樹林仔內，有一欉老杉仔樹。老杉活幾若百年啊。樹身真正粗，拍算五个大儂撏（siâm）bōe倚；樹欉嘛有夠懸，kiám-chhái七八棧樓hiah-ni̍h懸。樹頂有一个鳥岫，樹骹有一窟地洞。鳥岫蹛一隻烏鴉；地洞蹛一隻狐狸。

烏鴉生成古意，佫朝直；狐狸做儂自本奸巧，佫狡chè。

【烏鴉啉水】

有一日，烏鴉出去chhit-thô。伊飛出樹林，飛過山墈，飛過畻莊、飛過草埔、飛過沙漠……飛真久，嘛飛真遠，飛來到一窟拍石仔坑。烏鴉飛kah真siān真悿，感覺喙焦喉渴（chhùi-ta âu-khoah），伊決定卜歇喘一下。天ta̍uh-ta̍uh-á變暗，伊歇佇路邊，卜揣看佗位有水通啉無，實在乏（ha̍t）kah強卜蹺去。伊四界bāi，四界看，大bóng四界soah揣無半滴水……烏鴉真正失望，soah倒佇骹塗兜，做伊睏去。

嘛毋知影過偌久，烏鴉睏精神囉。啊！紅天赤日頭！敢講一醒睏kah隔轉日？睏kah日頭曝尻川？唉呀呀，kah-i-bo̍h啊，插插伊啊……當（taⁿ），第一要緊，著是趕緊揣看有水無，若無，拍算性命無去！烏鴉醒來，未曾翻身，頭殼內著直直咧想講卜啉水止喙焦。目睭揉揉（jôe）咧……咦，hit爿大石岩邊仔！He是啥？！哈哈，he敢毋是一支玻璃矸仔？！緊來去kā看māi咧，無的確……烏鴉目睭做一下金起來，sī-sōa展（thián）開翼仔，緊緊飛倚去。哈哈……真正是一支玻璃矸仔！的確有水佇咧！有影是天公疼戇儂啦。

烏鴉看著水，歡喜kah跳上天！相著矸仔喙，頭猛猛（mé）àⁿ落去，想講卜來一喙kā伊啉一个夠氣！

哎喲喂啊……我父我母啊！哎喲喲，卜死啊……卜死啊……哎喲喲……

一目nih niā，烏鴉著來hut一下烏頭面腫，頭眩目暗，當場蹛咧哀父叫母。到底是按怎啦？夭壽啊，Siáng知影烏鴉狂卜啉水，無疑悟看，hit-ê矸仔喙hiah狹（e̍h），伊頭hiah大mau，雄雄chhih落去，鳥喙soah去khê蹛佇矸仔口，挵一下規个頭殼戇戇踅，雙目出火金星，的確「滿天全金條，卜捎無半條」，真正食力！

幹！恁né老膣屄……儂若咧哀，種瓠仔生菜瓜！連這破矸仔也來kā恁父相創治……

是講，chhoh罔Chhoh，幹罔幹，猶原嘛是著想辦法，無啉水，的確bōe用咧。「頭先穩當是頭chhih了傷過雄」，烏鴉想講，無佫來試一擺看māi，「毋koh即擺的確著愛較細膩咧」。

自按呢，烏鴉佫一擺kā頭chhih落去。毋koh，即擺照原嘛是無啉著水，因為矸仔實在傷深，水實在傷少，死決啉bōe著。

烏鴉急kah，舞kah滿身重汗，佇遐咧趒骹頓蹄，一時想無啥物好步數。卜kā偃倒嘛，驚水流落塗骹；卜kā摃破嘛，嘛是無較choa̍h。唉，到底卜按怎啦？……天公伯仔，緊教伊一个好phiat步啦！！

啊！有啊！汝看，矸仔邊一粒一粒的，敢毋是石子（chio̍h-jí）？石子若是ka̍k蹛矸仔底，水敢毋是自然著會衝（chhèng）懸啊？

哈哈，即siaⁿ，烏鴉終歸是啉著水啊啦！

Tagged: 講古