聲母類化，佇閩南語來講，毋是孤例，除起「危險」以外，親像進前所講的「龍眼」也是屬佇即款的情形，台灣腔口「英雄」也是，漳州、廈門講的「chī-chūi」也是。下底詳細來講分明。
1、危險。正讀gûi-hiám，漳州的腔口講做hûi-hiám。危字，佇別的詞組內中，攏無呼hûi的例，獨獨「危險」呼h的聲母。
2、龍眼。龍眼即个詞，無共款的所在，有無共款的腔，總是，雖罔腔口無共，攏有對應關係，有規律，無脫種。
（1）、先講「眼」字。眼，疑母產韻上聲二等開口，五限切。眼字，《十五音》屬佇「熋」韻，閩南文音gán，白話音照各所在腔口是：海澄（漳系）géng、漳浦（漳系）gióng、雲霄（漳系）géeng、南靖（漳系）gán、廈門géng、同安ngái、泉州ngúi。
眼，中古疑母，伊的聲母，佇《十五音》屬「語」，有g、ng兩種變體。g、ng，攏算是舌根音。閩南舌根音包含k→[k] (基)、kh→[kʰ] (欺)、ng→[ŋ] (硬)、g→[g]（疑）即幾組。同屬佇舌根音的聲母，有時會相變換，這無稀奇，比論有下底遮个字：逆（ge̍k→ke̍h，逆口：ke̍h-káu）、凝（gêng→kiân，凝凍：kiân-tàng）、遨（gô→kô/khô/ngâu：熬糖kô-thn̂g/熬街khô-koe/熬肉骨ngâu bah-kut）、挾（kia̍p→khoe̍h：予門挾著）、搝（替字，khiú←→giú，拉拽也）、結（kiat→kih(泉)/gih(漳)：結牆結磚，砌也）、囡（囝，gín(漳)/kín(漳)/kán(泉)）。
（2）、故倒轉來講「龍眼」即个詞，本底是著唸做「lêng-kéng」，不而過，閩南所在較濟是「龍」字的聲母變成/g/（《十五音》「柳l」變「語g」），總是也有所在照原呼「柳l」的例（比論，漳州龍海的白水營即角勢照原講做「lêng-kéng」）。有變換的例，比論：廈門gêng-géng、同安gêng-ngái-á（仔）、泉州ngûi-ngúi、惠安mûi-múi。特別卜講，泉州的ngûi-ngúí，頭字「龍」變做「ngûi」，毋但是聲母類化，連韻母也紲類化；惠安的「mûi-múi」故較進一步，聲母ng變做m，亦著是《十五音》「語」變「文」，即款情形，也有親像「銀行:bûn-hâng」、「音樂:im-ba̍k」、「牛:bû」、「孫悟空:Sng Mō͘-khong/Sng Ba̍k-kong」……
3、「英雄」本音是「Eng-hiông」，台灣有的所在唸做「Eng-iông」，後壁字變成無聲母的「iông」，也著是《十五音》「喜」變「英」，這明明也是聲母類化，因為佇別的詞組內中，攏無呼「iông」的例。
4、漳北舊早有講「chī-chūi-á（仔）」、「chī-chôa」，廈門講「chī-chūi」，意思是「誰/who」、「啥儂（什麼人）」，即个詞即陣賰一寡老大儂會捌，少年儂會曉的無幾个，差不多卜死失去啊。即个「chī-chūi-á（仔）」、「chī-chôa」拄好佮漳南的雲霄話「tī-chôe」全然相對應。「chī-chūi-á（仔）」照講是「chī-chôa」的原形；通知影漳北的「chôa」是「誰仔」合音；雲霄的「chôe」也敢彩是「誰仔」的合音字；角美（漳北）、海滄（廈門）、台灣雲林/台中的「chiâ」也是共款的來路。
雲霄話「tī-chôe」的頭字「tī」，是閩南語系的原始疑問發問詞，比論，tī-sî/tī-tang-sî（何時）、tī-lâng/tiâng（何人：永春、安溪、漳平、詔安、東山……）、tī-tè（哪個：平和）、tī-gê（哪個：詔安、東山）。看漳北的「chī-chūi-á（仔）」、「chī-chôa」，廈門的「chī-chūi」，㱏知頭字「chī」是去予後壁字的聲母「ch」來類化，伊的原形正正是「tī」；這以外，「chūi」的聲調，予頭字「tī」類化。前後字按呢牽過來，纏過去，不止複雜。

Tagged: 稽考