頂幾日仔，hām台灣的朋友（fujtwkid、Taokara）佮福州的朋友（Gnudoyng） 佇 MSN 頂頭 咧 練仙khà-kho̍k，有講着「起凊瘼」（普通話：蕁麻疹）即个語詞。當時，fujtwkid問逐个儂，敢捌聽過”khí chhìn-mo·h”（起凊瘼）即句話？對我來講，我頭一擺聽着即个語詞是因為臺灣電視有一支廣告注死講著這，路尾我嘛表示講，略仔（lio̍h-á） 會記得有一个蹛佇中國福建晉江市（泉州轄區）的朋友kán-ná捌kiau我講過in晉江在地oân-á有即款的講法。當時，我想規晡久，確定家己 khêng-si̍t毋捌聽過廈門儂抑是漳州儂講即句話，choâⁿ 實實kā in講「普通時仔，我毋捌聽過，不而過，這無代表講閩南自本無即款講法。」道理真簡單，閩南語博大精深，ah照我即陣的道行（tō-hēng）， khiám-chhái 十份 猶 捌無 一份濟。這是真平常的代誌。

其實，逐个攏嘛giâu疑giâu疑，想講即个語詞敢會是按日語來的？也着是講，hoān-sè是日語借詞濫摻佇臺灣話裡底，只不過讀音有所變化niā- niā？不而過，giâu疑 hoân giâu疑，無 chhē着 真拄真 的證據，逐个 講話 攏 毋敢 傷 斬截（chám-choe̍h）。

Taokara兄，是 一个 誠 有心 佫 頂真 的 儂，隨講卜去掀辭典做比對。無偌久了後，又佫隨「拼倒轉來」，kā眾儂報告講 伊按《台/華辭典》查着一寡條目：

• 凊瘼（chhìn-mo·h）：蕁麻疹；
• 凊瘼呐（chhìn-mo·h-nah）：蕁麻疹；
• 凊呐（chhìn-nah）：風疹塊/蕁麻疹；
• 風瘤（hong-liû）：蕁麻疹；
• 風瘼（hong-mo·h）：蕁麻疹；
• 風疹塊（hong-chìn-tè）：蕁麻疹。

……

眾儂攏會捌日語，獨獨chhun我一个無半撇的，佇 hia 咧 鴨仔聽雷。In講，日語是叫做「jinmashin／じんましん」，佫講，日語即个講法，hām咱儂話的「起凊瘼／khí chhìn-mo·h」、「起凊呐／khí chhìn-nah」，呼音攏無對同（tùi-tâng）。
儂講「lám-lám馬，嘛有一步踢」，雖罔in攏無kā我講日語的”jinmashin”漢字着愛安怎寫，不而過，我即 个日本話的青盲牛，oân-á 雄雄發現講”jinmashin”佮「蕁麻疹」的漢語拼音beh-oá beh-oá，照看應該着是「蕁麻疹」即三字……Orz……（我安呢講，毋知恁會笑kah落下骸bōe？ ）

總是，討論來討論去，代誌暫時猶無結果。半暝啊，逐个攏真thiám啊，就此散局，隨儂倒轉去佮眠床比平長。

隔轉日，天未光，fjutwkid的blog着已經翻新啊。網頁頂懸，量其約仔是安呢寫的：

「……皮膚科的教冊先生，講着wheal（風疹）的時陣，特別指出有的講台語的患者會講家己『khí-chhìn-mo·h』……卜請問，這『khí-chhìn-mo·h』，漢字是卜安怎來寫？」

「佮其別儂討論過後，已經有一寡初步的看法。假設這是按日語來的，iah毋佫 日語裡底ná像無『凊瘼』（原文寫做『凊膜）』的講法（辭典查日語，ná像kan-ta chhē著『jinmashin／じんましん／蕁麻疹』nā-niā）。所以，khiám-chhái是台灣儂按照日語的讀音，佫重新落去改造的。假使真 正是安呢來講，這敢算是『本字』？……」

「設使頂頭的講法成立，nā安呢，有可能是ùi日語”jinmashin”的讀音轉做台灣音”chhìn-mo·h”。」

「這掠外，佇《臺日大辭典》嘛有查着”chhìn-mo·h”，不而過，佇hia soah kan-ta 看着假名”ちんも”(chinmo)，添注『蕁麻疹』。所以，這嘛有可能是台語詞。」

「Ah nā 照廈門的網友佇咧介紹講，伊佇廈（Hā）、漳（Chiang）、泉（Choân）所在，ná像攏毋捌聽儂講過這，但是毋敢咬定一定無。尾仔，伊有佫講 kán-ná捌聽一个晉江的朋友講 in 晉江oân-á有即款的講法，但是具體有抑無，猶原是毋敢確定。……所以，照看，真有可能是臺灣土産的，ah nā根頭，無的確真正是外國語來的。」

……

「tknetlll（儂名）來報講 《廈門方言辭典》寫講：

• 凊瘼凹（chhìn-mo̍·h-nah）：蕁麻疹；
• 風瘼（hong-mo̍·h）：蕁麻疹；
• 風瘤（hong-lâu）：蕁麻疹。

……」

fujtwkid即段文字，我斟酌kā讀幾落遍，soah疑問愈來愈濟，心肝頭即个「死結」（sí-kat）nā無tháu開，實在不止艱苦。我決定寫電子批請教廈門大學的周長楫教授（周教授着是《廈門方言辭典》的作者）。周教授回批的速度真正緊kah會驚倒儂！三點鍾bōe-tīⁿ，伊着隨回倒轉啊。伊的回批真短，kan-ta一句話。所講的，嘛佮《廈方典》記載的 sio-siâng，只是強調講：

「我做过调查，普通话的‘荨麻疹’厦门有人叫做‘凊膜凹’（chhìn-mo̍·h-nah），也有人叫做‘风膜 hong-mo̍·h’，吗有人号做‘风瘤hong-lâu’，拢会用讲着是啦。我想，应该不是对日本话来的。」

周教授強調講廈門本地確確實實有即款講法佇咧，是伊親身落去調查的。

安呢好！Ah毋佫，咱嘛發現講 廈門的講法，佮臺灣小可有增差。廈門講「chhìn-mo̍·h-nah」，臺灣講「chhìn-mo·h-nah」，聲調略仔無siâng。是講，平平 有講「風瘤」，廈門周教授講伊調查的結果是”hong-lâu”，ah毋佫，臺灣的《台/華辭典》soah寫做”hong-liû”，敢講兩爿講法真正無 sio-siâng？即个問題暫且按下，咱佫來講sòa落去。

tknetlll 佇 fujtwkid 的blog 回應講：

查幾落本字典，攏有看着用「凊」表示「冷」的涵義。不而過，kan-ta 廈門方言辭典有看着用「凊」字來組詞表示「蕁麻疹」，ah nā 其它的 着 攏無。

1、《廈門方言詞典》江蘇教育出版社
【凊膜凹】ts’in3-2 mɔ~ʔ8-3 na~ʔ4 = 【風膜】hɔŋ1-7 mɔ~ʔ8 = 【風 瘤】hɔŋ1-7 lau5 蕁麻疹
共款是周長楫教授所主編的《新加坡閩南話詞典》，嘛有收有chiah-ê語詞。

2、《雷州方言詞典》江蘇教育出版社
【風瘤】huaŋ1-6 lau5 風疹塊 (註：6為陽上調，調值33)
【瘤】lau5 瘤子，長瘡或受傷後留下的疤
【瘤墣】lau5 pɔk8 皮膚表面上長的疙瘩：哈儂面生瘤生墣(滿臉疙瘩)， 識何好驚(非常可怕)

3、《海口方言詞典》江蘇教育出版社
【風瘤】huaŋ1 lau5 蕁麻疹，皮膚病，症狀是局部皮膚突然成塊地紅腫 發癢 (註：海口話沒有變調現象)
4、《福州方言詞典》福建人民出版社
【風瘼】huŋ44 mo44 蕁麻疹 (註：福州話的44為第1聲的調值)
【饃】mo44 (1)疙瘩：頭碰腫蜀大～(頭上撞腫了個大疙瘩)。(2)凸起： 風蚊咬到～蜀大～(蚊子咬得凸起個大疙瘩)。/蜀碰蜀下就～崛起(碰一下 就凸起一塊)。(註：它真的寫「饃」)

5、《建甌方言詞典》江蘇教育出版社
【風瘼】xɔŋ1 mɔ1 (1)風疹：饁酒吹風會發～(喝了酒吹風會長風疹) (2) 蕁麻疹：發～(皮膚出現小疙瘩)
【瘼(另一個字為病字旁加”老”)】mɔ1(lɔ1) 皮膚上長起的小疙瘩：發風～
【發風瘼】puɛ2 xɔŋ1 mɔ1 長風疹，皮膚過敏長出小疙瘩 (2為上聲，調 值21)

感 謝tknetlll提供chiah-ni̍h濟，又佫有價值的參考資料。按即裡底，咱通（thang）瞭解講 雷州（算是閩南語系）、海南（算是閩南語系）攏有「風瘤」即个语詞，ah講法又佫hām廈門話siâng款，差不攏是念「風lâu」，毋念「風liû」。 毋知影，台灣民間是念做”hong-liû”，抑是”hong-lâu”，抑是兩款講法攏有？

佫來，毋管是廈門、臺灣、福州（閩東語系）、建甌（閩北語系），攏有即个「風瘼／風膜」的講法，所以，照看，這是閩語本底着有的，毋是按外國語來的。

為着卜查清楚「凊瘼」、「起凊瘼」、「凊nah」、「起凊nah」chiah-ê有帶「凊」字，表示「蕁麻疹」的語詞，到底是毋是外來語借詞，某儂我專工 撽電話轉去厝兮的問阮阿母（阿母講龍海話（漳州話），毋捌字）。問的時陣，有講究，頂頭排出來的hiah-ê語詞攏無對阿母來講起，只是問伊「食某物一項 物件了後，ná像皮膚過敏的款，這是安怎啦？」，阿母倒問講「會癢bē？有一niah 一naih無？」我應講「會癢，有一niah 一naih」。阿母佫問講「是毋是拄現giâ起來的 hit 款？」我隨喙應伊講「是啦」。阿母choâⁿ 講 即款症頭 號做「起凊naih」。講真正的，我當時聽了後，歡喜kah phut-phut-tiô！真正是咱在地的福建話，毋是 外國話 neh！

佇阮龍海腔裡底，”naih”的意思是「皮肉有生hit-lō一粒一粒的」，比論講「予蠓叮一naih」（普通話：被蚊子咬一个皰）。廈門話叫做”nah”。

所以，講到chia，應該會使講是 水清魚獻（chúi-chheng hî-hiàn）囉。真明顯：

1. 「凊nah」／「凊naih」／「凊瘼」，是名詞，本底的意思攏是「風疹塊」（普通話）。
2. 「風瘼」，是「風診」（普通話）的意思。
3. 「起凊nah」／「起凊naih」／「起凊瘼」，意思是「得了風疹」（普通話），也著是北方民間土話所講的「蕁麻疹」。

Limkianhui / 2006.4.17

【補記】（2006年11月13號）

頂一暫仔，又佫瞭解著一寡可靠的信息。補充記錄如下：

1、「起凊nah」/「起凊naih」，廈門集美區（一種同安腔）講號做「著凊loah」（tioh-chhìn-loah）。

佇集美、同安即角勢，有講做「予蠓叮一loah」。即个「loah」字，著是佮「著凊loah」的「loah」共一字，意思是「皰」。

2、「予蠓叮一loah」，龍海話有講「予蠓叮一naih」，嘛有講「予蠓叮一lâu」。

所以，咱nā將「風瘤」佮「予蠓叮一lâu」做比對，咱著隨知影講這其實是共一个字，意思共款是「皰」。

Tagged: 稽考