往過，咱攏知影講，龜佮兔捌比過，比啥貨咧？嗯，著是鬥走（tàu-cháu），比看啥儂走kah緊。結果，彼擺比賽，兔仔傷過風龜，愛弄拐仔花，拍算看貓無點，贏贏kiáu poa̍h kah輸了了，尾仔，對對去予龜贏去。當（taⁿ）照原佫來講龜、兔鬥走的故事，毋kú，即擺卜講的故事，kiau頂過無siâng款哦！到底是怎樣（cháiⁿ-iūⁿ）咧？斟酌（chim-chiok）聽，汝著知。

【故事的主腳（chú-kioh）】

未講進前，先來介紹故事的主腳。代先是小白兔。無毋著，伊著是頂過鬥走，比輸龜的彼隻白兔。第二，龜，伊嘛是頂倒（táu）比贏小白兔的彼隻龜。第三，是小烏兔，叫伊烏兔，事實伊毋是烏的，論真講伊是火烌仔色（hóe-hu-á-sek）的。頂過龜兔比賽，kiau小烏兔無底代，彼輒（hit tia̍p）伊拄好上山去割草仔，無閒。

【年號（nî-kō）】

明朝萬曆十七年（1589年），也著是神宗皇帝在位的時陣。（這kiám-chhái畫虎卵的啦……)

【所在】

中原河南嵩山（Siong-san）山骹的一條溪仔，邊頭的一條馬路，對面的一片竹仔林，內底的一片空地仔（khàng-tē-á）。（這嘛不止仔譀）

〖故事起致（khí-tì）〗

從（chêng）頂過，龜、兔比賽了後，小白兔著真鬱chut，行到佗落攏予儂詼（khoe），予儂笑。伊感覺真正無面通見儂，伊決心卜振作，卜挽回自尊。伊卜證明予儂看，小白兔我不過是一時無細膩（sòe-jī）失覺察，chiah會去輸予彼隻毋成龜！我，我照原是即片樹林仔內底第一gâu走，速度第一緊的儂……哦，歹勢，毋是儂，是兔仔！

〖故事的內容〗

來講，小白兔從（chêng）彼擺鬥走比輸了後，心肝頭直直感覺gīn-gīn，為著卜挽回自尊，伊決定卜佫比一擺，卜證明伊chiah是第一名。有一日早起時，紅天頭赤日頭，四邊花芳風涼，尾蝶仔（bóe-ia̍h-á）蜜蜂走相jiok。小白兔透早睏精神，未顧得洗頭面，未顧咧食早頓，著拼來到龜in兜的門骹口，無講無tàⁿ，對著龜門直直敲（khà），下命（hē-miā）挵。龜本然猶咧好睏，聽著外口有儂挵門挵kah 嶄然（chám-jiân）青狂，想講敢（káⁿ）官府派儂來卜掠壯丁抑毋是，驚一下險險破膽，雄雄按眠床頂lìn落來，順紲（sīn-sòa）轂（kauh）入去眠床骹，按算覕（bih）蹛hia。小白兔坫口身拍門，聽見厝內無做聲，掠做（lia̍h-chòe）龜是著眠災（tio̍h bîn-che），好睏kah水卜流去猶毋知。小白兔起gīn神，一骹攑懸（gia̍h koân），出力chàm。Siáng知影門本然誠荏（lám），chàm一下傷出力，規nn̂g ê儂，連門做一下摔摔（siak-siak）piaⁿ-piaⁿ入去，匐匐（phih-phih）lìn-lìn對眠床骹入去。注死毋死，拄好去磕著內底彼隻「老柴龜」。哈哈，即siaⁿ，龜佮兔攏無疑悟（bô-gî-gō·），平平驚一趒（tiô），雙雙走出房。出來kah口面，斟酌看，chiah看清對方的面貌，知影無歹空，各儂心頭落定，坐落來寬寬仔（khoaⁿ-khoaⁿ-á）參詳代誌。

自按呢，小白兔也講也比，連háng帶術，將即chōa來的起見講明白。龜本然掠叫伊來是有啥物好空的代誌卜鬥相報，一下聽著講是卜來輸贏，趕緊推（the）kah無tè去，順喙現抵（tú），應伊講，毋佫佮伊比賽囉。小白兔嘛無通著伊（bô-thang tio̍h- -i），咬硬講無比bōe用得，除非天落紅雨、馬發角。橫直，小白兔死綿爛kô，龜無伊法，姑將無奈應承伊。毋kú，龜嘛有品條件，講若無照伊品的行，伊共款會當越頭倒轉去。龜的條件是，比賽著愛由伊來定規，兔仔若無照來，著判輸。小白兔為著卜比賽，計計答應伊。

龜，心內咧想啊，若卜硬拄硬，實拄實kiau伊比，可比草蜢弄雞公，穩死無救，定著輸kah離離離、土土土（thô·-thô·-thô·），看勢，即錦（gím）若卜贏，決斷（koat-toàn）bōe使kiau伊硬拼，著愛kiau伊poa̍h心機，chheng-piàng毋值得訣說（koat-soat），用頭殼想，較贏出力舞。

龜對小白兔講，汝按呢聲聲句句講卜佮我比，事實我會使免插（chhap）汝，因為頂擺咱比過了啊，逐个嘛攏知影啊，我贏，汝輸……本然，拍算佫比嘛無較choa̍h，毋kú，帶念（tài-liām）汝有上進心，chiah佫予汝一擺機會試看māi。是講，汝卜kiau我比進前，汝著愛先證明予我看，看汝是毋是有資格通佮我比。

小白兔著問伊講，卜怎樣（cháiⁿ-iūⁿ）證明有資格抑無資格。龜講真簡單，汝先kiau小烏兔比看māi，看汝有法通贏伊無。若是比贏，汝chiah會通來佮我比；若無，汝著乖乖轉去，永遠mài佫來chak-chō。

龜知影，小烏兔自來對小白兔毋認輸，直直想卜揣機會kā小白兔壓落底（ah-lo̍h-té）。小白兔毋知空，聽講卜kiau小烏兔比，伊連想嘛無想，隨應好。在小白兔拍算，小烏兔自細漢，毋管比啥物，攏罕得贏伊，明其知對方輸面較大，即場比賽，伊算是十成十，烏鼠仔入牛角，卜掠穩tak-tak。哈哈。

儂講「一時想無到，半斤捍（koāⁿ）頭繚」，有的儂著是傷過朝直，直lòng-sòng，一條腸仔迵尻川，做代誌攏無咧斟酌想，無觀前顧後，所以致到（tì-kàu）往往（éng-éng）是「十藝，九不成（si̍p gē, kiú put-sêng）」。小白兔kiám-chhái著是即號儂，算做有勇無謀。伊毋知影講龜實際是咧kā伊設計落套頭，iah一个空（khang）便便teh kā伊當（tng），卜聽候（thèng-hāu）伊來跳。

龜去揣小烏兔，kā伊煽動兼使弄（sái-lōng），教（kah）伊著去kiau小白兔比拼（pí-piàⁿ）。龜kā小烏兔講，汝毋是直透teh數想（siàu-siūⁿ）卜kā小白兔壓落底……實實講，若照起工來，汝卜贏伊，拍算有較oh。不而過，當（taⁿ）機會來啊，趁即暫（chām）小白兔當咧（tng-teh）陋災（lō·-che）……汝著愛主動對伊挑戰，kā伊比落去，按呢汝chiah會當出頭天！……汝，做汝放心啦，有我佇邊仔kā汝鬥相共（tàu-saⁿ-kāng），汝卜贏伊是無問題啦……汝若是贏過伊，此去，汝著毋免佫看伊的面腔囉！汝講著毋著？哈哈……

小烏兔聽龜按呢講kah一大堆，愈聽愈在理，伊拍算即輒（chit tia̍p）挑戰小白兔，穩當會成（sêng）……佫再講，機會的確毋是定定有，冗早（liōng-chá）出手的儂先賺食（choán-chia̍h）著。哈哈，的確是天公伯仔咧助贈（chō·-chān），佫睏嘛無彼號眠！

小烏兔來請教龜，卜怎樣chiah有十成的把握贏小白兔。兩个儂chhi̍h-chhi̍h-chhu̍h-chhu̍h，按呢按呢，設計kah一齣一齣。
……
……
過無偌久，小烏兔侵門踏戶，去揣小白兔，直抵直，倡（chhiàng）講卜挑戰伊！小白兔thái有將對方看在眼內，應伊講，比著比，驚汝按怎，有膽做汝來kong！自按呢，in兩儂約定佇竹仔林內底的空地仔比賽。比啥貨？照原比鬥走，看siáng代先走到坎（kàu-khám），著算是贏；雙方攏同意比賽的時陣，請龜來做裁斷（chhâi-toān）。

三儂相招來到竹仔林內的空地仔。按規矩，做公斷的儂，代先著愛交帶比賽的規則，即層代誌當然是龜來發落。龜對in兩儂講——

「當（taⁿ）恁兩儂攏聽好勢，比賽未開始進前，我先交帶起點佮終點。起點，看好勢哦，著是定佇我倒手爿即支石khi̍t仔；ah若終點嘛，著是對面彼爿遠遠仔彼欉有結（kat）紅絲仔索的竹仔欉。按呢逐个聽清楚啊乎（ho·ⁿ）？……好，既然攏無意見，攏聽分明看清楚，無咱小準備一下，比賽liâm-mi著卜開始囉！」

「小等咧！慢且是！」小烏兔講伊猶佫一个無清楚的，「喂，龜啊，ah較停汝卜公斷（kong-toān）的時陣，汝是卜徛蹛起點，抑是卜蹛終點？……Soah毋知影講，汝骹手也無比阮較緊，ah汝是卜怎樣替阮裁斷啦？汝敢有法通前、後兼顧？」

「這…這……」龜，予伊問kah舌仔吐吐，soah戇去（gāng- -khì），bōe-hiáng應。

小烏兔看龜應bōe得出來，sī-sōa跳出來替伊解圍。「無按呢啦，裁斷儂嘛…予我iāng啦！橫直，我小烏兔本成（pún-chiâⁿ）teh走，都（to）猶毋捌輸儂，當（taⁿ）加iāng汝一隻龜，無較差啦，共款嘛是贏啦！」，小烏兔講話正摳倒削。

小白兔知影小烏兔講即款話，是對伊來的，是刁工咧刺激儂的，bōe輸存辦（chhûn-pān）咧看衰伊。輸儂毋輸陣，小白兔愈想愈gīn，一口氣吞bōe得落去，伊出聲hoah講「免！裁斷儂，我來iāng。我小白兔毋是予儂heh驚大漢的！」

「好！自按呢決定！小白兔，汝iāng我。我相信汝的本事……按呢，逐个攏無意見啊毋？若無意見，自按呢決定……三儂共五目，過後是毋通有長短骹話……」龜，未等小白兔講煞，趕緊一句話kā伊tu kah死死。小烏兔聽伊按呢講，心肝內嘛咧暗暢（àm-thiòng）。

嗶仔聲tân，比賽開始……
嗶仔聲佫tân，煞鼓。

結尾，siáng贏siáng輸，用骹指頭仔約（ioh）嘛知。

ps. 內文有講「拄好去磕著內底彼隻『老柴龜』……」，從中，『老柴龜』意思kiau普通話罵儂「老東西、老不死」差不多。真正的「柴龜」，拍算普通話講做「獨角仙」抑毋是，橫直毋是龜。

Tagged: 講古