——本文照同名（tâng-miâ）英語短篇小說（siáu-soat）改編

編譯：Limkianhui

非洲有一條誠長誠闊的溪，有兩尾鱷魚（kho̍k-hî）蹛佇hia。兩爿邊（lióng-pêng-piⁿ）的溪岸，有誠濟棕仔樹（chang-á-chhiū）。溪中央有一个海嶼，頂頭有誠濟弓蕉欉。

有一工，兩尾鱷魚佇咧水面頂泅來泅去，大尾鱷魚kā細尾鱷魚講，「乖囝的，汝看岸頂hit欉棕仔樹！有趣味無？」

細尾鱷魚按大尾鱷魚指的所在斟酌看去，啊！的確有一隻猴仔囝，佇棕仔樹頂懸teh捙跋反（chhia-poa̍h-péng）、變猴弄，實在誠古錐。

「乖囝的，恁母仔——我，即幾工仔毋知乜代（mih-tāi），soah直直感覺喙pho-pho，無想卜食魚，亦無想卜食肉，kan-ta想卜食一个較清甜的、較無共款的。」

「母仔，汝想卜食甚物？愛食，我來去chhoân。」

「嗯。汝去kā hit隻猴仔掠來，我卜食猴仔心。」

「好是好……ah m̄-kú ，猴仔ā毋落水，我ā bē曉得peh樹，卜thái-thó掠伊會著咧？我看，敢（káⁿ）無法度啦！」

「著是按呢，毋chiah叫汝設法。汝佫想看有啥物phiat步無？」

細尾鱷魚想規晡，尾手，的確有想著一个步數。伊peh起lih岸頂，爬來到棕仔樹骹，瞻頭（taⁿ-thâu）對著樹仔頂hit隻猴講，「猴仔兄，我看汝chhit-thô規晡，拍算誠悿（thiám），ah汝腹肚會枵bē？」

「汝……汝是咧kiau我講話，是毋？」

「喺（Hēⁿ）啊，chia 也無別儂啊，我毋kiau汝講，無是咧kiau啥儂講啦？」

「我ā毋捌汝啊…汝…」

「哦…無啦，我是想講，卜kiau汝交一个朋友啦。」

「哦？敢按呢？」

「喺啊。我是想講，看汝按呢佇樹仔頂chhit-thô kah hiah歡喜，拍算腹肚枵啊，想卜報汝食好料的物件啦。」

「哦？有hiah好空？」

「喺啊喺啊，soah毋知影我即个儂，上愛交朋友啦！雖然，咱進前無相熟（siong-se̍k），m̄-kú，咱算起來，是厝邊neh。……ah我hò·ⁿ，別項無啦，獨獨有一个予儂o-ló有著的，著是…著是我平常時hò·ⁿ，攏足愛kā儂鬥相共（tàu-saⁿ-kāng），因為hò·ⁿ，我感覺幫贈（pang-chān）別儂，是真心適、真趣味的代誌啦。」

「按呢哦！Taⁿ無汝講看māi，有甚物好空的卜報我知？」

「有囉！我kā汝講hò·ⁿ，佇hia溪中央有一个海嶼，有無？頂頭有足濟弓蕉，taⁿ攏sek啊。He真正在欉黃的，讚的，即陣若去hia食弓蕉hò·ⁿ，拄好著時陣啦！我知影汝愛食弓蕉，m̄ chiah專工來kā汝報。」

「哦！Ah…是講，弓蕉我卻（khiok）有合意（kah-ì）食啦，總是（chóng- -sī），我ā bē曉得泅，thái-thó有法通過去hia啦？」

「噢…這哦，這汝免煩惱啦，我上愛kā儂鬥相共啦，我會曉泅，我iāng汝過去，予汝去hia食一个仔夠氣！」

「哇！讚讚讚！哈哈……多謝汝，多謝汝！」猴仔趕緊按樹仔頂tiô落來，liâm-mi mo·h蹛咧鱷魚的骹脊骿（kha-chiah-phiaⁿ），叫鱷魚著趕緊iāng伊過溪去挽弓蕉。

鱷魚自按呢iāng著猴仔囝落水去。猴仔囝頭一擺予儂iāng咧泅水，bē輸咧坐船，ná行ná看光景，實在輕鬆，又佫心適。泅咧，泅咧，無疑悟（bô-gî-gō·）鱷魚雄雄soah沉落去。

「哎喲！我爸啊……」猴仔掣（chhoah）一下險險仔滲青屎，雙手sī-sōa kā鱷魚頷管（ām-kún）sǹg kah ân-ân，大聲哀講，「鱷魚啊，汝mài滾笑啦，汝敢是存辦（chhûn-pān）卜kā我激死？！緊的啦，緊iāng我上岸，我會驚啦……」

「哈哈，汝毋是講汝想卜食弓蕉？阮母仔猶佫咧等卜食汝的心nah！哈哈，我看，伊taⁿ穩當咧流喙瀾啊啦……哈哈哈……」

即siaⁿ，猴仔chiah知影講予鱷魚設去。Taⁿ是卜按怎咧？伊想liâm-mi仔久，對鱷魚講，「恁母仔想卜食我的心，好是好啦，毋kú，汝ā無冗早（liōng-chá）講，ah我規心想卜食弓蕉，kan-na紥喙來niâ，soah bē記得kā心sīn-sòa紥來。」

「哦？若按呢，汝的心咧？」

「我的心猶佫hē佇棕仔樹頂hia。」

「啊！哪會按呢啦？！Ah無，咱趕緊倒轉去，來去kā汝的心挽來。」鱷魚講煞，趕緊轉身越頭，泅倒轉去。

未等鱷魚泅到岸邊，猴仔sī-sōa liòng上岸，三步做兩步跳，緊緊peh上樹，毋敢佫落來。

Tagged: 講古