鹭水芗南－閩南語部落

漳泉話，無論漳州抑是泉州、同安、廈門，攏有咧講「siong-tiōng（重）」、「siong-pún（本）」。彼字，學界有儂寫做「傷」，是大錯誤，全全無顧著漳州音。彼字siong，無論漳、泉，攏唸siong，斷斷毋是「傷」。照我愚見，拍算是「嵩」字則對同。「嵩」在佇古漢語，表示「山大、懸、雄壯」的形。

嵩,高也。——《爾雅·釋詁》
山大而高曰嵩。——《釋名·釋山》

漳泉話的「siong」是表示「程度的大、厲害」。

福建廈門市海滄區（Hái-chhng），有一个地號名，叫做「嵩嶼（Seng-sū）」，彼字「嵩」雖然讀白話音，不而過，彼原底的意思正正「真大的海嶼」。

普通話所講的「八哥」，漳州話、廈門話講ka-lēng；同安話講ka-nāi；泉州有講ka-nūi。照進前儂所查考，佮當今家己所查，得著「鵁閵」。進前有儂寫講是「鵁鴒」、「加令」……彼攏是取近音字，無科學憑據通講。取「鵁閵」的理由是：

1、鵁：「唐韻》古肴切《集韻》《正韻》居肴切，音交。」閩南白話音唸做ka，即點無破拍，會通。
2、閵：「《廣韻》閵鵲，鳥名。《說文》閵似雊鵒而黃。……又《集韻》郞甸切，音練。義同。」即句話意思是講：閵鵲即種鳥，是一種佮鴝鵒相親像的鳥。雊鵒，在咱查考，照講是「鴝鵒」即兩字筆誤。佫，閵字，「《集韻》郞甸切，音練」，這白話音唸出來是：漳音lēng；同安音nāi；泉州音nūi。正正是ka-lēng/ka-nāi/ka-nūi的本字啦。

閩南語所講的phàⁿ-phu̍h、hàm-phu̍h的後壁字，是「浡」。按康熙字典記：

「浡，《廣韻》《韻會》《正韻》蒲沒切《集韻》薄沒切……又滂浡，憤鬱貌。《馮衍·顯志賦》氣滂浡而雲披。又《玉篇》渾也。渾，《老子·道德經》渾兮其若濁。又大也。……又《揚子·方言》渾，盛也。《註》們渾，肥滿也。」

所以，頂頭兩个詞通寫做「冇浡」、「譀浡」。即兩个詞意思是講儂生做大箍把，總是軟肉軟肉，無tēng-tauh(漳：tēng-táu)。

當今漳州話（漳北）內中，有一寡早期官話借詞。比論講，佇阮海澄話內中，我會記得有：
1、眼羨：iān-sián，意思是目孔赤、目赤。例句：看儂趁大錢，家己無才調趁，佇咧怨妒佮眼羨。
2、做榜樣：chò póng-iāng，意思是普通話的「擺擺樣子，做做樣子」，擐籃仔假燒金。例句：汝看伊揭鋤頭咧掘畻塗，掠做伊有心鬥相共，其實伊哪有真心咧做，不過是咧做榜樣的但定（nā-niā）。
3、高梁：kau-liâng，意思是「高梁酒」，即个詞佇金門、同安、廈門攏時行。例句：高梁較厚，毋好一氣啉傷濟。
4、名堂：bêng-thâng，意思是普通話的「花樣」、「名堂」，閩南話有講「齣頭」。例句：伊的儂真狡詐，毋知佫咧變啥名堂，咱著較張持咧。
5、洋相：iāng-siàng，意思「落氣」、「失體面」。例句：伊昨昏食酒醉，話亂亂講，佇眾儂面頭前出洋相。
6、不像樣：put-siāng-iāng，意思是「毋是款」、「歹體」。例句：彼个儂歹到絕去，佮平常儂無親像，毋通thīn彼號不像樣。
7、輕俏：chhìn-chhiáu，意思是性地囡仔性，做代誌勿會穩，浮浮。例句：彼个囡仔輕俏俏、嘻嘻嘩嘩（hi-hi-hōa-hōa），規日想chhit-thô，無想講著來注心讀冊。
…………
即款早期官話借詞，雖然總的葩數無蓋濟，年久月深，有的直直失落去，有的暫時猶佫佇咧。我本儂所知有限，無法度全部列明。在我土想，遮个早期官話來的借詞，拍算是按當時舊社會的戲劇佮正字班（私塾）來的。當時閩南所在有正音戲、北管即種戲，有正音班咧教學官話。遮个早期官話借詞，往往有地方性，有的詞較湠較闊，有的乾焦某所在有，別所在無。