原作：邋遢旅人（普通話）
編譯：limkianhui（閩南語）

頭序

本文是照作者真實的經歷來寫的紀實小說（siáu-soat），是一个關係海上血汗工場的故事。為著保全個人私奇（su-khia/sai-khia），船員有用假名，ah若故事內中所講的——hiah-ê船頂的代誌，攏總是正實（chiaⁿ-si̍t）的；船務代理公司佮漁業公司有的嘛用假名。

本文徛算「內在較贏過文字」，kan-kan-á愛卜看「YY型小說」的儂，拍算勿愛看較勿會gīn。

……

2010年3月31號暗。佇大大間的冷藏倉（léng-chông-chhng）ni̍h，林達拚kah大氣喘勿會離。一四界攏chiâu凍櫃鎮滇滇（tīⁿ-tīⁿ），空氣勿會啥tháu，儂咧行的巷路狹覕覕（e̍h-bih-bih），拄好兩个儂thèng好相閃身niā，所在的確真熻（hip）真偓促（ak-chak）。林達雖然一直透舞無停，拚kah滿身重汗，ah毋過，骹底soah猶原凍吱吱。著按呢，汗ná流，ná咧搬魷魚仔凍，大大件，一件soà一件。溫度下（kē）到tih-beh倚零度啊，驚了小可歇停（hioh-thêng）一下，khiám-chhái著愛凍死蹛即个毋是儂蹛的所在。當（taⁿ）已經相連soà操卜二十六點鐘啊，邊仔hiah-ê漁工，敢（káⁿ）是操傷久，儂咧悿（thiám），接載勿會牢（tiâu）啊，攏瘟蹛凍櫃仔邊咧tuh龜。林達毋敢，伊驚了一下歇，身軀若冷落來，汗水食入腹，khiám-chhái會染著風寒，破病感冒。

二伙又佫蹛咧倉仔口hia哭父：「幹恁娘！骹手chiah趖！是卜摸到底噹時啦？我看恁是無想卜冗早（liōng-chá）做做予煞，通歇睏……較緊咧啦！」講拄煞，隨看著印尼籍的漁工阿D noà佇凍櫃仔頂咧歇喘，自按呢哀一聲，一支咧鉤凍櫃的尖鉤仔，雄雄對阿D出力 liān過去，拄好摃著伊的頭額（thâu-hia̍h）！的確真準，真有板！是鉤仔槌，毋是鉤仔尖，若無，拍算阿D的目睭仁chiàng時已經徒位啊。「幹恁娘！乞食胚，佫咧mô͘-hui啊！較停汝勿會使歇睏！」

阿D驚kah ka̍uh-ka̍uh-chhoah，sī-soā peh起來，頭殼摸摸咧，好佳哉無流血，趕緊佫倚過去操拚。林達自目尾仔小可共伊瞭（lió），看伊目箍紅紅，目屎卜滴卜滴。

林達做伊kho̍k-kho̍k拚，舞kah勿會輸ná一隻牛。在伊拍算，是按怎咱著來即款所在？做即號空課（khang-khè）？做一个苦力（ku-lí），予儂按呢佇咧蹧蹋、凌治？

第一章 我嘛卜來去行洋（kiâⁿ-iûⁿ）

2009年10月1號下晡，福建南安市水頭鎮，佇一條大大條的街仔路ni̍h，林達佇hia咧四界（sì-kè）行，四界趖（sô）。林達來水頭兩禮外拜啊，中間攏無啥敢出門，今仔日想講罔出來tháu-lāng一下，食一ê仔空氣。近來做生理是十藝九不成（si̍p-gē kiú put-sêng），見做見敗，了kah鼻卜平去- -毋打緊啊，佫惹一身是非。好佳哉林達生成（seⁿ-sêng）自底較樂觀，家己較會曉開破，總的來講，即擺踏thu̍t失手，雖然濟少有差啦，不而過，嘛無講自按呢soah來失志chhē落去。Kiám-chhái驚講予「亻因」揣著，伊毋敢徛蹛厝ni̍h，家己一儂走來到水頭即个所在覕起來。水頭離厝 ni̍h無通遠，驚予儂認出來，平常時仔若無創啥貨，攏罕得出門。卜像今仔日按呢出來遨街（khô-ke），徛算是頭一擺。

水頭是閩南出名的古鎮，徛算是福建經濟較發達的所在，綜合經濟實力蹛「福建省50強鄉鎮」通排第八名。「水頭」意思是講chia是水路貨運聚集、交關接接（chip-chiap）的所在，在佇古早時陣通講是閩南即tah要緊的港骹。水頭雖然是一个鄉鎮的級聲niā，ah毋過soah並（phēng）南安市內佫較鬧熱，佫較外氣（goā-khùi）。因為chia是中國大陸上出名的石材中心，即tah的建材市場毋kan-nā佇中國，佇規圇个（kui-nn̂g-ê）亞太地區攏真有名。著是按呢，水頭鎮毋chiah予儂呵咾（o-ló）做中國石材城。
……

秋天尾仔，日頭較無hiah旺（āng）啊，日頭光曜（chhiō）蹛儂身軀ni̍h，燒烙燒烙（sio-lō），不止爽快。看勢，出來行行，tháu-lāng tháu-lāng咧，真正bē bái，定定鬱佇厝間仔內，無定著好好儂嘛鬱kah破病。看過路儂過來過去，路頂汽車述來述去，林達一時soah勿會記咧家己滿身的煩惱，感覺心頭加足清閒，加足通弄（thang-lāng），加足滿足的。一路行來，有攤販佮買主teh喝（hoah）價chhiâu價；有藥妝店的芳水味嬌kah嗆（chhèng）破鼻；有電器城的音樂聲放kah哢哢吼（lòng-lòng-háu），有沿路汽車的喇叭ji̍h kah吱吱霆（ki-ki-tân），有尖尖的樓仔厝懸kah強卜抵（tú）著天……滿四界鬧熱chhih-chhah，盡展出即个南國城鎮的隆盛（liông-sēng）佮興旺。

街仔路ni̍h，在地腔、外江話插雜（chhap-cha̍p）交接；滿街路小車、骹踏車、噗噗車（phok-phok-chhia）飛來鑽去…… 在林達拍算，由在chiah-ê載客的噗噗車親像無頭胡蠅（hô͘-sîn）按呢chhi̍h-chhi̍h-choàⁿ、kho̍k-kho̍k- nǹg，敢毋是足危險的？是講，若無即號物件，嘛佫勿會使得，出門嘛加真無利便，的確是矛盾啊。徛蹛天橋骹，目睭擘開，面頭前看有的，彼號（hit- lō）一二十棧懸、數十棧懸的樓仔厝濟kah窒倒街（that-tó-ke）。這不過是一个鄉鎮niā，soah起chiah-ni̍h濟的高級厝宅，房價穩當早著起kah無臭無siâu囉！毋過（m̄-kú），有聽儂講 來teh徛的soah無到幾成nā-niā。敢（káⁿ）是為著石材工場污染了傷過頭的因端（in-toaⁿ）！雖然chiah-ê佮林達無底代，毋過伊總是感覺講，彼住宅（chū-te̍h）若是無夠儂買，ah資金轉倒（tńg-tò）著無通hiah猛切（mé-chhè），萬一若佫拄著厝價行情teh 跋，按呢hiah-ê地產商是卜按怎？厝價嘛總無按呢直直起勿會煞，敢會是這水頭鎮的房地產行業已經行到「產能過剩（koè-sīn）」的坎站啊？……林達著是按呢愛烏白想東想西，伊拍算家己即个毛病的確著改啊。

林達自按呢四界行，四界bāi，規路全電火柱（thiāu）；電線、電纜線牽kah密密啁啁（ba̍t-ba̍t-chiuh-chiuh），親像 ná蜘蛛teh經網（keⁿ-bāng）。公車站台、電柱仔桿、電影院的坦邊牆（thán-piⁿ-chhiûⁿ）、連公共廁所的小便池，攏全去予 hiah-ê廣告單、宣傳單貼（tah）kah滿滿是，有賣藥的，有治病的，有辦證的，嘛有招工的，佫有彼號hông倩刣儂的……真正花漉涸（hoe- lo̍k-kho̍k），挐chhiáng-chhiáng。林達有一步gâu，看過的物件，過眼不再（kò gán put-chài）。雖然影一目niā，soah去看著一條誠趣味的信息，寫講「行橫洋的卜招漁工，免費訓練，月薪五千到一萬……聯繫儂：李小姐、林先生，聯繫電話：138********……」看勢，薪水卻勿會少，總是略仔龜怪龜怪，當（taⁿ）佇閩南chia工場做工，凖若無一步手工藝的，一月日上濟嘛chiah趁咧千五、兩千，ah行洋若正經hiah好趁，逐个早著相爭kah半死啊敢毋是？無道理啊！

做頭（choè-thâu），林達也無咧偌真張（chin-chiuⁿ），看了著隨斡（oat）走，做伊寬仔（khoaⁿ-á）佫行。伊自按呢佇 hia踅（se̍h）規下晡，凖ná咧拍硌硞（phah-lo̍k-kho̍k），雙骹磨kah卜胖泡（phòng-phā），全全也無bā著啥好空的。到卜暗仔，姑將無奈chiah斡倒轉來招待所ni̍h。倒來到tè，開電腦搜揣（chhiau-chhoē）「外洋漁工」相關信息，加減看一輒久仔（chi̍t-tiap-kú-á），著佫款落去chhit-thô電遊，了，佫soà落去看在線的電影……一直透sńg kah月娘浮上山chiah收煞。伊真正悿（thiám）啊，雙目tiam kah thíⁿ 勿會開，鬢邊佫sia̍k-sia̍k叫，規个頭殼強強卜烏暗眩去。雖然siān kah直直hah-hī，正經倒落去床眠soah睏勿會去，目睭目金金，儂siong-tiōng，想著講毋知卜佫覕到底時，規日掩掩挹挹（ng-ng- iap-iap），毋敢見儂，真正足艱苦的，寧可走來去一个遠遠，無儂揣會著的所在，上無嘛毋免像現此時按呢規日teh做涵空龜（âm-khang- khu），連出門著愛佫揣日。「Ah無…規氣趁儂來去行船走橫洋！嘛較免規日teh活食死坐，猶佫有薪金通領，罔來去試看māi，罔度罔過日嘛好，加減趁，較勿會散。」

「好，自按呢決定啊，來去行船做船工！」林達the佇床頂出力哀一聲，彼是卜講予伊家己聽的。伊開始認真teh想下晡時佇街仔路彼个138開頭的電話號碼，用手機仔khà倒過。

「喂…汝好，我佇街路邊仔有看著講…恁公司講卜招漁工，ah即陣猶佫有咧招無？」

聽著電話彼爿有一个諸母聲應講：「汝好…Ah汝佇佗落（toh-lo̍h）看著的消息？」

「街路邊仔啦。」

「嗯…借問汝佇佗落？」

林達略仔（lio̍h-á）感覺怪怪，應講「佇水頭啦。」

「哦，有啦，即陣猶佫有咧招啦。」

「Ah一月日薪水偌濟？」

「看汝工作的經驗啦，毋捌做的差不多五千仔骹；ah若像儂有經驗的，嘛有領一兩萬銀的。」

林達佫問講：「Ah恁公司佇佗落啦？」

「廈門啦，汝長青車站落車，換坐*路車到**站落車了後，佫行過去……，若勿會清楚，時到chiah佫敲（khà）電話來問。汝明仔再（bîn-á-chài）著會用得（ē-ēng-tit）來啊。」

「Ah…我著紥（chah）啥物件毋免？」

「身份證原件佮複印件，佮4張一吋的像片。哦…著啦，阮公司會共恁chiah-ê船員買保險，所以，恁著先交保險費600箍……」

聽著講，著佫交錢，林達sī-soā磕（khap）電話。即款流擺（lâu-pái），時機bái-bái啊，儂講「歹年冬，厚痟儂」，滿四界全全出一寡老仔（láu-á）、黜仔（lut-á），專門咧kâng諞錢（pián-chîⁿ），咧kâng賺食（choán-chia̍h）。做工仔儂，出門佇外口，若無學較目色巧（ba̍k-sek-khá）咧，凖若hông騙去赴死，彼是較衰ná膦鳥咧。

即通電話敲了真正無中用（bô-tóng-ēng），有敲ná無敲咧。電話磕sak了後，林達著無佫去想彼層代誌啊，做伊上網佫看電影。看kah腹肚枵，chhìn-chhái煠（sa̍h）寡蕹菜箬（èng-chhài-hio̍h）、炒一碗北蔥，止饑凖拄煞。孝飽，著佫去「貼吧」啦、論壇啦，四界khô-khô咧，有帖回帖，無帖聽儂畫虎膦（oē-hó͘-lān）。即款的生活，實在無啥意義。下晡行hiah久，明明足悿的，照講真好睏 chiah著，哪知影鬼拍著，soah睏勿會ka-choē！有影真反常都著。

佇咧眠床頂反（péng）過來反過去，林達睏攏勿會去，較想也是想著頭拄chiah佇網頂揣著的消息。網頂大概是講，事實做漁工勿會啥偌悿，較濟是因為想厝內，尤其行外洋的勿會輸咧關監……kiám-chhái食食（chia̍h-si̍t）嘛無通盡好，船頂kan-ta魚仔通食niā，佫是彼號（hit-lō）上粗俗的魚仔。嘛有儂寫講，漁工ná像是一陣「水和尚」，不止艱苦，彼毋是講身軀的艱苦，彼是心肝內的艱苦……毋過，薪水卻有並（phēng）岸頂較懸，總是，無像宣傳單寫的hiah譀（hàm）。不而過，hiah-ê攏是網頂儂咧傳、咧會（hoē）的，到底有影無影，當（taⁿ）也無親身去著，鬼會知！儂講「水盤會蝕（si̍h），話盤會濟」，聽儂講，較輸家己去做。

七想八想，想想chiah-ê有的無的，五四三的，佫較勿會睏得。在林達拍算，想想hiah濟嘛無效，無的確出去行船，走到天邊海角去，亻因著真正揣我無啊，聽候（thèng-thāu）風頭若過，chiah佫倒來。按呢嘛勿會bái敢毋是？事實，林達猶佫有別項拍算佇咧。伊自細仔著眏望（ǹg- bāng）卜去海ni̍h，會通佮魚仔共款蹛海ni̍h四界泅，佮小說內底定定咧講的老水手共款佇水ni̍h拍phún，kiau大風大湧博（poa̍h）輸贏。細漢時仔，因為一條號做《水手》的歌，林達有一暫仔（chi̍t-chām-á）直直想講kan-ta水手chiah算是正港的 ta-po͘囝。網路遊戲《大航海時代》二代佮四代，猶佫電影《加勒比海賊》三部曲，予林達對海洋感覺加真稀奇，加真奧妙。

「我決定啊，我卜來去行洋！」林達the蹛眠床頂佫一擺大聲哀。拍算自囡仔著tok-tok咧想這，當（taⁿ）的確是伊卜圓仙夢（oân-sian-bāng），卜實現理想的好時陣囉！林達想著講進前捌佇網頂看著一間號做「廈門添運」的船務公司，著罔敲電話過去問。

「汝好，敢是廈門添運船務有限公司？我佇網頂有看著恁公司卜招工的告示，當（taⁿ）猶佫有咧招無？」

彼爿共款嘛是一个諸母過來聽，「汝好，即mái猶有欠船員，ah咱佗落咧？」

「福建泉州啦，ah恁月月薪水開偌濟？攏佗落的船咧？」

「汝較早捌做過毋捌？」

「無neh…」

「無哦。無…一月日三百五…是美金啦，包食包蹛。船攏台灣船。」

林達a-kah有兩千四，比進前彼間「黜仔店（lut-á-tiám）」卻有少盡濟，總是，心肝頭soah加較安心。「我會hiáng泅…嘛勿會眩車眩船，坐飛機嘛勿會gông啦。」

「勿會曉泅嘛毋畏（m̄-ùi），會曉泅佫勿會眩船，按呢佫較好。盡濟船員拄上船攏足gâu眩的。Ah汝即陣有法通去網吧無？咱開視頻見面談一下。」

「啊？哪會著佫視頻？」林達小可昂愕昂愕（gông-ngia̍h）。

「無啦…Ah都面試啦，阮總是著瞭解汝生做肥抑sán，懸抑矮啊，著無？」

「我明仔日直透去恁公司啦，會使勿會？按呢面對面講，毋是佫較好？」

「嘛好啦，阮公司佇廈門禾祥東路***號****室。汝長青汽車站落車，換坐公交車到火車站，了後……」

「Hia我往過捌去過，廈門我蹛幾若年啊。Ah我問一下hò͘ⁿ，我著紥啥物件毋免？著佫交一條啥物幾百箍的…彼號（hit-lō）號做『保險費』毋免？」

電話彼爿頓蹬（tùn-teⁿ）四五秒鐘久，「哦…毋免啦，儂來著好啊，身份證著紥來。」

「按呢好。多謝汝…bye-bye。」林達手機仔ji̍h sak，其實伊毋是咧計較彼幾百箍小錢，kan-ta按呢著通看出對方穩當是卜諞錢的較濟。細膩無蝕本（sè-jī bô si̍h-pún），即陣的社會老仔（láu-á）的確濟，有組織有紀律的黜仔店嘛毋是無。

電話講煞無偌久，林達真緊著睏ka-choē啊。彼暗，伊夢著一寡龜怪的代誌。伊夢見家己變做水手，拄著強摃賊（kiông-kòng- chha̍t），hông拍kah青盲叮噹（chheⁿ-mê tin-tang），骹瘸手折（kha khoê chhiú chi̍h），毋過soah全全勿會疼……嘛毋知按怎，臨噹時（liâm-tong-sî）soah換伊變做海賊，liâm-mi佮官兵相戰，liâm- mi佫佮無kāng黨的海賊比劍……路尾，船歹運去拄著大風湧，挵kah哩哩落落（li-li-lak-lak）、mi-mi-mauh-mauh，船 hām所有所無的傢俬做一下沉沉落去……林達佇海ni̍h泅足久足久，soah也無kek死……頭chhih落去看，咦？家己噹時仔soah變做一隻徛鵝（khiā-gô）！哈哈，真正是莫名其妙的一个怪夢……

第二章 簽合同（ha̍p-tâng）

2009年10月16號早起，林達搭車來廈門，揣著禾祥東路***號。哭枵！哪會soah是商品房？敢會記毋著去？林達趕緊kā筆記簿撏（jîm）出來對，嗯，ah tō有影即个地址，規欉好好——無剉（無錯）！怪死？！是講kah來啊，好bái嘛是著揣看māi，總無自按呢越頭佫倒轉去？林達佇hia厝前厝後，頂看下看，一時soah趖無路通入去。尾仔，終歸去摸著一扇電梯門，趕緊坐電梯peh起去，來到****號房間。門開著，林達探頭kā偷siam，內面的確是一間辦公廳，攏總有排兩tè辦公桌，chhāi兩台電腦……毋過，門喙口soah連招牌也無掛。

「借問…chia是添運船務公司喺（hèⁿ）？我是彼日敲電話講卜來應聘的啦，我叫做林達。」

「哦…入來入來…坐坐坐。喲！漢草佫bē bái哦！」即个講話的諸母，差不多二十五、六歲仔，掛目鏡，小可有畫淡妝，面形仔雖然無通真媠，毋過看起來徛算端麗端麗，古錐古錐。

「我今仔來chia，是想講卜加瞭解一寡較具體的情況。」

「嗯…好，汝先坐一下……小張啊，滾水thîn一杯來哦…」林達當（taⁿ）chiah看著邊仔猶佫一个諸母儂，年歲敢（káⁿ）有較加淡薄，拍算做文員的較濟。

「我是想講電話內三兩句話講較勿會清楚，毋chiah專工來看māi咧，想卜瞭解較清楚咧，嘛較安心啦……恁嘛知影，當（taⁿ）即號流擺，社會五花十色，有的假空講卜招船工，結尾無影無一跡……」

「坐啦，莫（bo̍h）細膩。哦…我姓胡，天運船務公司負責儂。」

「負責儂？按呢著是頭家哦？喲，看汝hiah少年，佫媠……噢，汝足勥（khiàng）的neh！」

「呵，汝佫誠gâu講話。」

「我講的攏實在的啦。」

「哈哈，毋kiau汝滾笑啊……著啦，ah汝有啥無瞭解的會使問我。」

「會使看一下仔恁公司的詳細情況勿會？我看恁門口也無掛牌……歹勢啦，我即个儂自底較細膩啦。」

「無啊，這也無啥，公司近來chiah改名，招牌摕去換……這著是阮公司一寡證明文件。」

林達摕過來斟酌看，soah揣著有一字寫毋著去，「是講…恁這文件哪會soah有錯別字啦？」

胡女士隨解說（kái-soeh）講彼是啥物仔原因，林達也無愛計較即號代誌，著問伊一寡kiau船頂有關係的情況。

「著啦，上船著紥啥物件？寒天衫著紥毋免？」

「上船啥物攏毋免紥，隨身替換穿的紥好勢著好。魷魚船來講啊，計嘛是去南半球阿根廷hia，hia季節拄好kiau咱北半球掠倒吊（lia̍h- tò-tiàu），當（taⁿ）現此時亻因是熱天，也勿會寒啦……ah無，船頂嘛有稸（hak）暖氣……衫褲免紥傷濟啦，上船會佫分，免煩惱啦。若魷魚船，合同是簽一年。彼日電話內汝有講著保險費的代誌，彼免恁出啦，船員保險，公司統一辦。汝護照辦好，體檢好，家己thèng好去廣州報到（pò- tò）。出境費兩百四著家己出，錢先予我，卜出境的時陣通交。」

「船長佮管理人員攏台灣儂毋？」

「船長台灣儂，管事攏大陸的，船員五湖四海chiâu-chiâu有。汝倒去了後趕緊去辦護照，辦好hām體檢單做一下寄來予我，我kā恁統一辦簽證。體檢的項目愛有乙肝兩對半、心電圖佮用B超驗看有盲腸炎無。」

「做工會悿勿會？」

「彼攏用機器咧掠魚仔，悿是勿會悿啦。毋過，有時仔魚若咧厚，hoān-tú-sè著相連soà操泛泛（hàm-hàm）久，有的船員kā我講，捌拚kah三暝三日無歇睏，汝…敢食會消？」

「啊？…嗯…會啦，少年年，食苦當做食補，哪會講勿會堪得啦，著無？」林達拍算彼無礙著。

「按呢好，我合同予汝看māi咧，若無意見，小等一下簽簽咧，順soà紥一份倒去。」

「好，我看māi咧。」林達摕著合同，一條仔一條，用心慢慢仔看。

外派漁工合作協議書

甲方：廈門天運船務代理有限公司（林達咧想，真正有改，chhām伊進前佇網頂看著的名號有影無共款。）

乙方： 身份證號：

第一條：漁工的派遣

1、甲方受台灣漁業公司委託，聘用乙方為漁工赴甲方境外客戶（以下簡稱雇主）登遠洋漁船工作。
【解說】：甲方予台灣漁業公司央（iang），倩（chhiàⁿ）乙方做漁工，去甲方境外客戶（下底簡省叫做“雇主”）的漁船頂頭做空課。

2、漁工聘用期限魷釣船為12個月，甲方可以根據船舶作業情況，適當延長或縮短聘用期限。漁工的服務期限自離開中國口岸起，至下船之日止。
【解說】：倩工的期限，魷釣船是12月日，甲方會使照漁船作穡（choh-si̍t）的實際情況，適當延長抑者（iah-chiá）縮短倩工的期限。漁工的服務期限，自離開中國的港骹（káng-kha）算起，一直到kah離船為止。

第二條：雙方責任

一、甲方責任與義務
【解說】：甲方的責任佮義務

1、負責提供適航船舶，在約定期內安排乙方出境，到雇主漁船從事海上捕魚工作。承擔漁工自出境口岸至國外工作地點和履約期滿回國的國際旅行住宿等費用。
【解說】：負責提供妥當的船隻（chûn-chiah），在佇（chāi-tī）雙方約定期內安排乙方出境，去雇主漁船仔頂出海討掠。甲方負擔的費用包括：漁工自出境的港骹到國外作穡的所在，即中間徛宿的所費；hām佮約期滿後轉來中國，中間客途徛宿的所費。
……

3、雇主及船長尊重漁工的人格、宗教信仰和生活習慣，保證漁工人身安全及合法權益不受侵犯，甲方和雇主及船上管理管事不得侮辱、毆打漁工。如因毆打引起漁工傷殘或其他嚴重後果，甲方應承擔醫療費和相關的經濟責任，但如漁工使用刀械有危害其他漁工人身安全時例外，船長可依法做必要的處置。
【解說】：雇主佮船長，著尊重漁工的人格、宗教信仰佮生活氣習，保證漁工的人身安全佮合法權益毋受侵犯，甲方佮雇主，佮船頂的管事勿會使侮辱、嘛勿會使拍漁工。若是拍漁工，致到漁工著傷、破相抑者其它嚴重後果，甲方著擔當醫藥費佮有關的經濟責任，不而過，設使漁工用刀仔抑者其它利器（lāi-khì）妨害著其他漁工人身安全的時陣，船長會使依照法律做必要的處置。

4、保證漁工享受與同船同等人員的工作條件和生活待遇，不得要求漁工從事危害人身安全與不健康的工作。
【解說】：保證漁工會當享受著kiau共隻船、共號人員sio-siâng的工作條件佮生活福利，勿會使硬迫漁工去做一寡危險（hûi-hiám）抑者是對身體健康不利的空課。
……

二、乙方責任與義務
【解說】：乙方的責任佮義務

1、乙方應繳交甲方1,500元人民幣辦理船員證費用，從第一季工資中扣除。
【解說】：乙方著交千五箍人民幣予甲方去辦船員證，錢對第一季度的薪水ni̍h扣。

2、乙方應該按甲方要求遵守當地法律、法規、遵守合同條款和甲方的規定，服從船長指揮，遵守船上的規章制度，遵守捕漁地區的民俗習慣勤奮，勤奮工作。
【解說】：乙方著照甲方的要求遵守當地法律、法規、遵守合同條款佮甲方的約束，聽船長指揮，遵守船頂的定規，遵守去討掠彼所在的民俗氣習，搰力（kut-la̍t）做工。

……

4、乙方需向甲方提供護照原件、身份證複印件、兩寸白底彩照四張，由甲方辦理相關登船手續。
【解說】：乙方著向甲方提供護照原件、身份證複印件、四張兩吋白底彩色的像片，通予甲方去辦登船手續。

第三條：漁工工資和工作時間
【解說】：漁工的薪水佮工作時間

1、乙方的基本工資為月薪350美元，（不滿一月的按照實際天數計算，日工資為月薪的三十分之一），漁工工資的計算，自受聘漁工從登船之日起至離船之日止。但違約者，從船東通知漁工停止履約之日起停發合同工資。
【解說】：乙方月月基本薪水350箍美金，（未滿一月日的按實際日數算，日薪按月薪的三十分一算），計算漁工薪水，自漁工上船彼日算起，到kah離船彼日鏨止（chām-chí）。若有違約者，按船頭家通知漁工離職彼日起，著毋佫發薪水。）

2、漁工每月工資中的50美元在船上直接發給漁工本人，其餘工資300美元，由甲方按季度將漁工工資匯至乙方指定的銀行帳戶上，（甲方需扣押季度的工資作為履約保證金，在漁工履約合同期滿後全部支付給乙方，每個季度的工資應在工資到期後的一個月之內付清，以後每個季度工資結算依此類推。漁工履約期滿回國之日30個工作日內。甲方應向乙方支付全部應得工資。
【解說】：漁工月月薪水，有50箍美金直透佇船頂發予漁工本儂，賰的300箍美金，等kah一季度到，由甲方做一下匯過去漁工指定的銀行戶頭，（甲方卜扣押一季度的薪水做履約（lí-iok）保證金，履約合同期到著全部退還乙方，逐季度的薪水，勿會使超過一月日無發）。

3、船上除工資外，其他獎金及附加工資等由船長另外直接支付給乙方（不作基本工資）或匯給漁工家屬。
【解說】：船頂除去薪水以外，其它的獎金、附加補貼，由船長直透發予乙方（毋做基本薪水）抑者寄轉去漁工厝ni̍h。

4、根據漁業生產特殊性，海上作業的平均勞動時間，均照慣例由船長統一調度。乙方必須遵守船上所規定的作息時間，不得要求固定或特定的節假日。
【解說】：行船討掠無比別項，海頂作業平均勞動時間，攏著照慣例由船長統一安排。乙方著愛遵守船頂規定的作息時間，勿會使講卜歇假著卜歇，漁工無歇固定抑者特定的節假日。

第四條、漁工醫療、勞保福利和保險
【解說】：漁工醫病、勞保福利佮保險

1、甲方雇主向漁工提供食宿，並免費提供海上作業所需的裝備及勞動保護用品，但不包括個人的日常生活用品。
【解說】：甲方雇主包漁工食佮蹛，海頂討掠的設備佮勞保用品在漁工免費使用，毋包漁工個人生活用品。

……

3、甲方雇主向漁工免費提供醫療用品，漁工在受聘期間患職業病或因工受傷（原患有痼疾或個人因素造成傷害者除外），甲方及雇主應負責及時將其就近送往醫院治療，承擔所需醫療費用並付給傷者在治療期間的工資。
【解說】：甲方雇主免費包漁工醫療用品，漁工在佇倩工的中間著職業病抑者因工著傷（原底有著病抑者個人的原因造成傷害的，無算），甲方佮雇主著負責及時送醫治病，擔當醫藥費，治病中間薪水照發。
……

5、甲方為每個外派漁工在中國大陸境內投保人身意外傷亡險，保額為人民幣20萬元，乙方指定的保險賠償受益人：***身份證號為：
【解說】：甲方為外派漁工佇中國大陸境內投保「人身意外傷亡險」，保家銀是人民幣20萬，乙方指定的保險賠補受益儂：*** 身份證號：***

第五條：漁工的轉船、解聘及違約處理
【解說】：漁工轉船、解聘佮違約處理

一、漁工轉船

1、漁工在受聘期間，要服從船長的指揮和管理，並接受船東在必要時作出的將全體人員或部分人員轉船的安排。
【解說】：漁工在佇倩工中間，著聽船長指揮佮管理，船頭家若卜kā所有的漁工抑者一部分漁工轉船，漁工勿會使毋轉。

……

二、解聘：甲方和雇主不得單方面解僱乙方，但若乙方不能適應海上作業的，或不服從船長指揮的，或從事指定工作範圍以外的非正當活動的，或有其他犯罪行為的，或在外派期間潛逃（含跳船）甲方可給予解僱，以違約論處。
【解說】：解聘：甲方佮雇主勿會家己主張卜辭sak乙方，不而過，若乙方無法度做工，抑是毋聽指揮，抑是去做一寡合同外的無正當的代誌，抑是犯罪，抑是佇外派的時陣偷走（包括跳船），甲方會使解聘乙方，算乙方違約處理。

三、乙方在受聘期間，除職業病和工傷外，因本人不履行合同被解僱或者自己要求提前返回，應視為漁工違約，其經濟處理按照以下規定執行：
【解說】：乙方佇倩工的中間，除非著職業病抑是工傷，凡若本儂毋履約，抑是hông解聘，抑是家己講卜冗早轉去的，攏算漁工違約，經濟處理按照下底規定執行：

1、受聘時間在一年內，由乙方負責往返所產生的交通費用。
【解說】：倩用時間佇一年內的，來去的所費乙方家己出。

2、受聘魷釣船船員跑滿合同期後要求返回者，必須要等船隻停靠台灣基地。
【解說】：魷釣船倩用的船員，合同到期後卜轉去的，著愛等到船隻倚台灣基地chiah通轉去。

3、受聘漁工因本人行為染病（如性病、打架致傷等）而無法工作的，其醫療費及機票應由漁工本人承擔。
【解說】：漁工因為本儂的原因著病（比論講，著暗糝病（àm-sàm-pēⁿ）、相拍致病）無法度做工的，醫藥費kiau機票所費，漁工著家己擔當。

四、乙方合約未滿返回，須取得船長簽署的離船同意書，並電告甲方確認；若遇船長電告有漁工用暴力手段使其不得不簽署離船同意書，在此情況下，該漁工所取得的離船同意書視同無效，對當事漁工仍做違約處理。
【解說】：乙方合約未滿轉去，著先船長簽字（簽離船同意書），佫摃電予甲方確認；船長若講漁工用強硬的手段迫伊簽離船同意書的，按呢，即張簽字無效，算漁工違約。

五、凡合約未滿又無特殊情況（工傷、急病除外）要求返國者，需承擔出境與返國的交通費用。
【解說】：凡若（hoān-nā）合約未滿，佫無特殊情況（工傷，緊性病無算）卜轉國內的，著擔當出境佮路途中間的交通費。

六、凡漁工涉及下列事項一律以違約論處，遣回國，其往返機票由漁工承擔：
【解說】：凡若漁工有涉著下底事項的，一律算違約，送轉去，來去的機票由漁工擔當：

1、打架鬥毆、破壞公物、挑撥離間、煽動暴力行為，造成嚴重後果或損失。
【解說】：冤家相拍、損害公物、使鬼弄蛇（sái-kúi lāng-choâ）、使弄（sái-lōng）牽拖、哄（hōng）狗相咬，造成嚴重後果抑是損失。

2、消極怠工、屢教不改、態度不良或患有重大失職行為者。
【解說】：活食死坐、tìⁿ-chhiⁿ毋做、任講毋聽、態度不端抑者是重大失職的。

3、長期不適應船上生活，工作不能勝任者。
【解說】：長期勿會適應船頂生活，做空課無合規格的。

4、不按規定時間登船者，逃亡而被抓獲者。
【解說】：毋照規定上船的，偷走hông掠倒轉來的。

5、經常醉酒、參與販毒、吸毒、盜賣船方公物，惡意丟棄船方捕魚用具、魚貨等。
【解說】：不時食酒醉的、有賣毒、食毒、偷摕公物去賣的，刁工kā討掠的傢俬抑者是魚貨tàn-hìⁿ-ka̍k的。

第六條：合同的終止與爭議解決
【解說】：合同煞了（soah-liáu）、爭議解決

1、本合同在執行中發生的爭議，甲乙雙方應通過友好協商取得解決。當爭議不能通過友好協商解決時，應提交給雙方都同意的仲裁委員會進行仲裁；仲裁裁決是終結的，對雙方都有約束力，仲裁費由敗訴方承擔。
【解說】：合同執行中間起爭議，甲乙雙方著愛協和調解。無法度協和調解，著交予雙方攏有頕頭（tàm-thâu）的公親（較濟是「仲裁委員會」）來裁斷（chhâi-toàn）；裁斷結果永遠有效，雙方攏著受伊約束，裁決的所費，輸的儂去當（tng）。

2、在合同履行期內，如有發生戰爭、自然災害或政府政策變化等不可抗力因素影響本合同的履行，甲乙雙方可協商解決。
【解說】：合同執行中間，若有拄著戰爭、天地災害抑者是政府政策變化chiah-ê不可避免的因素，致到合同執行受著影響的，甲乙雙方會使談判調解。

第七條：合同的管轄、效力及其他

本合同一式兩份，甲乙雙方各執一份。具有同等法律效力。
【解說】：本合同一式兩份，甲乙雙方一儂一份，法律效力sio-siâng。

甲方：廈門天運船務代理有限公司

代表（簽單）：胡麗珠
【解說】：代表（簽字）：胡麗珠
電話：

乙方：

乙方家屬：

電話：

日期：

對頭到尾斟酌（chim-chiok）看煞，林達soà手著簽字落去。伊知影即份契約單（khè-iok-toaⁿ）對做漁工的乙方來講是不利，甚至會用講不止食虧著。了，伊有kiau胡麗珠加減（ke-kiám）練寡痟話，講寡有的無的……佫路尾，著斡出來囉。佇半路ni̍h，林達soah感覺略仔驚驚，敢（káⁿ）會是簽「賣身契」咧？

第三章：上船前

倒去到厝ni̍h，第二日林達著去辦護照，照胡麗珠的所講，卜去的所在，也著是目的地，寫「新加坡」，出國的理由寫講是「旅遊」。

Ah若「體檢」，講著去縣級抑者是比縣級佫較懸的正規醫館chiah會使得。代先有檢查乙肝兩對半，表面抗原、表面抗體、e抗原、e抗體、核心抗體、前S1抗原chiah-ê指標攏chiâu陰性的，照講是無問題。了後做心電圖，林達心跳一分鐘kan-ta跳55下，略仔磕骹磕骹（kha̍p- kha），徛算無啥正常的款。尾仔，有佫去問先生，講少年儂真濟攏按呢，勿會啥要緊，算做猶佫是正常。講是按呢講，林達猶原驚驚，敢（káⁿ）是即兩年仔較無咧鍛鍊，心跳soah變慢去。

上尾仔做B超，這是卜驗看到底有盲腸炎抑無。排隊排規晡，中晝食飽佫排成點鐘久chiah輪到（lîn-tio̍h）。檢查了，對對講無按怎。

約略佫過一月外日，chiah用快件kā護照佮體檢原件攏chiâu寄去廈門天運船務代理有限公司。胡麗珠講有一間名號做「太平財產保險」的保險公司來卜kā眾船員辦集體保險，林達上網去查，正實（chiaⁿ-si̍t）有即間公司，總部佫設佇香港。Ah毋過登入in公司的網頁了後，按照保險號去查，soah任查也查無即期出海船員的名字。林達趕緊摃電話去問，「胡小姐啊，是按怎我佇太平財產保險有限公司的網站頂頭，查無阮的名咧？」

電話彼頭略仔有頓咧四五秒鐘久，佫出聲soah kán-ná有咧受氣，「恁愛知影，恁若出代誌我著賠偌濟，恁知毋知？公司是百分百kā恁投保啊啦！」

「無啦…我是想講問看māi咧……Ah保險金額敢是20萬毋？」

彼頭又佫頓liâm-mi仔久，「Ah無汝是咧驚啥啦？汝的一世儂敢講（kám-kóng）值20萬niā？拜託咧，汝嘛看遠咧，汝猶佫少年咧……」

「幹！」真正是頭殼歹去，勿會輸敢（káⁿ）咧煩惱講林達會去行短路的款。「無汝是想對佗落去啦？我kan-ta是想講卜問較清楚咧niā，soah毋知影即mái社會真正是……」

「保單無問題啦，無的確儂彼（he）保險公司網頁湊拄坎仔（chhàu-tú-khám-á）猶未赴換新咧，佫等兩日仔穩當著有啊啦。無按呢啦，汝若驚，我kā亻因廈門公司的電話報予汝，汝家己去問，阮著是佇亻因hia投保的。」

「好啊好啊，免啊免啊，我嘛是想講問一个較安心咧niā。」總是，林達的確也無想卜計較傷濟。

「按呢好，汝著會記咧，12月27號，去廣州報到（pò-tò），衫褲愛紥，時到著交240箍出關費…埔穗酒店總台hia報到，地址是廣園新村景泰直街，『好又多』的對面。若坐火車，會使坐805抑是257路公交的，佇廣園新村落車，過人行天橋向（ǹg）北行200公尺……若廣州車站，換810路公交車佇廣園新村落車；若天河客運站，著坐257路佇廣園新村落車。報到彼日徛宿（khiā-siok）是免錢的，ah汝若冗早（liōng-chá）去蹛，錢著家己出。」

「知啊。」

……

林達的確冗早三日來廣州，揣著埔穗酒店，是一間真正無名聲…講歹聽咧，彼毋知通有招待所的級聲無。林達佇hia徛四日，報到日公司出錢的無算，家己佫出三日的徛宿費。在林達拍算，kah來到廣州啊，總無講，無出去行行看看咧。彼兩日仔，林達攏總行三四位，有去沙面島看殖民地時代留落來的歐式建築；去白雲山的時陣順soà斡去黃花崗七十二烈士陵kā hiah-ê民族英雄行禮（kiâⁿ-lé）；去越秀公園對孫文紀念碑鞠躬（kiok-kiong）致敬。

到報到日，來的船員真正濟，拍算chia是台灣漁船佇廣州指定的漁工招待所囉。林達佇總台問著平平是天運公司介紹來的另外兩个船員的房間。在林達拍算，先來去kā看māi咧，博一下仔感情嘛好啦。先揣著一个黃家文，講是福建三明儂，差不多160幾公分懸，生做泛泛（hàm-hàm）緣投著。了後佫揣著一个韋東石，廣西儂，卜斂（lím）百六公分，看著儑面（gām-bîn）儑面，古意古意。韋東石猶佫有一个宿舍友，福建龍巖儂，姓陳。四个儂自按呢開講起來，亻因攏是頭一擺出海。

「韋東石，恁一月日薪水偌濟？」小陳問伊。

「講是講350美金啦，300箍講卜寄去厝ni̍h，佫50箍蹛船頂領現的。」韋東石應伊。

「我來進前，聽候（thèng-hāu）船聽候月外日，有領著10箍銀人民幣，講號做等船費。」黃家文插一句。

小陳佫問：「Ah恁有交鐳（lui）予牽猴的無？」

「無啊。」林達看著小陳，「ah汝是有交毋？」

「我有啊，我交6000千箍人民幣，介紹儂是阮老父亻因朋友。哇…恁真好neh，我一月日薪水chiah kan-na千五箍人民幣niâ。」

「哪會按呢，汝薪水soah佫比阮較減，佫講是熟似儂介紹的……」黃家文聽了感覺誠龜怪。

拄咧講話，臨當時（liâm-tong-sî）有一个卜斂仔（beh-lím-á）50歲的cha-po͘儂sōng入來，小陳講彼著是亻因老父的朋友，「伊講我拄18歲niâ，伊勿會放心，講的確卜送我來。」

即个老伯仔chông入來，逐个一時soah靜靜。伊毋知是想卜kiau眾儂hoah仙抑是家己咧無gē，講一句「各儂有各儂趁的錢……」

在林達拍算，無的確是借口講卜照顧朋友的囝來送，事實敢（káⁿ）卜來監督的，驚了半中剸（poàⁿ-tiong-tn̂g）小陳聽儂講東講西，soah毋願上船佫偷走倒轉去彼嘛敢（he mā káⁿ）。總是，林達無thuh破，橫直彼个小陳也無siâng公司，佮伊無底代。
……

尾仔，林達佮黃家文有佫講著即層代誌，兩儂攏講好得佳咧，相比起來，徛算猶無去拄著彼款佫較雄心的公司。暗時仔，林達有敲電話倒去厝ni̍h，敲予父母，敲予諸母朋友，kā亻因報平安，叫亻因放心免煩惱。徛算是上船前最後一通電話啊，亻因進前攏無主張伊去走船。
……

27日號，來取（chhoā）船員去飛機場的中間儂來啊，家己介紹講是福建寧德儂。伊kā林達、黃家文、韋東石交代講叫亻因三个時到去「發春六號」，講彼是「發春海洋漁業股份有限公司」的船仔，公司地址講佇高雄市前鎮區漁港南一路806號抑者是高雄市前鎮區佛佑路218號。

28號頂晡來到廣州機場，佫拄著kāng發春六號的另外三个大陸船員：陳二兵、向增壽、陳二兵亻因表小弟趙恆通。

林達按中間儂hia摕著護照，一下看簽證，寫講是泰國的旅遊簽證。想著講進前佇公安局ni̍h申請護照的時陣，明明是寫新加坡，「哪會soah是泰國咧？敢毋是新加坡？」林達問亻因逐个。

「新加坡啦，哪會泰國？」四川儂向增壽應話。

林達手指（kí）簽證頂頭印有泰王國的字眼予向增壽看，「汝看，著是這啦，這寫的明明是泰國。」

「全寫彼號膦脬（lān-pha）鬼仔字，汝敢看有？」向增壽像咧看怪儂按呢看著林達，「汝看脫箠（thut-chhoê）去啊啦？是新加坡啦……」

林達嘛無愛佫諍（chèⁿ）囉，明明是泰國。

……

坐飛機，飛到新加坡，天釐仔（lî-á）卜暗啊。新加坡彼爿的中間儂駛車來載林達亻因chiah-ê儂去海口，交代講蹛hia等船仔來接去「發春六號」ni̍h。暗頓食中間儂。

佇海口hia，店頭足濟的，林達是彼號愛趖愛行的儂，來到即號所在，定著趁機四界去趖趖bāi-bāi咧。行來到一間專門咧賣皮帶、皮包仔的店 ni̍h，chhìn-chhài看，上便宜（pân-gî）的嘛愛著十外箍、二十外箍新幣。一箍銀新幣，通換四箍八的人民幣，物件的確比國內貴不止濟。顧店的兩个二十箍歲仔的諸母嬰仔，一个頭包烏巾，敢（káⁿ）是穆斯林；佫一个是馬來亞的唐儂。彼个唐儂諸母囡仔較肥，普通話講著真老（láu）；穆斯林彼个生做較幼秀，有透著唐儂血soah勿會曉講中國話。

「恁馬來亞的，哪會想卜來新加坡開店咧？」

「新加坡錢較好趁，哈哈。」

「有影無？按呢我另日嘛卜來新加坡開店。」

「Ah汝毋通來佮阮搶生理哦。」

「哈哈，我問汝一下，通毋通？」

「嗯？啥物啊？」

「我聽儂講馬來亞嘛真gâu khoeh-choe̍h咱唐儂，毋知有影無？聽講勿會使印華文報紙，勿會使辦華文學堂，敢有影按呢？」

「汝是聽啥儂講的啦？勿會啦，現此時馬來亞唐儂地位泛泛懸，kiau馬來儂嘛真協和。彼無（he bô），我佮馬來儂當（taⁿ）毋是相合（saⁿ-kap）咧開店？」

「按呢哦，看勢，彼網頂的話有影勿會聽得。」

「Ah汝皮帶嘛看規晡啊，有看著佗一條合意的無？」

「嗯，我是罔看māi咧啦，在我看，平平kāng彼號的皮帶，即爿比中國國內的確貴不止濟著。」

……

佫行來到一間賣囡仔衫，賣chhit-thô物仔的店頭，看著四五个薪勞，較看也kán-ná未夠歲的囡仔，敢講新加坡soah會使倩囡仔工？

一个店員行過來問林達，「儂客倌，請借問咱有卜挃（ti̍h）啥物無？」

「哦…無啦，罔看māi咧啦。」

敢（káⁿ）掠準講林達即號「大儂大種」無按算會來買囡仔物，彼个店員又佫走去kiau別的儂客交接囉。

……

上路尾踅（se̍h）來到一間珠寶店，雖然看林達kán-ná無啥siâng來交關的款，ah毋過，彼个徛店的服務生猶原真好禮。兩儂一句問，一句還，soah liâu-liâu仔講（káng）起來。

林達kā彼个服務生講，「汝敢知影，其實我自早著真合意新加坡，我知影新加坡有范文芳、孫燕姿、許美靜啦、阿杜啦……我有一暫仔（chi̍t-chām-á）足合意孫燕姿的，嘛真合意范文芳，愛看伊搬的戲；許美靜佮阿杜的歌嘛勿會bái。」

「我嘛真合意亻因。」

「我來新加坡chiah知影發現講chia的唐儂普通話攏誠gâu講。Ah恁有咧講福建話無？」

「新加坡講福建話的唐儂是第一濟的，阮厝ni̍h往過嘛福建來的，到我即沿的徛算第四代囉，毋過，福建話我會曉聽，soah無啥會曉講。現此時政府嘛有咧鼓勵母語教學。」

當咧（tng-leh）講話，店內電話soah teh giang。林達著講啊，「Ah無…汝做汝去無閒啦，再見。」

「順行哦，另日chiah佫來。」

……

林達行倒轉去侯船的所在，彼五个大陸同胞自食飯後著直直坐佇hia攏無振動（tín-tāng）過。

「汝走去佗落啦？」黃家文問林達。

「無啦，四界去行行咧，按怎？」

邊仔陳二兵插一句，「阮頭拄chiah佫咧約（ioh）講，汝敢（káⁿ）是落跑（làu-phâu）去啊。」

「啊？汝講啥？霧sahⁿ-sahⁿ，毋知汝teh講啥。」

向增壽soà喙講，「頭先，看汝chiah久無倒來，想叫汝是卜偷走去新加坡，毋上船囉。」

「啊？！Ā有彼號代誌？我頭擺聽儂按呢講，進前敢soah有即號代誌？」

「有啊，哪會無？即號代誌濟kah。」猶原是陳二兵teh講。陳二兵佮向增壽攏老鳥啊，出來做幾若choā啊。

林達聽了soah驚驚，趕緊換講一寡別物（pa̍t-mi̍h），「拄仔，我佇hia拄著一个中國儂，來chia做掃地工。」

「有影無？ah伊一月日偌濟鐳？」黃家文teh問。

「伊講一年kiám-chhái通儉咧三萬仔額，人民幣啦，佫是中儂抽頭了後賰的。毋過，中儂抽頭真重，兩年著交咧四萬銀。Ah佫講，佇chia做工時間性有較長。」

「Kiau咱走船的精差無偌濟啦，平平攏歹命儂，趁艱苦錢。」向增壽佇邊仔teh怨嘆。

林達想無伊講話哪會心酸酸的體，著soà伊的話，講「聽彼个掃地工teh講，為著卜儉錢，平常時仔攏毋敢出去chhit-thô，日日所費嘛是儉腸 naih肚。講新加坡消費並（phēng）咱國內懸足濟的。佫講，即陣新加坡chia像伊即號予儂按中國牽猴牽來teh做工的儂有夠濟的。」

黃家文講：「我若有三四萬通予牽猴的，無的確我著毋免趁儂來chia走船囉。」

「走船的，攏真悿頭（thiám-thâu）。Hiah-ê台灣仔管事嘛是。」陳二兵又佫出聲，「毋通看亻因薪水領比咱濟，事實汝kā看台灣所在 teh開銷…有無，物件hiah-ni̍h貴，加領彼个幾箍銀仔卜含膦（kâm-lān），嘛是無夠通開，猶較輸咱大陸着。台灣仔管事hiah-ê chiàng時猶teh走漁船的，除非船長來講啊，無攏嘛是一寡蹛岸頂強卜趁食勿會得去的骹數（kha-siàu）。」

林達chiâu細聲仔應伊一句講，「Ah毋過，儂亻因台灣的確比咱較好過啊，這嘛是事實。」

「嘿嘿」，陳二兵抵（tú）伊一句，「汝是捌啥？聽候（thèng-hāu）汝上船kiau hiah-ê台灣仔有交接，汝著知影啊。」

「我往過佇廈門hia捌kiau一寡台灣儂有接接（chih-chiap），素質攏泛泛（hàm-hàm）OK啦，我對台灣，對台灣儂印象勿會bái，看著台灣儂感覺加足（ke-chiok）親的。」

「嘿嘿，」陳二兵soah teh起愛笑，「另日汝著知啊！」

……眾儂自按呢佇hia一句來一句去，講東講西，講天講地，講鱟桸（hāu-hia）、講飯籬（pn̄g-lē），牽尪仔補雨傘，講天掠皇帝。

趙恆通問講「林達，汝娶好抑未？看汝嘛二十外啊，敢（káⁿ）無？卜三十抑未？」

「無啦，猶未咧啦。ah東石、家文恁咧，娶好抑未？」

……

「Ah我，囡仔都（to͘）兩歲啊，諸母囡仔啦，我手機仔內佫有囥伊的像片，來，我分予恁看。」

看著趙恆通手機仔頂囡仔的像片，大達正經kā伊o-ló，「有影真古錐！」……了，林達又佫kiau亻因半滾笑，「唉…卜講幾若年前啦，嘛有一个諸母囡仔teh合意我，毋過伊是孤囝，ah亻因爸爸愛我去kiau亻因食，我勿會giàn。」

「亻因兜有錢無？」陳二兵teh問。

「普通啦，是講，我嘛是孤囝，我卜哪會使去咧？佫再講，予儂招，佇阮hia會hông看無目地，會hông笑死。」

「汝毋teh悾khám啊！孤囝佫出來走船做苦工。看汝按呢尖骹幼手，敢（káⁿ）毋捌做過粗重的……雙手也無看著佗位結lan，徛算厝ni̍h條件猶佫勿會bái乎（ho͘ⁿ）？」向增壽插一句。

「喂，我實在想無neh！予儂招是會死毋？」陳二兵雄雄大聲起來，「像阮表小弟啦，儂伊嘛倚諸母的彼爿食，厝ni̍h佫一个姨仔著，別日丈儂爸（tiūⁿ-lâng-pâ）佫通賴（loā）予彼个姨仔去飼。哈哈，彼號生活有幾个通比伊較自在。」

林達聽了險戇去（gāng- -khì），「是講，ah老大儂總是嘛著kâng飼，敢毋是？佫無，法律嘛有定規著。佫再講，一所在一所在，無siâng風俗，我若去hông招，彼chiah真正會予儂笑kah 落下ham（làu-ē-ham），無面通見儂。」

講著這，陳二兵面soah loah落來，勿會輸hông招的是伊本儂，毋是亻因表小弟。伊停liâm-mi仔，雄雄bok一句，「話不投機半句濟！」……有影，林達家己自省（chū-séng），今仔日的確有較厚話，話傷濟未免失言，未免會得失儂。

〖未完〗

Tagged: 講古