Chêng bāng-chām khong-kan poaⁿ-sóa āu, sò·-kù-khò· to̍h piàn kah loān-chhau-chhau. Chêng, lóng bô siūⁿ-beh khì kā chheng, it- -lâi, bô sin-kan, jī- -lâi, pîn-toāⁿ chò chit-lō khang-khòe. Chū án-ne, it-ti̍t-thàu thoa kah kàu téng lé-pài. Chit-pái, sǹg-kóng sī hē koat-sim, beh lâi kā chhiâu hō· hó-sè.

Sò·-kù-khò· loān-bé, chit-lō būn-tê beh chhiâu kah ē chiàⁿ, chiâⁿ-si̍t bô hiah-ni̍h kōe. Chòe-thâu, lán to̍h bô siūⁿ hiah chē, siūⁿ-kóng ti̍t-thàu ji̍p-khì phpmyadmin lāi-té, kā pian-bé ké-chiàⁿ, sūn-sòa koh kā chi̍t-kóa bô-lō·-iōng- -ê chheng-chheng piàⁿ-piàⁿ leh, to̍h hó- -ah…Bô-gî-gō·, tāi-chì choân-choân bô hiah kán-tan, bú kui-po·, iû-goân bô khah choa̍h. Loān-bé chiàu-goân koh tī- -leh, sò·-kù-liōng mā bô khah kiám. Bú kui po·, liân kang soah liáu- -khì.

Bē sí-sim, koh lâi siūⁿ pa̍t-hāng pō·-sò·. Tī bāng-téng chhiau tio̍h chi̍t-kóa sìn-sit, kóng ē-tàng iōng WORDPRESS chū-té ū ê kong-lêng. Gián-kiù chiâⁿ kú, lio̍h-lio̍h-á chhōe-tio̍h liâu-á-mn̂g.

◇. Seng ji̍p-khì WORDPRESS āu-tâi hia, pī-hūn kui-nn̂g-ê bāng-chām ê sò·-kù;
◇. Liáu, iōng FTP (he̍k-chiá kî-thaⁿ pa̍t-hāng ke-si-thâu-á) pī-hūn WORDPRESS bûn-kiāⁿ, kan-na pī-hūn “wp-content” kah “wp-config.php” to̍h ē-sái- -tit.
◇. Koh-lâi, ji̍p-khì PHPMYADMIN, kā sò·-kù-khò· lāi-té ê sò·-kù, choân-pō· thâi-sak. Liáu-āu, “pian-bé keh-sek” m̄-thang bē-kì-leh kàu-tùi. Pí-lūn-kóng, ē-sái kāi chhiâu chò “utf8_general_ci” ê keh-sek. Chit-pō· kiâⁿ liáu-āu, sò·-kù-khò· to̍h piàn khang-khang bô-poàⁿ-hāng sò·-kù, bāng-chām mā chiām-sî bô- -khì. Chóng- -sī, mā ē-sái sin kiàn chi̍t-ê só·-kù-khò· (mài koh ēng kū sò·-kù-khò·), “pian-bé keh-sek” iā kāng-khoán chhiâu chò “utf8_general_ci”. Ūi-tio̍h an-choân khí-kiàn, góa sī sin kiàn só·-kù-khò·.
◇. Koh-lâi, khui liû-lám-khí, kiâⁿ “http://…/wp-admin/install.php”, pháng wordpress kiok-pún, tùi-thâu koh chhiâⁿ chi̍t-ê sin bāng-chām- -khí-lâi.
◇. Chòe-āu, ji̍p bāng-chām āu-tâi, kā siōng tāi-seng pī-hūn ê sò·-kù, tàu tò-tńg- -khì.

Án-ne, chū-thâu kàu-bóe bú kah soah, goân-chāi put-chí-á kāu-kang, koh thiám-thâu. Hó-tit lóng bô thut-chhôe, chi̍t-lō· pêng-an sūn-sī. Bāng-chām sin kiàn- -khí-lâi, sīn-sòa koh oāⁿ chi̍t-tiuⁿ phôe, khoàⁿ tio̍h ke-chiok sin-ian, sim-thâu mā ke-chiâⁿ khoàⁿ-oa̍h.

Ji̍t-tàu ke chia̍h 3 oáⁿ bê.

Tagged: IT