——本文照阿拉伯民間傳說《天方夜譚》（嘛叫《一千○一暝》）〈漁夫的故事〉所編譯

編譯：Limkianhui

往過，有一個掠魚的喪兇儂，厝內真窮真散。伊逐工透早天未光，著愛落海去討掠。毋kú，伊對家己有定一條規矩，一工拋網極加拋四擺niâ。

有一日早起，掠魚的照原早早出去討掠，khiám-chhái運氣無通好，伊連拋三擺網，啥物骨頭攏無拋著。看範勢，今仔日hoān勢著愛了戇工，掠魚的氣kah佇遐咧chhoh-kàn-kiāu。伊bōe死心，想講第四擺佫拋看māi。即擺hìⁿ一下佫較出力，規領網仔hiù出去，自然展（thián）kah平平平。等kah卜收網的時陣，soah感覺加足重的，任拖嘛拖bōe振動。「龜怪！敢是khê著啥物貨？」掠魚的sio-khóa 頓蹬（tùn-teⁿ）一下，sī-sōa衫仔褪sak，緊緊tiô落水，骹手做一下出力，真無簡單chiah kā魚網仔拖上岸。展開一下看，哇！我káiⁿ啊！網仔內的物件，毋是魚，嘛毋是蝦，佫較毋是鰻！汝叫是啥貨？是一粒葫蘆形的、黃銅做的大甕！甕仔喙佫用錫封著，頂頭有頓大印，寫「所羅門」三个大字。

掠魚的本然拋無魚蝦，憂頭結面，taⁿ liâm-tong-sî拋著即號好物，拍算the̍h去市場賣，無賣一个三五十兩，無嘛有一二十兩，的確比賣魚賣蝦較好趁。掠魚的愈想愈sahⁿ心，歡喜kah喙笑目笑。伊用雙手kā甕仔siâm起來搖佮chhe̍k，soah感覺足重的，內底bōe輸貯（té）規甕tīⁿ-tīⁿ的物件。「阿娘喂，到底貯啥物碗糕骨頭，chiah-ni̍h重！Bē用得，的確著先kā伊開起來看māi。」掠魚的，自褲頭綾（khò·-thâu-lêng）拔一支刀仔出來，三下半手，著kā甕蓋的錫kiāu開，了後，伊kā甕仔mo·h懸，掠倒頭栽，出力chhe̍k，想講卜kā內底的物件倒出來。毋kú，chhe̍k規晡，soah無看著半項物件，巧怪啊！

一目nih，甕底soah chhèng青煙出來，ná chhèng ná濟，ná chhèng ná懸，直直飛去到天頂尾，過無liâm-mi仔久，四邊著攏煙phông-phông，sòa落去，青煙soah慢慢收縮，勼勼成做一丸，最後soah化做一箍大大khian的魔鬼。即个魔鬼毋知是妖，抑是怪，看伊生做是挐頭鬖面，橫霸霸，真大mau，一bu ná像是山，懸long-long chhāi佇掠魚儂的面頭前。掠魚的相真kā伊看，看伊頭親像堡壘，雙手親像鐵耙，腳骨親像廟柱，喙仔親像磅空，喙齒親像石pang，鼻空親像鼓吹，目睭親像燈籠（teng-láng），一箍雄kài-kài，惡khia̍k-khia̍k，愈看心頭愈青驚。

掠魚的毋捌看著即號的惡魔，驚kah三魂七魄險險仔散去，規个儂戇佇遐，毋知卜按怎。是講，講起來嘛龜怪，過無liâm-mi仔久，soah聽著彼个魔鬼開喙佇咧哀：「所羅門啊，汝mài掠我去刣啦，我毋敢佫違背汝的命令啊！汝放我一條生路，放我煞啦……」

「魔鬼！」掠魚的講，「所羅門死卜一千八百年啊，汝是怎樣nǹg佇即粒甕仔內咧？」

魔鬼gông-ngia̍h一下，斟酌看咧，徛佇頭前的儂毋是所羅門，不過是一个普通的討海儂niâ。魔鬼大聲hoah講「掠魚的，汝死期到啊！看汝卜按怎死，予汝揀，我liâm-mi著送汝去見閻羅王！」

「我犯啥物罪？」掠魚的問講，「我kā汝對海底hô·起來，佫kā汝按甕仔內放出來，我救汝的命，汝是按怎反轉soah卜刣我？」

魔鬼應伊講：「我嘛是姑不而將，聽我講煞，汝著會知。」

「卜講，做汝講koh！」 掠魚的講。

「汝拍算毋知影」魔鬼講，「我本然是作惡作歹的惡魔，我kiau所羅門做對頭，伊kah儂來掠我，kā我long佇甕底，用錫封kah bā-bā，甕蓋佫頓印，tàn落去海底。我佇海底四界流過來、溢過去，頭一个世纪，我定定咧想：『啥物儂若是佇即个世紀kā我救出去，我的確會報答伊，我卜予伊一世儂享受榮華富貴。』一百年過去囉，無儂kā我救。第二个世紀起頭的時陣，我著講：『啥物儂若是佇即个世紀kā我救出去，我決斷會報答伊，kā全世界的寶庫攏送予伊。』毋kú，照原無儂來救我。第三个世紀起頭的時陣，我講：『啥物儂若是佇即个世紀kā我救出去，我死決報答伊，允伊三个願望。』毋kú，整整過四百年，猶原無儂來救我出去。我真正受氣，我講：『從今以後，無論啥物儂，若是佇即个世紀kā我救出去，我決定卜刣死伊，毋kú，允准伊選擇怎樣死。』真歹運，掠魚的，即陣汝來救我，所以我允准予汝揀，看汝卜怎樣死，攏會做得。」

掠魚的聽了大聲哀講：「嘛咧衰啊，好死毋死，無代無誌救著汝即箍惡鬼！是我救汝的命neh！汝哪會使按呢對我？」

「正正是因為汝救我，我chiah卜刣死汝！」

「好心去予雷唚！我救汝，汝soah反轉卜刣我，汝即个無天良的惡魔！汝bōe當好死！」

「好啊！Mài佫囉唆啊啦！」魔鬼hoah講「hoân-chāi我即陣講啥汝攏聽無啦，總講一句，汝無死bōe用得！」

即个時陣，掠魚的心內暗靜咧想：「伊是魔，我是儂，我著愛用我的智慧來壓倒（ah-tó）伊的妖氣，我chiah有活命的機會」自按呢，伊對著魔鬼講「汝真正決定卜刣我毋？」

「無毋著」。

「好！若按呢汝敢對天咒誓（chiù-chōa）毋敢？我問汝一項代誌，汝著愛照實講。」

「會用得」魔鬼講，「汝卜問，著做汝問，較緊咧啦！」

「汝講汝蹛佇即粒甕仔底毋？毋kú，若照道理講，汝儂hiah大mau，甕仔kan-na一庀庀仔大niâ，汝連手想卜chhng入去，拍算to無法度，thái-thó有法通貯汝全身？」

「汝毋信我會當蹛佇內底？」

「我ā無親目睭看著，我thái-thó卜信？」

「好！若按呢，汝目睭peh予金，斟酌看分明。」魔鬼講煞，身軀一下搖，隨化做一陣青煙，又佫ta̍uh-tua̍h-á變做一條長長幼幼的雲絲，慢慢鑽入去甕仔內。掠魚的看青煙全部勼入去了後，sī-sōa kā彼个有糊錫的甕蓋khioh起來，kā甕喙塞tiâu。了後，掠魚的就學魔鬼講話的聲嗽（siaⁿ-sàu）大聲hoah講：「惡魔，緊kā我講，汝按算卜怎樣死？我taⁿ決定卜kā汝tàn落海，予汝永遠無法度佫出來！」

Tagged: 講古