QQ是中國儂上合意的在線即時通訊軟體，佇中國上kài濟儂用。我所熟似的，所拄著的少年儂，無一个無用QQ的。有的儂，一个儂著有幾落个Q號。上線QQ，練仙khà-kho̍k、聯繫業務、辦公通訊、朋友問安……會使講是無所不能，無所不用。平平是即時通訊軟體，國產的QQ，比起msn、雅虎通(Yahoo! Messenger) chiah-ê番仔貨，實在加足旺的。QQ雖然講是佔大面，功效也bōe少，不而過，從到taⁿ為止，猶原無支持Uniocde編碼，上加（siōng-ke）會當看著GBK的漢字，iah若是GBK以上的Unicode漢字，伊著無法度正常顯示囉。漢字是安呢，白話字著較濟免講，佇QQ頂面拍有調號的羅馬字，毋是無法度顯示，無著是走choa̍h去。即方面，QQ實在真兩光，嘛予儂真失望。這是啥物原因咧？真簡單，從到taⁿ，毋管是msn、雅虎通、QQ，或者其它別種即時通訊軟體，總是，佇中國in攏是為普通話服務的，並且獨獨為普通話niā。所以，對普通的QQ用戶來講，普通話捷用（chia̍p-iōng）的兩三千个漢字，佫加一寡普通的符號，著真有夠用ah，完全用bōe著GBK以上的Unicode漢字佮符號。逐个攏chiâu知，閩南語用著的漢字佮白話 字，chhoàn-chhoàn攏是GBK以上的Unicode漢字佮符號，所以，若是硬硬卜蹛咧QQ頂頭寫閩南文，無小可（sió-khóa）改造一下，決定是無變步啦。

Sòa落來，咱著簡單來介紹一下，卜按怎對QQ進行改造，chiah會當予伊有法度拍閩南文。猶原是hit句古早話——江湖一點訣，講破毋值錢，請斟酌聽我講sòa落去。

有用過QQ即時通訊的儂攏chiâu知，自底的模，著有設計濟濟尪仔標，用普通話講，這號做「表情圖標」。卜用「表情圖標」的時陣，隨時著會當調出來，並且，每 一个尪仔標攏有伊的快捷鍵，快捷鍵ji̍h落去，相對應的尪仔標伊著會浮出來，真利便。QQ的尪仔標，分做兩部分，除去原模自底合（kah）的，猶佫會當家己設計。家己設計，用現此時較時行的話來講，號做DIY啦，著是講，原模內底本然無，iah咱家己設計的一寡圖片，嘛會當來kā囥入去系統內底，卜用的時陣，共款會當kā調出來用。咱著是按照即个原理，將一寡閩南字，包括漢字佮白話字符號，做成圖片了後，下蹛咧QQ系統內底，卜用隨時調出來用。閩南字尪仔圖，寸尺做偌大，各儂家己去掌握，總是，毋通做傷大，也毋過傷過細，建議佮原模內底的做平大著好。

尪仔圖做好了後，會當一次性匯入QQ系統，嘛會當一个一个匯入去。卜按怎chhiâu，毋免我加講，用過QQ的儂攏全知。咱卜來講的重點是，按怎來設計chiah-ê閩南字尪仔標的快捷鍵，漢字尪仔標較簡單，跳過mài講，主要來講白話字符號的尪仔標。

閩南語的音節，算起來是規大bu，濟kah會驚倒儂。逐个音節，攏有對應的白話字。白話字的符號，較歹剃頭的是調號（六个）、半鼻音（ⁿ）、韻母符號 「o·」。設計QQ白話字尪仔標，毋免將所有的音節攏chiâu做成圖片，kan-ta做一小部分著會用得。下底介紹我設計的經驗，提供予有欠用的儂做參 考。

所以，除去個別，大部分攏是按照白話字正常拍字的方法來設計快捷鍵。另外，我手頭有一份「QQ自定義表情」檔案（.eip格式），有欠用的儂，會當留言kā我討，我會寄電子批（Email）予汝。

全部創好勢了後，著會當佇QQ頂頭拍閩南字囉！按怎，汝有想卜試看māi無？

最後，kā咱逐个報一个閩南語的QQ群——「有緣來做夥」，群號是81229762，歡迎四圍八達，會曉講閩南話，並且會曉寫閩南文的朋友，加入即个QQ群，鬥陣來開講，練仙tak喙股。感謝各位。

Tagged: 母語技術, 輸入法