即逝抴大小姐去讀冊，雖罔Evisa進度有較慢淡薄，開學了晏兩日㱏報到，好佳在過程猶通講是平安故順序。即抴伴學旅行，佳在有娟𢙠大兄大嫂惱力，安排照顧！予阮一家伙仔儂憩陶了輕鬆故次序。阮兵分兩路，著若像我進前所講，「大鼎未滾，鍋仔鏘鏘滾」，娟抴細漢的佮丈儂丈姆先飛新加坡，暗時便到新山啊，見到阿伯阿姆，兩對兄、嫂（佮一寡仔下沿的囡仔）。即逝落南洋，省親探訪也是主要的行程！隔日早起，便相辭出來，大兄、大嫂駛車抴路，開始長途遊覽（大兄駛車，大嫂抴路，兼交定酒店，歸照顧一車儂食食，真正褻體悿頭），一路七踅八踅，有去馬六甲、怡保遮个大所在，上尾來到國都吉隆坡南勢的城號做雪邦！學堂著是佇遮啦。𢙠來遮佮我會合。我已經事先到一日。雖罔是事先到，總是一日的中間，我是佗落計毋敢去，對透早到暗時仔攏勼佇旅館啦。所以講毋敢出門，第一是講話𣍐通行無路，第二也敢彩有去予在地的生狂雨驚著。啊若，大小姐已經佇學堂咧讀冊，這是伊大學生涯的頭一日啦。我也算是頭一倒見著華哥佮阿嫂。見面了後，一家團圓，未免得相合食飯，化仙開講，彼著免故講。諸姥囝猶原亦故是較愛川味火鍋，戇的都看會出來。𢙠到雪邦的第二日，大兄大嫂便發落車馬，抴阮入城去吉隆坡。車程約略一點鐘骹兜，真好氣聲，攏無窒車。雪邦去首都的高速公路，路況雖罔略略仔有較輸福建省共等級的公路，總是好得是較規矩，較文明，所以也有次序，車速也褻體快。大兄大嫂點陳故貼心，排比發落，抴阮去參觀「陳嘉庚紀念館」，總是，無虞誤煞來閉館啦（其實是咧裝潢打揲）。所以，未免得略略仔失落，總是連鞭又故昂愕著，著啦，著是彼天下出名的雙子塔，干但看伊的外型著昂愕到頭眈眈、目睭吊吊！若故講著吉隆坡城，四界懸樓若插蟶，啥物清真寺、佛寺、印度廟滿滿是、密密啁啁……城市繁華有氣勢，商業發達，車濟儂濟，挨挨夾夾，這著是吉隆坡所以敢講是南洋數一數二大都會的理由啦。未免得一路行一路遨，買這買彼，買東買西，彼亦免故講。
目𥍉七暝八日過去啊。講好卜倒轉來，總是阿公阿嬤踅踅唸，遨講的確卜入去學堂內行行看看咧。雄雄㱏想著，底時仔是老大儂𣍐放心啦，喝行便現行。大嫂故較𠢕替儂想，建議一家大細順紲蹛學堂食堂食晝，食一頓仔𢙠的飯，啉一甌仔𢙠的水，眾儂攏喝好，有影著按呢㱏著啦！中國儂自古講究水土合，我少年去省城讀冊，阮阿母也有刁工攢一小矸仔水，一把米予我紥去。做法無共，用意相同。還勢拄仔報到，入學手續較濟較費氣，以外著故上課，阮也攏知影即層，所以也毋敢延延，驚誤了囡仔的時佮工，猛猛見一面，著隨相辭出來，甚至也無閒通佮伊合影。愈刁工放輕鬆，心頭愈毋甘。倒來到酒店，我臨當時真感慨，進前聲聲句句猶咧講囡仔大漢啊，也通放手予伊家己去面對人生的路佮嵁碣……總是翻頭想，故較按怎講，這千山萬水，隔洋隔海，放伊家己一儂坫佇這番邦外國，我即个做儂老父的實在無彼號鐵拍的心肝，囝是家己的啊！學堂的環境真正𣍐否，宿舍一棟紲一棟，教學樓也起到新點點，食堂衛生故清氣，連人工湖佮四周的花草樹木也栽到水鐺鐺，故有無閒通去看的圖書館、音樂廳等等。平平是廈大，熟似的嘉庚，相同的建築，生份的馬來語，烏鉎鉎的南亞裔保安，含佮𢙠忠厚有禮貌的笑面……放心啊！敢彩這著是廈馬佮別儂無共款的所在！眏望大小姐在這間有福氣的學堂，會通揣著伊卜行的路，祝福伊！