舊年做的一條「工商廣告」，有較各樣（koh-iūⁿ），講笑講笑nā-niā，心適心適，毋好傷頂真啦。

工商服務，食好鬥相報，好藥報汝知

各位親愛的聽眾朋友，又佫到kah工商服務的時間囉，今仔日，卜來共逐个介紹的即帖藥方，號做「鬼頭牌注死丸」。即帖藥仔，伊有啥物路用，是咧食啥物症頭的，請聽我詳細來講紲落去。

人生短短，凡事凊彩著好，朋友弟兄，海海就是，計較無路駛。各位聽眾朋友、儂客倌，儂佇咧講「儂死百百款」，有的百年老死，有的身苦病疼死，有的出門車轂死，有的水鬼仔拖去死，有的跳樓自盡死，有的食飯kê死，有的雷公摃死，有的平平路摔死……總是，一儂死一樣，無儂死親像。
嘛有hit號天下第一戇，攑刀佇咧割頷chûi無死。講著這，咱著想起無偌久進前，電視佇咧報道講，有一个諸夫儂，因為家俬頭故障，所致伊的家後不守婦道，三不五時著咧討契兄一下。即个諸夫儂，伊感覺規圇个人生choâⁿ強卜變做烏白去，感覺做儂誠無光彩，自安呢，伊soah一時想bē開，按算卜來自行了結家己的性命。講伊天下第一戇，伊佫真正戇甲過頭。世間死的方法千萬款，偏偏有一種儂，連死伊著原仔（oân-á）真頇顢（ham-bān），即个可憐的諸夫儂，伊著是當中的一个。死，著原仔真簡單，篔簹湖無冚蓋，利便利便，跳跳落去著朝直矣，siáng知影伊soah bē曉安呢做，千千著是去合意著in厝灶頭hit支又佫鈍，又佫生鉎的菜刀。結尾當然是真酷刑，一刀兩刀、三刀四刀……lê、割、chûi、phut、條（liô）、鏨、oe、截（choe̍h）……十八款刀法試迵迵，佫迵迵試，刣甲規个儂血流血滴，刣甲規个刀肉強強卜缺一缺，嘛是照原猶佫無死去。儂客好朋友，汝共看，像安呢卜死仔毋成死，卜拖佫拖真久，真正chhoē鬼哭無爸，一世儂拖屎連，比死較慘。

各位儂客倌，某儂今仔日，專工共恁介紹即帖好藥方，毋是咧hap-hong歕雞胿，好心，則共汝報好藥，介紹予汝的即帖「鬼頭牌注死丸」，正港是咱在地的老字號，千百年來，食死偌濟英雄豪傑、俊男美女！「鬼頭牌注死丸」，毋驚汝探聽，驚汝毋知影，「鬼頭牌注死丸」，包汝食了，無死嘛斷氣。

若講著即味「鬼頭牌注死丸」，毋是咧臭彈，正港濟儂呵咾（o-ló）少儂嫌，夭壽好，死爸讚！服用過的儂（即mái攏相招去做鬼啊），he攏嘛呵咾kah觸舌(tak-chi̍h)，真正頂港有名聲，下港有出名，現食現無命，無食無輸贏。一罐俗俗，chiah賣汝200箍nā-niā。列位咱chiah-ê好厝邊，鄉親序大，朋友弟兄，恁若是有厝邊頭尾、親情五雜（chhin-chiâⁿ gō͘-cha̍p），毋管是拄著啥物款傷心的代誌，或者是厝內底有儂為著某物代誌佇咧想bē開，想beh行短路的，像安呢——kho̍k豆腐kho̍k 無死的，啉可樂毒（thāu） bē行的，或者是phoa̍h麵線佇咧吊脰無斷氣的，這攏會當來共咱交關，共即味「鬼頭牌注死丸」拆轉去食，保證予汝食kah會sù-sī，用kah會滿意。各位hoān-sè無瞭解，咱即帖「鬼頭牌注死丸」正經是「轟動三界，驚動萬教」的閻羅祖傳秘方，由著陰巢地府，「儂看儂呸瀾，鬼看鬼倒彈，雞看拍咯咖，狗看歕狗螺」的烏白郎君親身佇咧製造；嘛是從到taⁿ，天地間上蓋出名，上蓋見效的鬼仔丹。

儂客啊，我某儂共汝掛保證，今仔日，汝若共我買轉去食，保證予汝行未到眠床邊，著倒kah離離離(lī-lī-lī），soà落去 喙角吐白波（pe̍h-phoe̍h），身軀phi̍hⁿ-phi̍hⁿ-chhoah，屎尿chha̍p-chha̍p滴，頭毛落kah無半支；佫無偌久了後，著予汝規身硬chhiàng-chhiàng，四肢踉（liòng）直直，死kah有夠歹看，任 看 都 原仔 bē認咧。「鬼頭牌注死丸」，「俗，佫有局」，「緊，佫有效」，是汝倒床拖命的良藥，凄慘罪過的好伴侶，beh買著愛趁早；慢來，著無啥巧。怨嘆的時陣，汝會想著伊；揬膦（tu̍h-lān）的時陣，汝會數念伊，「鬼頭牌注死丸」，予汝輕鬆食，快活死；徛咧食，倒咧死，「鬼頭牌注死丸」讚啦！

Tagged: 笑古, 講笑詼