◎Limkianhui （中國福建）
譯本語言：閩南語
原作：外國格林童話《灰姑娘》

　　古早時，有一个好額儂的太太，破病kah真siong-tiōng。未過身進前，即个婦人儂kā伊唯一的諸姥囝叫來面頭前，kā伊講：「可憐啊，我的諸姥囝，阿娘知影家己是無久的儂，實在毋甘放汝孤一个坫即个世間。總是我死了後，也卜保庇汝、保護汝。」無偌久了後，即个婦人儂著真正過身去囉。

　　婦人儂死了後，厝內儂kā伊的風水做佇in厝後壁的花園ni̍h。婦人儂in諸姥囝，hit-ê可憐的小姑娘，伊是一个乖巧又佫善良的諸姥囡仔嬰。伊每工to去in阿娘的墓前哭呻。日子一工一工過，真緊到寒天，四界霜雪落厚厚，kā婦人儂的墓庵khàm厚厚，親像一領白皙皙的毛毯。一目nih，又佫到春天，春風微微仔吹，日頭光chhiō tòa墓埕，霜雪ta̍uh-ta̍uh-á烊去、化去（hòe–khì）……冬去春來，毋知底時hit-ê好額儂又佫再娶後岫（āu-siū）囉……

　　後母仔來的時陣，有順紲共伊hām前儂生的兩个諸姥囝也做一下kâⁿ過來。即兩个諸姥囡仔雖然生做真水、真好枝骨，總是，褻體否心毒行。In來即个家，注定是hit-ê可憐的小姑娘愛予in淩遲、酷毒。In有較大伊歲，所以小姑娘愛叫in「阿姊」。In供體小姑娘是一个會食bē拜尪、無路駛的飯桶，也有共大儂使唆，叫in差教伊去竈跤做諸姥kán。In kā小姑娘身軀頂chhēng的súi衫súi鞋，攏chiâu剝剝落來，kan-na予伊幔一領火灰仔色的破襦。自按呢，即个可憐的小姑娘予in趕去竈跤鬥跤手，也不管時予in創治、糟蹋。此後，即个可憐的小姑娘，逐工攏著做一寡粗重佫lah-sap的工課，天未光着起來擔水、hiâⁿ火、煮食、洗衣，摒掃……真正天光無閒到煮暝昏，也逐工予in凌治佮糟蹋。見擺nā到kah暗時，伊着thiám kah bōe振bōe動，規身無力。無眠床通睏，姑不將著跔竈空邊的火灰堆ni̍h。因為按呢，伊soah kō到規身全火灰，烏趖趖，看着加真la-sâm，加真怯勢。Hit兩个姊妹仔就keng-thé伊做「烏諸姥」。

　　有一擺，好額儂beh去趕圩，伊問後母生的hit兩个諸姥囝beh ti̍h啥貨。大的講：「我beh ti̍h hit-lō真súi真súi的衫褲。」第二的講：「我beh愛珍珠kah soān石。」好額儂佫問家己親生的諸姥囝：「嬰仔，ah汝咧？」烏諸姥kā in老父講：「親愛的爸爸，汝倒轉來的時，看佗一枝樹椏（chhiū-oe）先khê着汝戴的帽仔，汝着kā伊摘（tiah）轉來予我。」老父轉來了後，買真濟súi衫súi褲佮soān石送予hit對姊妹仔。半路ni̍h，伊有nǹg過一片烏khâm-khâm的樹林，hia是一片矮跤仔樹。有一叢榛仔樹的樹椏khê着伊的頭殼，險kā伊的帽仔撞（tōng）落土跤。老父就kā即枝樹椏at斷，紮轉來予家己的諸姥囝。烏諸姥kā即叢樹椏摕去栽佇in老母的墓仔邊。伊照原逐工去墓邊哭三擺，見擺nā哭kah真正傷心的時陣，目屎着親像雨水，一直透lìn落來，滴tòa咧hit叢樹椏ni̍h，親像咧kā沃水共款。樹椏真緊着生根puh-íⁿ，直直hai起來，變成一叢真súi真懸的大樹。過無偌久，着有一隻鳥仔飛來樹仔頂做岫。鳥仔真愛佮烏諸姥開講，in兩个成做好朋友，烏諸姥nā beh ti̍h啥貨，鳥仔 攏會 kâⁿ 來 予伊。

　　國王為着beh kā王子選未婚妻，按算相連紲三工beh來舉辦大型的宴會，嘛有邀請着真濟幼齒，又佫媠的諸姥囡仔來。王子按算beh ùi chiah-ê來參加舞會的súi諸姥囡仔當中，揀一个有家己有合意的來做新娘。烏諸姥in兩个阿姊oân-á hông邀請有着。In kā烏諸姥喝來替in梳頭鬃、拭鞋、結腰帶，kā伊展講國王beh邀請in兩个去參加舞會。烏諸姥按in的意思替in梳裝打扮了，家己soah咧哭傷心，伊嘛想beh去參加舞會。伊走去 ko·-chiâⁿ後母予伊tòe，iah毋koh 後母仔soah應伊講：「哎哟！烏諸姥，ah汝也想beh去噢？！汝beh chhēng啥物衫去？汝也無禮服，也bōe曉跳舞，ah無汝是beh佮儂參加啥物舞會啦？！」烏諸姥照原 硬kā ko·-chiâⁿ，後母仔 毋愛佫kiau伊 kô-kô纏，choâⁿ 刁工sio khia-khang，講：「chia有一盆hô-lîn豆仁，我當（taⁿ）全部beh kā 倒倒落去火灰仔堆ni̍h，兩點鐘後，汝nā有才調kā豆仔仁攏總khioh出來，汝着會當去參加舞會囉。」講了，就kā一盆hô-lîn豆全部摒落去火灰仔堆ni̍h，越頭做伊出門去囉。烏諸姥無法度，傷心kah，按後尾門仔走出來，走來到花園ni̍h，大聲對天喝講：

　　「天頂的粉鳥啊、斑鴿啊，
　　緊飛來噢！飛來chia噢！
　　可愛的粟鳥仔（chhek-chiáu-á），親愛的朋友啊，
　　緊來噢！趕緊來噢！
　　逐个緊來kā我鬥相共，
　　助我kā火灰堆內底的豆仔仁揀出來噢！」

　　代先飛來的是兩隻白粉鳥，in是按竈跤的窗仔門飛入來的；佫來是兩只斑鴿，佫來，天頂大細隻鳥仔攏來啊，chi̍h-chi̍h-chia̍uh-chia̍uh，翼股仔「噗噗噗」，真緊攏飛來到火灰堆邊頭。粉鳥仔囝 頭chhih-chhih，tòa火灰ni̍h 啄咧啄咧，將豆仔仁一粒一粒，咬咬出來；眾鳥嘛開始kut力啄、kut力 khêng……。一點鐘過後，in將豆仔仁ùi火灰堆內底全部攏póe-póe出來，té佇盤仔底。烏諸姥kā hiah-ê鳥仔說多謝了後，in to̍h按窗仔口飛出去囉。伊真正歡喜，趕緊捧着盤仔去chhōe後母仔，想講即siaⁿ 穩會當tòe in去參加舞會囉。哪知影後母仔soah應伊講：「bōe用得，bōe用得！汝即个lah-sap諸姥，汝也無禮服，也bē曉跳舞，汝bē使去！」烏諸姥佫kā ko·-chiâⁿ，後母仔即擺換講：「一點鐘後，汝nā有才調kā即兩盤豆仔仁ùi火灰內全部khêng出來，汝着會使去啊。」伊想講即擺烏諸姥穩死心啊，就按呢喙笑目笑，做伊行出去囉。Ah毋koh，諸姥鬼仔 佫再 走去後花園，佮頂擺共款，對天大聲喝講：

　　「天頂的粉鳥啊、斑鴿啊，
　　緊飛來噢！飛來chia噢！
　　可愛的粟鳥仔（chhek-chiáu-á），親愛的朋友啊，
　　緊來噢！趕緊來噢！
　　逐个緊來kā我鬥相共，
　　助我kā火灰堆內底的豆仔仁khioh出來噢！」

　　代先飛來的是兩隻白粉鳥，in是按竈跤的窗仔門入來的；佫來是兩只斑鴿，佫來，天頂大細隻鳥仔攏來啊，chi̍h-chi̍h-chia̍uh-chia̍uh，翼股仔「噗噗噗」，真緊攏飛來到火灰堆的邊頭。粉鳥仔囝 頭chhih-chhih，開始tòa火灰內，啄咧啄咧，將豆仔仁一粒一粒，咬咬出來。眾鳥嘛開始kut力啄、kut力 khêng……半點鐘後，in將豆仔仁ùi火灰堆ni̍h 全部攏póe-póe出來，té佇盤仔底。烏諸姥真正歡喜，鳥仔飛走了後，伊趕緊捧着盤仔去chhōe後母仔，想講即siaⁿ 穩會當去參加舞會囉。哪知影後母仔soah講：「好啊啦！汝免佫了戇工啊啦，汝是bē當去的啦。汝無禮服，佫bē曉跳舞，汝存辦 beh kā阮 漏氣 是毋？！」講煞，in翁仔姥就chhōa 着hit對姊妹仔 去參加宴會囉。

　　即siaⁿ，厝內儂攏出去啊，chhun烏諸姥一个儂留tòa厝ni̍h。伊感覺誠傷心，誠鬱chut，就來到榛樹跤哭chhoeh：

　　「榛仔樹啊！汝一定愛kā我鬥相共，
　　拜託汝身軀搖搖咧，
　　變一軀金sihⁿ-sihⁿ，佫súi-tang-tang的禮服予我，好無……」

　　伊的朋友——鳥仔，ùi樹仔頂飛落來，替伊kâⁿ來一軀 khōng金 佫khâⁿ銀 的禮服 佮 一雙 白皙皙 又佫新點點的絲仔鞋。破衫褪sak換新衫，lio̍h-á化妝打扮了後，烏諸姥就來到了舞廳，hit兩个姊妹仔比伊早到一步。金tang-tang 佫 豔豔sihⁿ 的禮服chhēng佇烏諸姥的身ni̍h，看着是hiah-ni̍h貴氣，真正是sùi kah會驚倒儂！In攏認bōe出來，lia̍h-chún伊是按佗位來的公主，拍死着想bōe到伊是烏諸姥。In想講烏諸姥即陣穩當是乖乖仔ku佇竈空邊的火灰堆ni̍h咧補眠。

　　王子看着伊，趕緊行倚來牽伊的手，請伊跳舞。自頭到尾，王子攏是招伊跳，攏無hām別个諸姥saⁿ-kap跳。王子的手一直kā伊攬tiâu-tiâu，見nā 有儂beh來招，王子着kâng講：「即位小姐佮我咧跳舞。」In做夥跳kah真暗真暗，伊chiah想着講着轉去囉。王子想beh知影即位美麗的姑娘到底徛佗位，就對伊講：「我送汝轉去。」烏諸姥雖然喙講好，毋koh soah趁王子無張弛的時陣làng蹽，越頭做伊走kah無看見儂影。看着王子佇後壁kho̍k-kho̍k jiok （chip），烏諸姥看破跳入粉烏寮，順紲將門khioh起來關。王子直直守佇外口，毋願回宮去，一直到kah烏諸姥in老父轉來。王子chiah 講予in老父聽：「佇舞會，hit-ê毋知叫啥物名的諸姥囡仔，即mái覕佇即間粉鳥仔寮內底。」尾仔，in kā寮仔門kiāu開，毋koh內面已經無儂。王子真失望，看破做伊回宮去囉。父母轉來的時陣，烏諸姥已經ku佇火灰仔堆邊頭，身軀頂照原chhēng着 hit軀lah-sap的衫褲，竈頭頂 暗淡的 塗油燈 嘛 照原 按呢 sihⁿ咧sihⁿ咧，nā像啥物代誌攏無發生過的款。其實，烏諸姥跳入粉鳥寮了後，真緊着ùi後尾門仔soan出去，踅去到榛樹仔跤，將身軀頂 hit領媠tang-tang的禮服褪落來，拜託鳥仔 來kâⁿ倒轉去。了後chiah斡轉來厝ni̍h，照原佫幔 hit領火灰仔色的破裘仔。

　　第二日的舞會，佫beh起鼓囉，in爸爸佮後母仔，hām兩个姊妹仔又佫出門去囉。烏諸姥佫來到樹仔跤，念講：
　　「榛仔樹啊！請汝kā我鬥相共，
　　拜託汝身軀搖搖咧，
　　變一軀金sihⁿ-sihⁿ，佫媠tang-tang的禮服予我。」

　　Hit隻鳥仔又佫飛來囉，紮一軀比頂擺佫較súi的禮服來。伊行入舞廳的時，在場的儂攏o-ló súi，講伊親像天頂的仙女來下凡。王子一直咧等伊來，看着伊就趕緊倚來牽伊的手，請伊跳舞。見nā有儂beh來招，王子着kâng講：「即位小姐佮我咧跳舞。」In直直跳，跳 kah半暝，beh轉去的時，王子照原kā tòe-tiâu-tiâu，想講按呢着知影即个姑娘in厝佇佗位。無gî悟 tòe kah尾仔共款嘛是予伊佫soan去。即擺，伊跳入in老父teh tòa的hit落大厝後壁的花園ni̍h。花園內底有一叢真súi真懸的梨仔樹，樹叢頂懸，果子仔是生kah密密chiuh-chiuh。烏諸姥 liâm-tong-sî chhōe無所在thang覕，歸氣peh按樹仔尾頂去。王子看無伊的儂，嘛毋知伊到底是藏佇佗位，自按呢佇hia chhāi-chhāi徛，一直徛到in老父轉來，chiah 講予伊聽：「hit-ê 佮我做伴跳舞、毋知啥物名的姑娘，佫再去予soan去囉…Ah照看，是覕佇即叢梨仔樹頂懸。」聽王子按呢講，烏諸姥in老父着咧臭giâu疑：「敢講是烏諸姥？」尾仔，伊叫儂攑斧頭kā樹仔phut倒，毋koh，樹仔頂根本無儂。老父佮後母仔去竈跤咧巡的時，看見烏諸姥嘛是佮普通時仔共款，the佇火灰堆ni̍h，攏無啥物各樣。噹時仔是按呢啦，伊peh起去梨仔樹了後，着隨按另外一爿佫再soan落來，順紲佫踅去到樹仔跤，kā hit領媠tang-tang的禮服褪落來，拜託樹頂的鳥仔佫來kâⁿ轉去。了後，chiah佫斡轉去竈跤 lam hit領火灰色的破裘仔。

　　第三日，猶原是等kah老父、後母hām兩个姊妹仔出門了後，烏諸姥chiah行去花園hia，對榛仔樹講：
　　「榛仔樹啊！請汝kā我鬥相共，
　　拜託汝身軀搖搖咧，
　　變一軀金sihⁿ-sihⁿ，佫媠tang-tang的禮服予我。」

　　伊hit-ê古意的朋友，又佫替伊chhoân一軀比頂日 佫較 新嫣，佫較súi 的 禮服 佮 一雙 透底 用 純金 落去 pīⁿ的跳舞鞋。伊趕到舞會現場的時，在場的儂攏看kah戇去（gāng–khì），攏講仙女嘛比bē着伊的súi。王子kan-ta邀請伊一儂 saⁿ-kap跳舞，見nā有儂beh招，王子着kâng講：「即位小姐是我的舞伴。」Teh-beh kah半暝的時，伊講beh轉去囉，王子又佫beh陪伊做夥轉去。即擺，王子心內有主張：「我絕對bōe使佫再予伊soan去」。Ah毋koh，烏諸姥照原設法按王子的身邊偷走去。因為走了傷狂，彼雙足金做的跳舞鞋soah佇樓梯骹hia ka-la̍uh一奇（chi̍t-kha），kan-ta chhun正跤佇咧。

　　王子kā hit奇 鞋仔khioh起來收，隔轉日，天未光，着去chhōe in父王，kā伊講：「我beh娶即奇（kha）鞋仔的主儂做我的新娘，nā佗一位姑娘的跤，拄好會合（ha̍h）即奇鞋仔，伊着是我beh娶的儂。」 Hit兩个姊妹仔聽着即个消息了後，攏歡喜kah跳起來，因為in兩儂，跤攏真súi，真幼秀，in想講hit奇鞋仔，nā是in來chhēng，決定會真合跤。老母代先陪大漢諸姥囝坫房間內試chhēng，siáng知影大漢諸姥囝 的 跤盤傷闊，鞋仔傷狹，大頭拇soah long bōe入去。In老母choâⁿ 予伊一支大鉸剪，kā 伊 鑿空（chha̍k-khang） 講：「無要緊，大頭拇傷hai，咱剪sak！只卜汝nā會當做王后，tok一支跤指頭仔嘛會值得！時到，汝nā beh出門，拍算攏毋免佫行路囉。」即个戇諸姥鬼仔聽kah信篤篤（sìn-tauh-tauh），想講in母仔講按呢有理，choâⁿ心肝掠坦橫，敢敢將倒跤的大頭拇鉸斷，了後，鞋仔long咧，強忍thiàⁿ，行來到王子的面頭前。王子看伊chhēng kah bā搭bā搭，當做伊是家己beh 娶的新娘，就kā伊攬上馬，雙雙回宮去囉。

　　無gî，雙儂行到後花園的時陣，soah聽着hit叢榛仔樹頂 有一隻粉鳥佇咧唱歌：
　　「翻頭翻頭！緊翻頭！
　　汝看hit奇鞋！
　　鞋傷細，毋是beh予伊chhēng的！
　　王子！王子！
　　緊越頭轉去娶汝的新娘，
　　坐佇汝身邊的儂毋是汝的新娘。」

　　王子聽着了後，趕緊落馬一下看，看見血水仔直直ùi鞋仔內滲出來，伊知影家己hông騙去啊，隨越頭將假新娘chhōa倒轉，對in兜的儂講：「即个毋是我的新娘，叫另外hit-ê小妹來試看māi。」小妹摕鞋仔入去試，頭前攏chiâu long入去囉，無gî悟 跤後tiⁿ 傷長，chiⁿ 攏bōe入去。In老母佫kā 使唆，叫伊將跤後tiⁿ 削hìⁿ-ka̍k，chhēng好勢了後，出來見王子。王子看伊chhēng kah bā搭bā搭，想講伊着是真正的新娘，就kā伊扶（phô·）上馬，雙雙回宮去囉。

　　無gî，行到後花園的時，又佫聽着粉鳥佇樹尾溜咧唱歌：
　　「翻頭翻頭！緊翻頭！
　　汝看hit奇鞋！
　　鞋傷細，毋是beh予伊chhēng的！
　　王子！王子！
　　緊越頭轉去娶汝的新娘，
　　坐佇汝身邊的儂毋是汝的新娘。」　　

　　王子àⁿ落去一下看，照原看着血水仔ùi鞋仔內直直滲出來，一奇白色的絲仔襪 嘛攏全tò·紅去，趕緊越頭，將伊送轉去。王子kā in老父講：「這毋是正港的新娘，汝佫有諸姥囝無？」In老父應講：「嗯…有是有啦，猶一个『烏諸姥』是我佮進前過身hit-ê太太生的……是講，我即个諸姥囝，儂生做慍忳（ùn-thùn）佫lah-sap，斷斷（toàn-toàn）毋是汝的新娘啦。」不而過，王子的確講 beh叫伊出來看māi。烏諸姥來到，先洗面佫洗手，了後就對王子行禮問好。王子摕鞋仔予伊試，鞋仔bē輸專工做beh予伊chhēng的，是按呢 和和和、bā-bā-bā。王子就掠伊金金相，認出是伊無毋着，歡喜kah chhia̍k-chhia̍k-tiô，大聲講：「這chiah是我的新娘啦！」後母仔hām hit 兩个姊妹仔，攏總驚一tiô。看着王子親手kā烏諸姥牽上馬，in母仔囝三儂是氣kah面仔攏chiâu烏，無法度，目睭金金看王子kā烏諸姥娶轉去。雙儂來到榛樹仔跤的時，聽着粉鳥仔佇咧唱歌：

　　「回宮囉！回宮囉！
　　緊看hit奇鞋！
　　王妃！這是beh做予汝的鞋！
　　王子！王子！
　　較緊chhōa汝的新娘倒轉去，
　　坐佇汝身邊的儂chiah是汝beh愛的新娘。」

　　粉鳥唱煞，飛過來歇佇烏諸姥正爿的肩胛頭ni̍h。In做陣ùi王宮行去。

（煞）

Tagged: 講古