Chêng-kúi-kang-á, ū khòaⁿ-tio̍h “Ē-mn̂g bóan-pò” (廈门晚報) teh pò-tō kóng tòa-tī Ē-mn̂g ê chhiⁿ-mî-lâng “A-liông” kun-kū í-chá ê Bân-lâm-gú koa 《Siang-lâng Chím-thâu》(双人枕頭) ê khiok-tiāu têng-thâu thiam-sû, liáu-āu iū-koh the̍h-khì lio̍k-im-pêng chhiáⁿ lâng ián-chhiùⁿ, lo̍k-im.Bô-lōa-kú liáu-āu, chit-tè koa-miâ hō·-chòe “Kut-jio̍k Chêng-chhim” (骨肉情深) ê sin-koa thâu-chi̍t-pái tiàm Tiong-kok Tiong-iong Jîn-bîn Kóng-pò· Tiān-tâi pò·-sáng, tit-tio̍h chōe-chōe chāi-tōe thiaⁿ-iú ê khéng-tēng. Góa mā chin hò·ⁿ-hiân, chin siūⁿ-beh chim-chiok him-sióng chit-tè koa-khek, put-jî-kò kàu-taⁿ iau-bōe ū ki-hōe. Hiān-chú-sî, góa to̍h kā chit-tè koa ê koa-sû seng tah chhut-lâi hō· lán ta̍k-ê phīⁿ-phang–chi̍t-ē, kok-ūi lēng-ji̍t nā ū ki-hōe, mā thèng-hó ka-kī ta̍uh-ta̍uh-á khì him-sióng.

《骨肉情深》（阿龍作词）

KUT JIO̍K CHÊNG CHHIM

漢字版：

海峽兩岸兄弟姊妹,有閒來相找。手捧酒杯,祝福大家,平安日日過。汝佮我,汝佮我,共款血脈……也是我靈魂一半。毋管是盤山過海,咱嘛毋驚;毋管是千斤万斤,咱嘛敢擔。希望早日永遠作伴,等待的心,等待的心,汝敢會知影。

POJ:

Hái-kiap lióng-hōaⁿ hiaⁿ-tī chí-bē, ū-êng lâi sio-chhē, chhiú phâng chiú-poe, chiok-hok ta̍k-ke, pêng-an ji̍t-ji̍t-kè. Lí kah góa, lí kah góa, kāng-khóan ê huih-me̍h, iā-sī góa lêng-hûn ê chi̍t-pòaⁿ. M̄-kóan sī pôaⁿ-soaⁿ kè-niá, lán mā m̄-kiaⁿ; m̄-kóan sī chhin-kin bān-kin lán mā káⁿ-taⁿ. Hi-bāng chá-ji̍t éng-góan chòe-pōaⁿ (chit-kù kán-ná ū koa-sû làu-kau khì ?) , tán-thāi ê sim, tán-thāi ê sim, lí kám ē chai-iáⁿ.

PS. 閩南有一句俗語,號做”青盲精,啞口靈”…意思是講，凡若身軀無利便的儂(土話講號做”破相”啦），透底(thàu-té)有一兩步仔普通儂比bē著ê功夫。

“青盲精，啞口靈”，這其實毋是啥物歹話，不而過，因爲大多數“目睭無看見”佮“無法度開喙講話” ê儂，性地透底有較暴燥(po̍k-sò),儂講有較孤倔（ko·-khu̍t) to̍h tio̍h啦，所以，有時仔,咱上好是mài當“破相儂”的面來講“青盲精，啞口靈”即句話。無,儂會講咱毋捌(m̄-bat)禮體。

儂講“bái馬嘛有一步踢”，破相ê儂，共款嘛是儂，衹beh肯拍拚，骨力做，in共款嘛會當對社會有貢獻。話佫講倒轉來，有的儂雖然“好骹好手”、 “骹健手健”（kha-kiāⁿ chhiú-kiāⁿ）,不而過，soah“活食死坐”、甘願“食飯khaⁿ中央”、七少年八少年，規日tiuⁿ leh “beh食毋討趁”，坐tòa厝内底“櫻櫻美代子”(êng-êng bô tāi-chì)，“搦虱母相咬”，罔蕩罔過日……汝講，chit兩款儂中間，到底啥儂是有路用的侬，啥儂是無路用儂？

Tagged: 講天講地