咱有真濟鄉親,佇咱在地出世,在地大漢,會曉講咱的母語,不而過,臨當時,卜叫伊寫,伊soah bōe曉寫,毋知卜按怎來寫。現此時,真濟儂攏有咧上網,佇網頂kiau四海的朋友開講、化仙。若是拄著平平咱厝的儂,鄉親可能tō咧想講,無敢會當用咱厝的話來開講?雖然真濟儂攏有即款想法,想卜用母語來開講,不而過,苦bōe曉得用母語拍字,安呢卜講講bōe出來,毋講又佫艱苦艱苦……總是,卜學會曉拍母語,實實講,嘛無hiah簡單,毋是兩三日就會當學會曉得。我頂chām仔,有建一个QQ群,招三五个好朋友,若有閒,不時就來咧練牙、畫虎膦。Sòa落來,咱卜將網友母語開講的一部分記錄,抄來遮,目的是卜予儂來學寫,來綴(tè)寫。
《母語線頂開講(1)》,前後來開講的儂,攏總有“閒仙仙”、“海龍王”、“太白金星”、“彩雲仙”、“大鵰”五六个儂。下底,請看詳細的記錄——
閒仙仙:
有儂佇咧無?
閒仙仙:
好膽做汝來,無膽毋通來……各位兄弟姊妹、好朋友,有閒出來練仙拍喙股哦。
海龍王:
Mài吵啦,我咧啉燒酒……
閒仙仙:
今仔日下昏(e-huiⁿ)敢無出去?照看,是佇厝的咧啉燒酒的款?
海龍王:
有。頭拄仔,有朋友來。
閒仙仙:
哦。 朋友來,汝佫有閒上網?抑是講,ná練仙,ná咧上網?
海龍王:
啉了,轉去啊……
閒仙仙:
哦。ah汝下昏是啉無濟?無汝佫會上網?
海龍王:
無啦,7~8罐niâ。
閒仙仙:
7~8罐!佫講niâ!?真正卜hông驚死!Ah是..啉啤酒抑是白的?
海龍王:
白的。哈哈……
閒仙仙:
白的?哭夭…是有影無啦?白的,soah有法通啉7~8罐?有遮譀(hàm)??
海龍王:
白的7~8罐,早著升天去囉……Bì-luh啦!
閒仙仙:
哦。著是講嘛!卜tá有可能白的啉7~8罐啦!Bì-luh,安呢嘛較差不多。
海龍王:
臺灣bì-luh汝捌啉過無?
閒仙仙:
臺灣bì-luh毋捌啉過。我拄咧想講,天頂最近拄好卜新招一位神明,汝若真正白的啉7~8罐,安呢估計汝thèng好去thap骹。
閒仙仙:
是講,汝下昏是啉臺灣bì-luh?
海龍王:
毋是啦。臺灣bì-luh真厚,估計4~5 罐,著差不多啊。
閒仙仙:
真厚?汝無啉過哪會知影?
海龍王:
我捌啉過。有咧按算卜做代理。
閒仙仙:
Ah若青島的咧?原封青島的咧?頂過,台灣朋友來,我攏招伊啉“原封青島的”,伊講真好啉,比台灣bì-luh好啉足濟的。
閒仙仙:
汝按算卜做代理?推銷台灣bì-luh?安呢,汝著愛先做市場調查。
海龍王:
不而過,恐驚做bē起來。
閒仙仙:
He著愛看咱遮民眾會接受抑bē。
海龍王:
度數懸,價數嘛懸,估計無通好做。
閒仙仙:
是啦,盡驚是驚講做bē起來。頂幾年仔,台灣有一款老字號的藥酒“三洋維士比”,嘛有來咱福建做推銷(chhui-siau),不而過,做bē起氣(khí-khùi),無儂買,銷路bái死絕(sí-che̍h)去。
海龍王:
所以講,著愛斟酌考慮一下。
閒仙仙:
有影著細膩。儂講“細膩無蝕本(si̍h-pún)”。
海龍王:
哈哈。“汕頭妹仔”是新鳥仔?
閒仙仙:
伊來久久啊,精差罕咧開喙講話。唬!汝頭先hit幅(pak)尪仔圖 真正讚!儂頭佫會安呢hàiⁿ來佫hàiⁿ去,誠好sńg…
海龍王:
咧做風颱,汝這幾日攏無khang-khòe毋?
閒仙仙:
嘛是有啊。風颱做對別位去,雨嘛落無三滴,khang-khòe嘛著照做。
海龍王:
真悿!歹命儂……
閒仙仙:
是啦,代誌ta̍p-ta̍p-tih-tih,真濟,永遠做bē了。所以,儂是苦風颱來,Ah我是苦風颱毋來。
太白金星:
“海龍王”,是酒商?
閒仙仙:
敢是?儂伊是走業務的niā啦。“太白金星”,聽汝安呢講,敢是想卜佮伊交關?
海龍王:
歸日kho̍k-kho̍k-chông,趁無一箍碗糕……
閒仙仙:
這號做“無錢趁,狗咬膦”,蜜婆bak鳥名…
太白金星:
若是酒商,安呢咱毋著khioh規大陣來去伊遐啉燒酒……
海龍王:
隨時咧等……
閒仙仙:
哦。莫怪汝安呢直透咧探聽,原來汝是按算去卜予伊請!我佫想講,汝是卜kiau伊交關。
海龍王:
恁招招咧,做夥來漳州,我來請。
閒仙仙:
呵呵,時到(sî- -kàu),恐驚食kah予汝破產……講別項,咱是無半撇;講著食,無儂比咱較內行。尤其是”太白金星”,伊真正專門有研究的,讚的!
海龍王:
哈哈哈,有內行著好。按怎講咧?
閒仙仙:
毋管是山獐(soaⁿ-kiuⁿ),抑是海鯧(hái-chhiuⁿ),橫直,天頂飛,地骹下趖的,水內泅的,”太白金星”伊逐項to會捌。
海龍王:
He號做“海陸空”食thàng-thàng。
太白金星:
我無啦,“有閒”則是真正有研究的,上無嘛有二步八。
閒仙仙:
無啦,”太白金星”汝安呢講,傷顧謙啦。汝較早敢毋是研究航空的?所以,天頂飛的,汝真正內行的。
海龍王:
看勢是“會飛佫會踏茶鍋”……褲頭掛斧頭——砍膦(khám膦)!
閒仙仙:
哈哈,是啦。汝講伊“會飛佫會踏茶鍋”,bē輸咧講伊是猴仔齊天。……”太白金星”,我講安呢,汝講有影無?
太白金星:
有讀過航空啦……是講,有通猴齊天嘛 bē歹,可惜毋是。
閒仙仙:
毋nā是讀過niā,佫專門有佇咧研究……照汝即陣的本事,有啦,上無…嘛有猴齊天的一半。猴齊天,伊七十二變,ah汝上無嘛有三十六變。佫無,嘛猶有十八變,哈哈……
太白金星:
無變、無變步。
海龍王:
三十六變是大變?是講,天篷元帥嘛拄好三十六變,敢毋是?哈哈……
廣東-溫家人:
閩南有冇“陸文廷睇相”呢句歇後語?(廣州話)
閒仙仙:
“陸文廷”是啥物儂? 是“雙槍陸文龍”in小弟毋?
太白金星:
“溫家人”,笨豬!:)
閒仙仙:
啊?!啥物?“笨豬”?是“豬哥神”毋?
太白金星:
無啦,汝誤會啊啦,“笨豬”是咧講“汝好”的意思啦。
閒仙仙:
“笨豬”是“汝好”的意思?汝毋咧騙鬼?騙我毋捌無讀過冊……
太白金星:
無啦,儂“溫家人”伊是學法語的,“笨豬”是法語 “汝好” 的意思啦。
閒仙仙:
哦…哪會安呢?阿娘喂,ah這法國儂嘛真無禮體,見面無好話,soah罵儂“笨豬”?
太白金星:
毋chiah“溫家人”一下來,我就講 “笨豬”。
閒仙仙:
哦…是講,汝敢是假空…咧kiau伊相借問,ah事實,汝心肝內是真正卜罵伊“笨豬”?哈哈……
太白金星:
無啦。
閒仙仙:
真正鵝(無)?鵝較大隻鴨啦!!
太白金星:
無啦,儂法語是“Bonjour”啦。
閒仙仙:
“Bonjour”是法國語,是“笨豬”?若安呢,“痟豬”是按怎講?
太白金星:
是。不但有“笨豬”,佫有“傻驢”。
閒仙仙:
哦…毋成猴,想bē到,法語汝ûn-à有佇咧研究……
太白金星:
小可仔啦。加少啦。
有閒來坐
汝實在使人欽佩!我決定卜唱一條歌,獻予汝……
太白金星:
無啦,“笨豬”是咧kiau“溫家人”相借問,ah若講“痟豬哥”,用來kiau汝相借問拄拄好。
閒仙仙:
無啦,汝哪會安呢講啦?Ah無汝是卜佫舞啥物齣頭啦?
閒仙仙:
儂咧?哪會雄雄走了了……
太白金星:
“大鵰”,頂日“彩雲仙”講著 in遐有一个詞號做“暴憑(pō-pîn)”,予我想著惠南有“薄民”。比論講:伊 薄民 來(伊臨當時來)。這汝有印象無?
閒仙仙:
“大鵰”無閒,拄仔,天頂有仙女跋落來,伊去咧承(sîn)。
大鵰:
仙女跋落來?有chiah好空的代誌?……“暴憑(pō-pîn)”?“薄民”?……想無,可能阮遮無安呢講。
彩雲仙:
仙女來囉!緊出來接駕~
閒仙仙:
啊?仙女真正跋落來囉!安呢看勢,“大鵰”承無著,跋按我遮來。
太白金星:
Kah 有hiah好空,有通承?承會著,是好狗運。趕緊排隊來去承哦……衝啊!!
閒仙仙:
免衝啊啦!有儂排進前去啊!免了戇力啊!
彩雲仙:
有chiah濟儂卜承是無?安呢,我加叫幾个,叫in隨隨來跋……
閒仙仙:
加叫嘛無效,輪bē著阮。汝毋是講汝是仙女,哪著佫叫?
彩雲仙:
該是汝的,就是汝的。毋是汝的,排較頭前嘛是加了工。
閒仙仙:
是講,我安呢苦苦等咧三十捅年,到taⁿ,嘛攏毋捌承著。 講起來,運氣實在無通好。
大鵰:
上無,汝佫捌看著仙女。
閒仙仙:
不而過,有一个儂運氣比我佫較bái。
太白金星:
Tó落有通承(sîn)?我有一領拋魚的網仔,hiahⁿ來去海邊仔,安呢凊彩 弓咧,看有通加承(sîn)幾个無。
大鵰:
Nà東nà西,七說八說,惠南有安呢說無?
閒仙仙:
“太白金星”,無汝hit領網仔來借我用一下。換我替汝來去承。時到,我若承著,chiah一半个分汝。
太白金星:
安呢,嘛會用得。
閒仙仙:
所以講,汝免煩惱。
太白金星:
本然,有福就應該同齊來享受。
彩雲仙:
這就是兄弟情。
閒仙仙:
無囉!即款代誌卜tó會使公家用啦?
彩雲仙:
有査某仙女,恁佫會相分。
閒仙仙:
無囉!伊若欠錢用,我會當借錢予伊開用。不而過,iah若是査某,呵呵,斷斷bē使公家用!!
太白金星:
“査某仙女”?哈哈哈,仙女soah有ta-po·的?
閒仙仙:
Ā會知?! 可能有的仙女,自底是ta-po·的,路尾,動過手術,soah變做諸母的。哈哈
太白金星:
變性儂我驚嘛soah死!
閒仙仙:
汝也會驚?!我原底毋知影,想講he chiah是汝上愛的……因為進前,汝捌kiau我講,汝上愛去的所在是暹羅(Siam-lô)國,哈哈
太白金星:
承(sîn)偌濟全部予汝。
大鵰:
合(ha̍h)林兄的氣口,哈哈……
閒仙仙:
無啦。我嘛無愛。留予別儂啦……哦,有一个儂,保準伊會合意!即个儂自早捌去咧暹羅牽豬哥。
太白金星:
Tī儂?
閒仙仙:
Lee!!哈哈
太白金星:
哦。
閒仙仙:
汝哪會hiah無記持咧?連即款代誌,汝soah去予bōe記得?無彩當時恁兩儂佫有做陣去……有影真了然!
彩雲仙:
死啊…我的電腦有問題
閒仙仙:
真正是電腦的問題?毋是別項??
彩雲仙:
“大鵰”無代無誌,雄雄講啥物仙女……予恁安呢花來花去,話了了。
閒仙仙:
無啦。儂伊嘛是講出心內話niā啦。哈哈
太白金星:
傻驢! “溫家人”soah惦去囉……
閒仙仙:
“溫家人”,即陣當咧講電話啦…無閒啦……Hit箍“海龍王”,嘛惦去……大鵰嘛飛去……
太白金星:
“海龍王”,酒咧發作囉……
閒仙仙:
哦,有可能。夭壽!安呢看勢,in家後,下暗 穩當 艱苦囉!!可憐,阿彌陀佛……
彩雲仙:
賰恁兩仙老公仔標,家己咧扮公伙仔……
太白金星:
Ah無,汝敢毋是儂?汝是透明的毋?
彩雲仙:
無啦,儂我攏罕得將家己算在內啦……我咧等10點半。
閒仙仙:
等10點半,卜乜代?等約會?
彩雲仙:
10點半,就卜來去睏,即陣傷早睏bōe去。
閒仙仙:
哦。 我想講汝是卜等約會……是講,taⁿ外口咧落雨,約會嘛著看天時!著會記咧攑雨傘,ah無,會去沃kah糊糊,he就悽慘!
彩雲仙:
講著“約會”……卜暗仔,有一位朋友摃電話來,咧卜共我介紹……
太白金星:
“有閒”,汝問kah hiah詳細卜乜代?我知影汝是按算卜去冒充…
閒仙仙:
無啦。我是卜冒充啥貨咧?
太白金星:
冒充hit-gê卜去kiau伊約會的儂kong!
閒仙仙:
哦。我bē安呢做啦。儂我做儂足古意,足忠厚的……彩雲仙,ah是介紹有成無?對方生做有緣投無?
彩雲仙:
無。我無同意,拄好加我6歲足,算來是大衝。我緊推捒(the-sak)。
閒仙仙:
嗯…三六九,有影 相對衝。毋好啦。
彩雲仙:
是。好得,我趕緊找藉口推sak,省咧得失儂。
閒仙仙:
是講,he嘛無的確啦。
彩雲仙:
藉口啦,橫直我猶無想卜嫁,管待伊死。
閒仙仙:
猶無想卜做客?安呢汝是想卜加(ke)thit-thô幾年,是毋? 汝實在足gâu按算!
彩雲仙:
做客?是“嫁”?汝嘛有按算卜做客是毋?
閒仙仙:
哈哈,我ta-po·的,是卜做客按怎?汝毋咧番?!
太白金星:
予儂招咯!
閒仙仙:
呸呸呸……拍手銃…無影無跡,sa咧烏白講!
彩雲仙:
講,也boē死……恁某也無佇汝後壁,汝soah驚儂講?!
閒仙仙:
無啦。這烏影話,毋通烏白謗啦!儂我上寶惜的,著是名聲。
彩雲仙:
哼!我早就講過,汝佇即箍圍位,早就已經無名聲囉……
閒仙仙:
啊?!無名聲囉!有chiah嚴重?!死啊死啊……我毋知影我的名聲soah有hiah歹……
太白金星:
無要緊啦,胡主席,布希,克林頓……in chiah-ê儂聽講佫有某查囝未嫁……汝通去予in招。哈哈
閒仙仙:
胡先生?!拜託咧,in諸母囝 上無 嘛五六十囉!我敢會食hiah歹?!
彩雲仙:
汝嘛40 。
閒仙仙:
我40?! Mài安呢共我刺激啦……我bē堪咧啦。儂我過今年嘛chiah拄拄三十niā,予汝喝四十……真正無瞭解行情。我名聲真正會敗,嘛是予恁害的。
彩雲仙:
He攏嘛是汝家己講的啊!無我哪會知?
太白金星:
儂伊佫一个尾仔諸母囝咧!
閒仙仙:
胡先生佫有一个煞尾仔諸母囝?汝soah會知?
太白金星:
是啊。
閒仙仙:
是講,既然安呢,ah汝哪會無冗早(liōng-chá)動手啦,佫有通輪著我?佫hiah好心卜報予我知?
彩雲仙:
儂”太白金星”頂擺就有講過,是汝家己無記持。儂伊講in是厝邊啊。
閒仙仙:
哦……無啦,汝咧番啊!儂伊頂擺講的是“溫先生”啦,毋是胡先生啦。哭爸啊,汝真正有影七鬥八鬥、tàⁿ七tàⁿ八。
太白金星:
喲,切爾西,看勢會合汝的氣口。儂súi,佫少年!
閒仙仙:
切爾西?是啥儂?是號做…咧切西瓜毋?
大鵰:
切爾西?敢會是德國hit箍諸母總理?
太白金星:
哭爸啊!是克林頓in煞尾仔諸母囝啦…
閒仙仙:
哦。汝無講阮哪會知?我當做是汝卜攑刀切西瓜……嗯,若是克林頓in煞尾諸母囝,這我會考慮看māi。
太白金星:
切爾西,泛泛súi
閒仙仙:
有影無影?害我聽kah喙瀾chhap-chhap-sē,褲底攏chiâu tâm去……
彩雲仙:
10點半囉,來走來走……拄好“大鵰”來接我的班。
閒仙仙:
無啦,我嘛卜來走。
彩雲仙:
我卜來去做仙女去囉……
閒仙仙:
汝卜做仙女?ah有卜跳落來無?我來去承(sîn)……看汝tīa時卜跳落來,通知一聲。承倒來去厝的,做細姨嘛好。
閒仙仙:
哇!真正10點半啊!辦公廳卜關門啊,我嘛著緊來赸(soan)……無,等咧,予儂關去,安呢我下暗hoān-sè著愛關咧辦公廳飼蠓。
閒仙仙:
好!各位,再見,bye-bye!明仔日chiah佫來……
“龍海-海龍王”、“廈門-太白金星”、“南安-彩雲仙”、“惠安-大鵬鳥”
ǔ chí kuá-kâi nâng hēⁿ?