蕃薯伯仔

去予網友號名「紅薯大叔(蕃薯伯仔)的儂(像片是按網路頂抄(chhiau)來的)

即暫仔(chit-chām-á),佇中國的網路頂,有一个號做「紅薯大叔」的名號kài時行,iah汝若是佇咧論壇頂頭看著「紅薯黨」的名號,千萬毋通著驚掠做(lia̍h-chòe)是「共產黨」改名或者(hia̍h-chiá)是新登記的政黨,呵呵。「Ah無,『紅薯大叔』、『紅薯黨』是啥物碗糕咧……」,免著急,小等咧,汝著會知。來講即个「紅薯黨」,chiah無偌久,短短的期間niā,taⁿ已經成做網路頂懸的一个大黨派,強卜佮進前的「醬油黨」(豆油黨)有通比囉,真正是衝(chhèng)kah 掠bē tiâu。

來講舊年,也就是2008年的9月18號,佇咱廈門市集美區的潯江路,chia路邊有一个名號做「紅樹康橋」的房地產佇咧開盤。當當時(tng-tang-sî)的場面,he儂哦,毋是普通濟niā,是濟kah塞倒街(that-tó-ke),濟kah像ná塗米砂(thô·-bí-soa)共款,真正會使講「儂看儂,跤踏跤,頭抵頭,肩挨肩」。當時,有一位當咧排位佔鬮(chiàm-khau)的老阿伯仔,拄好予記者採訪有著,iah嘛有翕像片留落來。按記者的話講,當時即箍老伯仔看起來心情bē bái的款,是歡喜甘願接受採訪的。

這算講是舊年的代誌囉……

Ah目一nih,到kah今年(2009年)的4月18號,照原是佇咧siâng hit-ê所在,siâng hit-ê 樓盤,又佫再開盤來咧銷售囉!情況kiau頂擺卜共卜共,真鬧熱,真ka-ia̍h,儂khoeh儂,人山人海中國儂!照原有排隊,照原排長長,cha- po·,cha-bó·,老的,少年的,大儂,囡仔……hâm-pa-lāng啥物款的儂都(to)有!安呢無打緊啊,講起來嘛真注死,共款又佫是排佇第二位的一个阿伯仔接受記者的採訪。即位接受採訪的阿伯仔,佇咧風聲講「儂出5萬啦,卜買我排的位啦,ah我bē-giàn賣啦」……

記者倒去了後,隨寫新聞報道即層代誌,講「紅樹康橋」hia的厝是賣kah相爭,偌旺tú偌旺 安呢。買厝、賣厝,這本然是無啥物通好稀奇的,chhoàn-chhoàn著是有hit-lō齣頭通變(pìⁿ),安呢社會chiah會鬧熱。來講即節的新聞報道出來了後,真緊真緊,就規廈門攏chiau知囉,厝邊頭尾,巷仔巷sut,逐个攏咧議論即tè樓盤。也就是佇咧即个時陣,佇咧即个坎站,好死毋好,注死毋死,有一个目睭誠金誠利(lāi)的網友去看著即節的新聞,認著hit-ê接受記者採訪的阿伯仔,毋是別儂,正正就是舊年9月18號「紅樹康橋」頭一擺開盤的時陣,接受記者採訪的hit-ê老伯仔!!哭夭…共一个儂啦!是講,哪會chiah拄好?敢會chiah注死?唬唬…敢會是內神通外鬼?敢會是kiau房地產商鬥空(tàu-khang),咧kā消費者裝痟的?有可能哦!嚶(Éⁿ),儂客啊,自古以來,poa̍h-kiáu有鬥空,選舉有柱仔跤(thiau-á-kha),啥物儂敢保證講hit-lō房地產商佇咧賣厝的時陣bē去倩一寡「細漢的」來咧變鬼變怪。Ah毋ku,好佳哉,即陣的儂無hiah好騙ah,即陣的儂已經毋是往過hit款戇戇(gōng-gōng)做、頭犁犁的古意儂ah。汝是地產商,有錢有勢佫靠勢,這無毋著;我是普通的老百姓,無錢無勢佫無權,這嘛無毋著。我無厝通徛,這汝知影;汝卜趁我的錢,這我嘛知影;錢佇我的lak袋,汝我攏知影。逐个若照起工,好來好去,攏好講;我出錢,汝交厝,相安無代誌。汝若卜使漚步(sái àu-pō·),硬卜choāiⁿ,硬卜拐,硬卜諞(pián),歹勢,老百姓雖然無權也無勢,總是,嘛無通予汝hiah好食睏。老伯仔為地產商做「細漢的」,代誌真緊嘛就出破煏空(chhut-phòa piak-khang),he是bē免得。了後,因為即tè樓盤名號做「紅樹康橋」,所以,即箍老伯仔choân予儂keng-thóe做「紅薯大叔」(蕃薯伯仔)。

安呢bē要緊啊,世上(sè-chiūⁿ)的代誌chhoàn-chhoàn就是hiah湊拄坎(chhàu-tú-khám)。老伯仔in 外甥,注死佇網路頂看著in阿舅的像片,認出來,發覺講in舅仔(kū- -á)即mài已經成做網頂的排只儂(pâi-chí-lâng),看到tó-lo̍h,就予儂詼(khoe)到tó-lo̍h,予儂詈(lòe)到 tó-lo̍h…做外甥的儂,看bē克得(bē-khat- -tit),趕緊報予阿舅知。Siáng知影即箍老伯仔,知影了後,soah起呸面(khí-phùi-bīn),自安呢見笑轉受氣,四界投,四界挵,見儂就講伊冤枉,講伊卜維權,又佫發表聲明,諍講伊斷斷毋是地產商飼的「細漢的」(房托)。Ah nā hit-ê上代先跳出來揬破雞胿(thut-phòa ke-kui)的網友,尾仔,嘛佫再出來講伊嘛無十足的證據通證明「蕃薯仔伯」就是地產商飼的「細漢的」,伊講伊安呢做,目的是卜提醒社會眾儂,驚講佇現此時即款流擺(lâu-pái),時機bái-bái,像「蕃薯仔伯」安呢開喙合喙「風龜風神」的形,hoān-tú-sè會去予一寡無天良的地產商利用去,成做儂的棋子(kî-jí)。Ah嘛有網友跟帖訕潲(soan-siâu)兼摳削(khau-siah),講:「做人不能太紅薯」(做儂毋通傷蕃薯)。

Taⁿ chit-siaⁿ,真正鬧熱囉,一儂講一號,隨儂講隨儂的,是烏是白,嘛毋知,有影是「籃內揀花,ná揀ná花」囉!總是,儂佇咧講「儂咧做,天咧看」,到底siáng講的chiah著,he著愛去問天公伯仔。

Tagged:

發佈留言

發佈留言必須填寫的電子郵件地址不會公開。 必填欄位標示為 *

*