú, tsū-iû, tàu-tí tī tá-ūi? Nah-ē iáu-koh un tòa-leh thô·-kha-tau, chhut-tsāi lâng thún-ta̍h tsau-that? To̍k-chhâi, ui-koân, nah-ē iáu-koh chiah-ni̍h-á hiau-pai, chiah-ni̍h-á chhàng-chhiu?
Tagged: 母語運途
：歡迎加入《有緣來做夥》QQ陣（陣號：81229762）
選前佮朋友開講，我就笑講，後擺，台語網站佮部落格、連我的花埕，有可能會去予人禁去。想袂到，阿共仔跤手赫緊~~
這兩工想欲寫一篇「徙舖」──咧欲老去的語言，好通徙去正廳矣，囝孫仔有有孝無，有喔…
喔，真少看電視的我，今仔日第一擺看著Fedex廣告的”中國方言篇”，佇這幾工的情境之下，毋知該哭也該笑。
Fedex廣告的“中國方言篇”（ http://hk.video.yahoo.com/video/video.html?id=482184&pt=v），我拄拄ùi網頂chhiau來看完，毋知即支廣告是毋是香港做的（我無kài瞭解）。毋知按怎，這佫予我想著香港儂、廣東儂的自主性，文化語言高度自主。即支廣告本身的主題，hoān-sè乾凋是咧強調服務周致，無牽涉著其它的議題。Ah毋佫，soah予儂感覺香港（廣東）儂對待多元語言文化是欣賞佮包容的態度。反倒轉，佫予我想著另外一个佮這完全倒反的立場，著是A-kiōng- -á自早到taⁿ一貫的語言立場。講實的，我感覺真正咧“去中國化”的儂，毋niā阿扁仔，連A-kiōng- -á嘛應該算在內。阿扁仔he正經是咧“去北化”，毋是號做“去中國化”，卜做到全全去中國化，阿扁仔猶無法度，嘛無即个才調。Ah若A-kiōng- -á，拄仔好佮阿扁仔相親像，不而過，A-kiōng- -á是“去南化”，正港是“去南尊北”，手段比阿扁仔加真高明，哄喝騙（hàng-hoah-phiàn），逐招逐步攏嘛使kah到角到角，用術的，用諞（pián）的，用硬的，kā南中國的百姓攏總改造成“北頂儂”。
我毋知影馬先上台了後，會學A-kiōng- -á的步數bē。不而過，我真正驚驚。我毋是替台灣儂咧驚，我是替漳泉話咧驚。
廣告我是佇台灣的電視台看著的，普通話發音，佇網路攏干旦揣著廣東話發音的。
Kiàn-hui hiaⁿ,
Soán-kí liáu-āu, goá kan-taⁿ ū 1 chióng kám-kak: kiaⁿ-kiaⁿ.
Che kiám-chhái sī in-ūi gún ū tha̍k Tâi-oân le̍k-sú ê koan-hē, chai-iáⁿ Kok-bîn-tóng ê chân-jím kap siáu-tham. M̄-koh bô-hoat-tō͘, soán-kí ê kiat-kó í-keng sī án-ne, bô khó-lêng khì chhiâu-chhek–a.
Tâi-oân ê bó-gí chèng-chhek eng-kai ē kui-ê ta̍h tóng-á, bī-lâi chit kúi tang, goá m̄-káⁿ kóng ē thè-pō͘ (hi-bāng bē), m̄-koh beh chìn-pō͘ sī bián siūⁿ–a, lán ê bó-gí ê khùi bô hó, kan-taⁿ ē-tàng ǹg-bāng thiⁿ-kong-peh–a ba̍k-chiu peh kim bóng chàn-chhiú–a.
Taokara hiaⁿ: Lán khoàⁿ-hoat beh oá beh oá. 😆
Lîm hiaⁿ,
Kū-nî hit 300 jī liáu-āu, kah taⁿ iáu bô sin ê hoat-tián, goá chai-iáⁿ sī ū 1 phoe jī leh sím (iok-kî-lio̍k 600-1000 jī), goân-té mā thiaⁿ-kóng ha̍k-chiá thó-lūn kah chha-put-to–a, tō teh beh kong-pò͘–a, āu–lāi m̄ chai siáⁿ-mih goân-in koh tak-khê.
Goá ê khoàⁿ-hoat sī: taⁿ Bîn-chìn-tóng chèng-hú sī “khàn-siú chèng-hú”, tán 5–goe̍h 20 kau-poâⁿ niā-tiāⁿ, hoān-sè bē koh chò siáⁿ-mih tiōng-iàu ê khang-khoè, hit tē-2 phoe ê jī beh kong-pò͘ ê ki-hoē bô koân, nā Kok-bîn-tóng chiūⁿ-tâi liáu-āu, bô chhân-chhân-á kā goân-té ê lâng (úi-oân, ha̍k-chiá) oāⁿ liáu-liáu, án-ne iáu ū ki-hoē khoàⁿ-tio̍h kong-pò͘, bô–chiá, khióng-kiaⁿ-á kùi-ā tang lóng bē kong-pò͘–a.
Tâi-oân ê bó-gí ūn-tōng-chiá chit-chām-á ū leh khó-lū, sī m̄-sī seng chi̍p-tiong le̍k-liōng sak “Gí-giân Hoat-tián Hoat” (goân-té kiò-chò Gí-giân Pêng-téng Hoat), nā hoat-lu̍t ū koè, bó-gí koân ē khah siū-tio̍h pó-chiong, m̄-koh taⁿ sè-bīn iáu bô bêng, koh lâi ē án-choáⁿ-iūⁿ chit-má kóng lóng iáu siuⁿ chá leh.
Gún kan-taⁿ chai-iáⁿ Kok-bîn-tóng sī 1 ê bô siáⁿ chù-tiōng bó-gí ê chèng-tóng niā-tiāⁿ, beh sak i kiâⁿ, tio̍h khah chhut-la̍t, khah phah-piàⁿ leh chiah ē-ēng–tit.
Nā chiàu an-ne kóng, khióng-kiaⁿ chit kúi nî bô-gí chèng-chhek ē tò-thè-lu. Kiàn-nā chèng-hú oāⁿ lâng tsò, hêng-chèng tsu-goân soah lóng toè leh sé-pâi, hoat-lēng piàn-lâi piàn-khì, si̍t-tsāi hō͘ lâng sa bô tsáng. 🙁