葫蘆問(葫蘆運)

【源頭】「葫蘆問」,是一款帶有博弈(phok-e̍k)性質的遊戲,聽咧講伊的起源佇福建泉州。自早時一直到kah民國五六十年代,佇泉州、同安在地猶佫真時行chhit-thô即款遊戲。在咱瞭解,佇潮州汕頭hit tah嘛真時行。台灣hit爿,到kah現此時猶佫不止仔時行,三不五時佫有看著儂佇咧sńg即號遊戲。聽網友佇咧講啊,現此時佇台灣鹿港、台南、宜蘭 chiah-ê所在,計看會著即款遊戲。

「葫蘆問」,唸做“hô·-lô·-būn”。台灣鹿港、福建同安,計是安呢唸的;廈門儂講是「葫蘆運」,唸“hô·-hô·-ūn”。台日大辭典寫做「葫蘆分」,唸“hô·-lô·-pun”,毋知是腔口有差抑是啥物因由。潮州汕頭hia,有儂講“hôu-lôu-pūng”。

【概念】「葫蘆問」,早時是囡仔咧chhit-thô的,會得用咧poa̍h- kiáu、輸贏的遊戲,親像即mái咧sńg的「大富翁」著有影卜共卜共。Ah嘛有儂講「葫蘆問」著是「大富翁」的元祖。佮「大富翁」共款,「葫蘆問」嘛會使講是棋盤式的遊戲。「葫蘆問」即款遊戲,主要是由兩種家俬頭仔組成,一項是骰仔(tâu-á),規定兩粒,無加也無少;佫另外一項著是紙圖。紙圖是上kài要緊的物件。骰仔,通儂知,咱著免佫講。Nā紙圖,he chiah是真正有秘訣的物件。來講即張紙圖內底的佈置,伊頂頭畫的chiah-ê尪仔標,雖然是一仙一仙安呢照排落去,不而過,詳細共看,事實伊是按卷螺形安呢佇咧踅框(se̍h-khong)。目睭較金的儂,一下著看出伊攏總有踅三環,按照反時針的方向拍箍踅環,對外環安呢直直框入去,一直到kah內環上中心hit仙大大仙的神明為止。即內底計共有四十七仙尪仔標,除去上中央hit仙壽星無算的,攏總猶有四十六个尪仔標。即四十六个尪仔標,事實是二十三個體來組成,每一个個體攏出現兩擺(只不過前後的pose略仔有差),安呢雙雙對對,攏總二十三對。Chiah-ê尪仔圖,透底是中國民間傳說所牽涉著的一寡吉利的神或者是吉祥物仔,有神明、神獸、神物,嘛有仙花、仙草……濟濟項。

【家俬頭仔】紙圖一張、骰仔兩粒、隨儂攢(chhoân)一項細物件(比論銀角仔、番仔火、鉛筆摳仔、象棋子仔……攏會使得)

【儂數】普通來講,四五个kiáu-kha差不多,五六个上拄好。傷濟會插雜(chhap-cha̍p),傷少無gī-niū。

【遊戲規矩】

Kiáu- kha按照抽鬮(liu-khau)的順序,sio-lîn ka̍k骰仔,各儂按照骰仔的點數來行,按外環起步點(月兔)算起,啥物儂上代先行到內環上中心的壽星,著算伊贏。起步點就是紙圖頂面上外環的頭一隻月兔,終點是中心的壽星。骰仔點數,上細兩點,上大十二點。

有兩个規矩愛遵守。頭一个著是「先行後跳」的規矩。這著是講,看骰仔點數是偌濟,汝著先行偌濟步(一个尪仔算一步),了後,看是踏著佗一个尪仔頭,chiah佫跳去另外一位共款即个尪仔頭出現的所在,這著是號做「先行後跳」。比論講,汝nā是lìn著兩點,汝著行兩步,來到外環第二順位的「驢」,chiah佫跳去到第十四順位的另外hit隻「驢」。Nā是lìn著十點,著先行到第十順位的「兔」,chiah佫跳倒轉,轉來到第一順位的「兔」。所以,有進也有退。

第二个規矩是「先來的讓位,後來的佔位」。有時,拄著頂骹(téng-kha)、下骹(ē-kha)點數sio-siâng,這是未免得。若拄着即號情況,頂骹著讓位予下骹,頂骹著愛徙(sóa)去另外一个sio-siâng尪仔頭的所在。比論講,有兩个儂平平攏是兩點,按照「先行後跳」的規矩,頂骹照講是來到第十四順位的「驢」;不而過,下骹共款嘛是會來到第十四順位的「驢」,所以,頂骹愛將即个位讓予下骹,頂骹chiah佫徙(sóa)轉去第二順位的「驢」。即招算講是頂骹予下骹踢走,可比是乞食趕廟公。對頂骹來講,運氣較好的,予儂踢對頭前去;運氣nā咧衰,予儂hiauh倒轉。所以,這共款嘛是有進有退。

有一款情況真特殊,he著是頂下骹三个儂來到共一个尪仔頭。安呢,著無法度佫poa̍h落去,所以變成自動和局。Nā卜佫弈(ī),著愛對頭佫重開始。

衹卜(chí-beh)有儂代先行到中心點的壽星,遊戲著隨煞局。先到中心點的儂,算總贏,安呢chhun的hiah-ê儂著攏輸伊(nā是拄著骰仔點數超過「壽星」位,嘛照原算贏!斷斷毋是對頭佫重開始!即點請各位愛注意!!)。總贏,一个儂賠一條大注的,各儂賠平濟。

除了總贏hit个儂以外,chhun的儂會使佫再分輸贏,按名次論輸贏。輸一步,賠一小注;輸兩步,賠兩小注,輸五步,賠五小注;超過五步的按五步算。安呢來講,排名較靠前的,賠較少;排名愈後壁,賠著愈慘。

【紙圖】

台灣鹿港版的「葫蘆問」紙圖:

頂面即張著是台灣版的「葫蘆問」紙圖(↑)。下底即張是潮汕版的「葫蘆問」紙圖(↓):

【葫蘆問口訣】

Sńg 葫蘆問的時陣,計計著愛有口訣,ná行ná唸,安呢較有趣味,嘛較鬧熱。「葫蘆問」雖然講是起源佇福建南部的泉州,不而過,某儂我現白(hiàn- pe̍h)講從來毋捌佇閩南所在當面看過即款遊戲,望日後會當有機會滿足即个願望。佇網頂,有chhiau著台灣鹿港hia的口訣,內底透濫濟濟泉州腔,一時無法度全部明白通徹,望四方賢達指教。

頭一輪(十二隻)口訣,是安呢唸的:二驢(jī lî)·三矸仔(saⁿ kan-á)·四乞食(sì khit-chia̍h)·五雞(gō· koe)·六貓(la̍k niau)·七賓(chhit pin)·八鯉(poeh lí)·九肥(káu pûi)·十浸(cha̍p chìm)·十一吉(孽)(cha̍p-it kiat)·十二葫蘆顛倒勼(cha̍p-jī hô·-lô·  tian-tò-kiu)

這明顯是用較kho̍k-khe的氣口來咧唸。三矸仔,是將「葫蘆」當「矸仔」;六貓,是「貓」是「虎」,計講做「貓」;十二葫蘆倒勼,著是講第十二順位的葫蘆愛退轉去第三順位的葫蘆,安呢著是倒勼。八仙頭——李托枴,生做瘸骹破相,穿插是安呢不答不七,骹脊胼不時佫phāiⁿ一粒葫蘆,民間keng-thóe伊「乞食」,講起來是有傳統的。漢鍾離,手攑芭蕉扇,腹肚張咧腩腩(làm-làm),的確有影親像肥豬,叫伊阿肥算做真客氣囉。呂洞賓自底較斯文體,獨獨伊無hông phì-siùⁿ著。十一吉(孽),即个儂聽講是劉海,生性樂暢,所以講伊孽,真正有合(ha̍h),汝看伊雙手無時停,liâm-mi 摕(the̍h)一對玲瓏仔(lin-long-á),liâm-mi又佫koāⁿ一對啥物死儂骨頭,佇咧變猴弄(pìⁿ-kàu-lāng)……安呢汝著知講即个儂的性素大概啥款。十浸,著是講第一、第十攏是兔,骰仔nā是lián著十點,著愛退轉去起步的月兔hia,安呢有行 chhūn-ná無行共款,可比是浸佇hit-ê所在bē振bē動。浸,著是「chìm- -tiâu」、「bē sóa動」即个意思。

論真講,每一步都(to)有口訣,步步棋,步步有口訣。鹿港所在,詳細的口訣寫佇下底。

浸八成肥

浸九無走

驢二、驢七驢咬筆

葫蘆六上雙雙層

葫蘆九無走

乞食五入大箍

雞四肥chih-chih

雞十一啄龍鐘

虎頭十乙面牌

賓九一杯茶

鯉半斤入銅貢

肥七一槓風

肥八叫司公

葫蘆四撇鬚

王公衫(三)穿bōe破

王公十二盡捧去

驢二、驢十一

乞食五雞母肚

乞食七偷溜鯽

乞食十壹床粿

鐘九子

掃五一尾呆(鮘)

掃八一個月

掃九無走

虎七一支鬚

虎八顛倒勼

屐六一碗圓

屐七佇鐘邊

雞五豆仔紅

雞六著雞災

雞七啄菜

雞八烏先生

雞九天公生

雞十一啄龍肉

嗒嘀四好景緻

嗒嘀八仔鹿

鯉崎崎做阿爹

鯉三娘推磨

(鯉三娘弄關刀)

鯉五鹽酸菜

鯉六曹烏墨

鯉七哥射著鹿

鯉八賣弓鞋

鯉九升龍王

賓仔雙雙去

(賓么么仙人化)

(賓二大尻川)

賓五退烏肚

賓六騎鹿

賓七落姑屐

賓八入飛龍

賓九嘟嘟吼

賓十撈水龜

錢四、錢六重

錢八鑽龜空

掃三五佮七

菜心十一、二把

王公三、五層

鹿九、鹿十佫再入

屐九內花心

屐十鹿轤口

龍七千里馬

龍八開內花

嗒嘀連歕六七聲

龜仔八bōe泅

龜仔九捧銅斗

吉四、五薰吹

吉五花一叢

吉四五仔短短

吉六無尾

吉七退一

吉八鏗鏘

吉九外馬吼

(吉九進四斗)

吉十外花合

吉十一落龍

吉十二吐紅氣

鳥七哥搖玲瓏

鳥八進三格

鳥十二連骨吞

菜六鹽一甕

肥三落鹿擔

肥四落龜致

肥五捧鍋仔

肥六趖一目

肥七進二匹

肥八反鰻

肥九落屎

肥十摕來食

肥上十滿天下

雲馬九哞哞吼

花七痟

花八娘弄關刀

鹿五出聖龍

鹿六觸廄

鹿七閂得

龜仔五落褲

龜仔六穩tak-tak

鐘三落龍

鐘四窮

鐘五興

鐘六落土龍

〖口訣解說〗

浸八成肥——「浸」代表排頭隻的月兔,後壁連行八步,著阿肥漢鍾離,跳去到第三十七位的漢鍾離,連跳二十九步,離中心點壽星kan-ta差十步,真正卯死!

浸九無走——「浸」後壁連行九步,著第十位的兔,退轉來到原位,照原佫「浸」tiâu,哈哈,運氣真正有夠bái。

驢二、驢七驢咬筆——驢二是乞食,跳到第十五位;驢七是阿肥漢鍾離,跳去到第三十七位。

葫蘆六上雙雙層——葫蘆六,照行是著阿肥漢鍾離,連上(chiūⁿ)幾落層來到第37位。

葫蘆九無走——葫蘆(第三位)後壁行九步,著十二葫蘆,退轉來原位,原位踏步。

乞食五入大箍——乞食(第四位)後壁行五步,著阿肥漢鍾離,跳去到第三十七位。真正予汝趁著!

雞四肥chih-chih——雞(第五位)後壁行四步,著阿肥漢鍾離,跳去到第三十七位,確確有影肥chih-chih!

雞十一啄龍鐘——雞後行十一步,拄著銅鐘,直接跳去第四十二位,bē bái!

虎頭十乙面牌——虎(第六位)後行十步,著銅鐘,嘛是跳去第四十二位。

賓九一杯茶——呂洞賓(第七位)骹脊後行九步,嘛是著銅鐘,跳去第四十二位。

鯉半斤入銅貢——半斤是八兩,鯉魚(第八位)後壁行八步,又佫是著銅鐘,嘛是跳去到第四十二位。銅貢是火炮kóng,銅鐘nā演倒,有影像銅貢。

肥七一槓風——阿肥漢鍾離(第九位),身後行七步,又佫是銅鐘,跳去到第四十二位,走真緊,可比風駛篷(phâng,帆),嘛可比坐飛機。

肥八叫司公——阿肥後壁行八步,來到第十七位(攑掃帚的儂,敢講是司公?),跳去到第26位。

葫蘆四撇鬚——葫蘆(第12位),後壁行4步,著銅鐘,直接跳去第四十二位。

王公衫(三)穿boē破——王公(第13位)是戴官帽的曹國舅,伊身後行3步,著銅鐘,嘛是跳去第四十二位。

王公十二盡捧去——王公後壁行12步,來到第25位——框銅錢的芭蕉扇,直直跳去第46位!哇!規碗總捧去!

驢二、驢十一:驢(第14位)行2步(跳到42位)、行11步(跳到46位),攏是好機。

乞食五雞母肚——乞食(第15位)行5步,著第20位的雞角,倒退lu,退轉去第5位,變閹雞。

乞食七偷溜鯽——乞食行7步,拄著第22位的紅鯉,嘛是倒退到第8位,本然好好一尾鮕鮘,soah變鯽仔魚。

乞食十壹床粿——乞食行7步,來到第25位的芭蕉扇,跳去到第46位,一床(sn̂g)粿熟囉!呵呵。

鐘九子——銅鐘(第16位),行9步,拄著芭蕉扇,跳去到第46位。

掃五一尾呆(鮘)——掃帚(第17位),行5步,拄著第22位的紅鯉,退到第8位,變大箍鮘(大箍呆)。

掃八一個月——掃帚行8步,來到第25位的芭蕉扇,跳去到第46位,功德圓滿。

掃九無走——掃帚後壁行9步,來到第26位,嘛是掃帚,佫退轉來原位,無行。

虎七一支鬚——虎(第18位)行7步,來到第25位的芭蕉扇,跳去到第46位,功德圓滿。

虎八顛倒勼——虎行8步,來到第26位的掃帚,跳倒轉去第17位,算起來倒勼一步。

屐六一碗圓——屐(第19位)是何仙姑(木屐:ba̍k-kia̍h,表示「諸姥儂」),行6步,拄好到第25位的kǹg銅錢的芭蕉扇,sīn-sòa跳入到內環盡尾第46位,功德圓滿。

屐七佇鐘邊——何仙姑行7步,拄著掃帚漢,著青驚,倒退到銅鐘後壁的第17位。

雞五豆仔紅——金雞(第20位)飛5步,嘛來到第25位的芭蕉扇,跳去第46位,好收成。

雞六著雞災——雞走6步,拄著掃帚,掃倒去第17位。

雞七啄菜——雞行7步,來到第27位的蓮蕉,飛去到第36位。

雞八烏先生——雞行8步,拄著國舅曹老爺,面chiau烏,退倒去外環第13位。

雞九天公生——雞行9步,拄著金鹿仔,飛去到內環第40位,強強卜抵天囉。

雞十一啄龍肉——雞行11步,拄著青龍出海,好運氣,sīn-sòa飛去到內環第45位。

嗒嘀四好景緻——歕嗒嘀(第21位)是韓湘子,過4步,好運拄著芭蕉扇,升天來到第46位。

嗒嘀八騎鹿——韓湘子行8步,有鹿通騎,來到內環第40位。

鯉崎崎做阿爹——鯉(第22位)配兩點紅,來到第24位的金鳥,做一下飛去到第35位。

鯉三娘推磨——鯉魚泅3步,可比阿娘咧挨石磨,來到芭蕉扇的所在,升去到第46位。

(鯉三娘弄關刀)——鯉魚泅3步,可比阿娘咧弄關刀,來到芭蕉扇的所在,升去到第46位。

鯉五鹽酸菜——鯉魚泅5步,有蓮蕉叢通孝孤,升天來到第36位。

鯉六曹烏墨——鯉魚過6步,拄烏面國舅,可比面仔chō烏墨,衰到有看見,泅倒去外海第13位。

鯉七哥射著鹿——鯉魚飆7步,射著鹿仔,跳去到內環第40位。

鯉八賣弓鞋——鯉魚過8步,看著何仙姑,面chiau烏,雙雙退倒去外環第19位。

鯉九升龍王——鯉魚過9步,翻身變龍王,飛天來到內環第45位。

賓仔雙雙去——呂洞賓(第23位)合(kah)兩點紅,芭蕉扇來成全,送去到第46位。

(賓么么仙人化)——呂洞賓,合(kah)兩點紅,飛天成仙看是有望。

(賓二大尻川)——呂洞賓行2步,khioh著芭蕉扇,卯死!

賓五退烏肚——呂洞賓行5步,拄著烏面國舅,衰kah無tè去,lak落凡間重做儂,退到第13位。

賓六騎鹿——呂洞賓行6步,騎鹿升天,飛到第40位。

賓七落(lauh)姑屐——呂洞賓行7步,拄著何仙姑,落跑(lauh-phâu)走轉去第19位。

賓八入飛龍——呂洞賓行8步,青龍來相助,飛天鑽地來到內環第45。

賓九嘟嘟吼——呂洞賓行9步,歹運拄著品仔仙韓湘仔,卜哭無目屎,看破轉去外環第21位。

賓十撈(hô·)水龜——呂洞賓行10步,好運龜仔來相助,飛入內環41。

錢四、錢六重——銅錢(第25位)後壁,佫行4步、6步,攏是好機。

錢八鑽龜空——銅錢佫去8步,鑽龜空,一路來到第41位。

掃三五佮七——掃帚漢(第26位)行3步、5步、7步,攏總好。

菜心十一、二把——蓮蕉(第27位)佫去11步、12步,攏是好機。

王公三、五層——王公(第28位)是曹國舅,前進3步、5步,攏總好。

鹿九、鹿十佫再入——鹿仔(第29位)頭前行9步、10步,嘛是好機。

屐九內花心——何仙姑(第30位)蓮步小徙(sóa)行9步,有花通插,總是好。

屐十鹿轤口(??)——仙姑向前行10步,拄著鹿仔,倒退步來到第29位。

龍七千里馬——青龍(第31位)七步,化身千里馬,快步來到第43位。

龍八開內花——青龍8步,挽紅花,升天來到第44位。

嗒嘀連歕六七聲——韓湘子(第32位),嗒嘀連歕6、7聲,引來白馬佮花神,騰雲駕霧飛上天。

龜仔八boē泅——金龜(第33位)趖8步,變柴龜,bē振動。

龜仔九捧銅斗——龜仔趖9步,銅鐘當做銅斗捧,衰kah無面通見儂,見笑越頭轉去到第16位。

吉四、五薰吹——孽囝劉海(第34位)行4步、5步,騰雲駕霧直直去。

吉五花一叢——劉海向前行5步,花神來相助,升天來到第44位。

吉四五仔短短——劉海向前行四、五步,白馬、花神來相助,修成正果是差無幾骹步。

吉六無尾——劉海行6步,變成無尾鹿,退倒去第29位

吉七退一 ——劉海行7步,拄著烏龜來帶衰,倒退1步變第33位。

吉八鏗鏘——劉海衝8步,挵著銅鐘鏗鏘叫(kheng-khiang-kiò),烏頭面腫退外線,倒去到第16位。

吉九外馬吼——劉海衝9步,內馬無吼,外馬吼,嘛是好,來到第38位。

(吉九進四斗)——劉海進9步,不如進4步。

吉十外花合——劉海行10步,花花看攏無,不如進5步。

吉十一落(lauh)龍——劉海行11步,拄著青龍起狂,著傷越頭顛倒原位退3步。

吉十二吐紅氣——劉海行12步,面前銅錢芭蕉扇,修成正果差一步,歇喘一下,嘛該然。

鳥七哥搖玲瓏——金鳥(第35位)飛7步,挵著銅鐘,可比搖玲瓏(lin-long),退倒去外環第16位。

鳥八進三格——鳥飛8步,不如行3步。

鳥十二連骨吞——鳥行12步,壽星換伊做。

菜六鹽一甕——蓮蕉(第36位)佫去6步遠,銅鐘做菜甕,等待菜來鹽。退倒去第16位。

肥三落(lauh)鹿擔——大肥漢鍾離(第37位)行3步,拄著衰鹿,倒退來到29位。

肥四落(lauh)龜致——大肥行4步,拄著烏龜奴,衰kah會褪褲,倒退來到33位。

肥五捧鍋仔——大肥行5步,銅鐘看做是銅鍋,衰尾倒退來到第16位。

肥六趖一目——大肥行6步,了戇工不如行1步。

肥七進二匹——大肥行7步,嘛是2步遠。

肥八反鰻——大肥行8步,破病青龍來帶衰,倒退6步變烏鰻。

肥九落屎——大肥行9步,小扇見著大芭蕉,驚一下滲屎,倒退轉去第25步位。

肥十摕來食——大肥行10伐,修成正果遊戲煞。

肥上十滿天下——大肥行出10外步,南斗下凡來相助,眾儂輸錢輸kah褪衫褲。

雲馬九哞哞吼(mà-mà-háu)——雲馬(第38位)9步走,眾kiáu儂輸kah哞哞吼

花七痟——紅花(第39位)開7日,天下kiáu儂攏起痟。

花八娘弄關刀——紅花開過8日,可比阿娘弄關刀,水氣啦。

鹿五出聖龍——鹿仔(第40位)著驚走5步,烏龍帶衰毋成樣,倒退轉去第31位。

鹿六觸廄(??)——鹿仔行6步,結尾倒退到第25位。

鹿七閂得——鹿仔行7步,規碗捧去,總贏。

龜仔五落褲——龜仔(第41位)行5步,衰kah褪褲,退倒去第25位。

龜仔六穩tak-tak——龜仔進6步,總贏,穩的!

鐘三落(lauh)龍——銅鐘(第42位)佫去3步,毋成龍,退倒去第31位。

鐘四窮——銅鐘佫去4步,去倒害,退倒去第25位

鐘五興——銅鐘佫去5步,總贏,旺phàⁿ-phàⁿ。

【話尾】

總是,poa̍h-kiáu有輸贏,sán-kiáu罔poa̍h娛樂娛樂,大kiáu上好毋通bak。古早儂講,「kiáu nā會poa̍h得,屎嘛會食得」、「kiáu仔nā卜poa̍h,sian趁都bē快活」,所講無濫sám。勸咱列位朋友兄,kiáu仔卜 poa̍h,厝內姥囝(bó·-kiáⁿ)序大嘛著愛顧,毋通將kiáu場當做拍拚的工場抑是生理場,無..時到,輸kah褪褲,卜哭著無目屎,chhōe鬼嘛哭無爸。

Tagged:

Comments: 2

  1. 明筠 2009-03-17 at 14:27:44 Reply

    想问一下,就是如果掷出的色子所应走的步数已经超过最后的"南极仙翁"那一格,那么这样算是赢了,还是再从开始的"兔子"接下去算?

    To 明筠:骰仔點數超過壽星的位,嘛照原算贏!!毋是對頭佫來。嗯,汝講的這我進前bē記得交代。(by Lim)

  2. kenywu 2010-02-17 at 18:20:21 Reply

    請將葫蘆問寫入維基百科,將它列入中華文化遺產。

    kenywu: 是的,希望有人會去寫。而我這兒卻上不了維基百科。(by Lim)

發表迴響

你的電子郵件位址並不會被公開。 必要欄位標記為 *

*