每一種語言攏有一定的語法、語音標準，超出即个范圍者，著是「無標準」。唸毋著音、呼毋著調，這號做「choa̍h音」。咱儂的語言，是自然語言，會變會轉，這是無毋著。雖罔是安呢，語言佇某一个時代又佫是相對固定不變的，著是因為安呢，chiah形成一定的規範佮標準。簡單講，規範、標準，可比一條索仔，共語言本身，hām佮使用語言的所有社會儂，束縛tiâu咧。所以，嘛chiah有「正音」佮「choa̍h音」即兩个相對的概念。

正音、choa̍h音，當然只不過是相對的概念nā-niā。現此時是正音，無的確佇往過幾百年前soah kan-ta予儂當做choa̍h音niā；反倒轉，即mái咱講是choa̍h音，iah毋佫佇幾百年前hoān-sè是正音。瞭解即个道理，來講sòa落去，嘛chiah有意義。

閩南語，普略仔來講，會當分做三大音系——漳音、泉音、廈音。每一个音系又佫湠叉（thòaⁿ-chhe）做濟濟種無共的腔口。像咱定定咧講某物儂是漳浦腔，某物儂是同安腔，某物儂是晉江腔、南安腔、惠安腔、龍海腔、雲霄腔、安溪腔、廈門腔、鹿港腔、宜蘭腔……hâm-pa-lāng所有chiah-ê腔，濫摻來組成閩南語（漳泉語）語言系統。若是有佮即个系統無相匹配的，咱講he著算是無正。

有一寡情況是，個別儂唸無正，是個性的問題，帶有偶發的性質。另外有一款較嚴重的，比論講有某一个所在，某一个韻部，全部攏chiâu唸tâⁿ誤。即款情形，往往來講是有一暫ā，毋是最近chiah起變的niā。這比論講，佇漳州龍文區、薌城區hit tah（屬龍溪腔），前、後鼻音唸對調；泉州石獅市（屬晉江腔）半鼻音（鼻化韻）拍無去；閩台濟濟少年家/g/子音（聲母）拍交落（phah-ka-la̍uh）……像即款規phâng規片唸無正的，因為年久月深，taⁿ有的已經定型成做新的腔口。所以，這真正過頭繁複，毋是三兩句話講會當清楚。咱今仔日，上主要beh來探討頭一種情形——帶有非共性、偶發性、習慣性的choa̍h音。咱sòa落去，beh直接用例字的形式來講解。總講一句，我是起一个頭niā，朋友nā有beh補充，ia̍h者是有任何的意見佮建議，歡迎做伙來探討，有話盡講，毋免客氣，嘛免歹勢。Thank you.

【正音字例】（下底正音字例，kan-ta列廈門音。漳音、泉音按規律替換）
我：正音「góa」，偏音「oá」，【汝我】【我的】
阮（俗）：正音「gún、goán」，偏音「ún」，【阮厝】【阮的】
原：正音「goân」，偏音「oân」，【原因】【原底】
寓：正音「gū」，偏音「ú、ū」，【公寓】
遇：正音「gū」，偏音「ú、ū」，【待遇】
愉：正音「jû、lû」，偏音「û、î」，【愉快】
虞：正音「gû、gî」，偏音「û、î」，【姓虞】【虞美人】
疑：正音「gî」，偏音「î」，【多疑】【疑問】
語：正音「gú、gí」（泉音：/gɯ/），偏音「bú」，【語言】【英語】
牛：正音「gû」，偏音「bû」，【牽牛】【牛角】
危：正音「gûi」，偏音「ui」，【危樓】【危險】（又，「hûi-hiám」〖漳〗）
業：正音「gia̍p」，偏音「ia̍p」，【業產】【造業】
葉：正音「ia̍p」，偏音「gia̍p」，【葉先生】【姓葉】
悅：正音「oa̍t」，偏音「goa̍t」
越：正音「oa̍t」，偏音「goa̍t」，【越南】【越頭】
澳：正音「ò」，偏音「àu」，【澳门】【澳洲】【澳大利亚】
奥：正音「ò」，偏音「àu」，【奥运】【奥妙】
歉：正音「khiàm」，偏音「khiám」，【道歉】【歉意】
產：正音「sán」，偏音「chhán」，【生產】【產量】【業產】
刷：正音「soat」，偏音「soa」，【印刷】【攄卡】（lù-khá，＝刷卡〖普〗）
佩：正音「pōe」，偏音「phòe」，【欽佩】【佩服】
牽：正音「khian」，偏音「chhian」，【牽掛】
尚：正音「siōng」，偏音「sióng」，【高尚】
院：正音「īⁿ」，偏音「ìⁿ」，【院長】【立法院】
寂：正音「che̍k、chi̍p」，偏音「siok」、「sioh」，【寂寞】
傳：正音「thoân、toân」，偏音「chhoân」，【傳呼】【傳真】
侵：正音「chhim」，偏音「khim」、「khin」，【侵犯】【侵門踏戶】
激：正音「kek」（kiak），偏音「khek、ke̍k、kia̍k」【刺激】【激動】
彙：正音「lūi」，偏音「hōe」【語彙】【彙編】
澤：正音「te̍k」（泉音：tia̍k），偏音「che̍k」，【毛澤東】【江澤民】
衷：正音「tiong」，偏音「chiong」，【苦衷】
植：正音「si̍t」，偏音「ti̍t」、「chi̍t」，【植物】
殖：正音「si̍t」，偏音「ti̍t」、「chi̍t」，【養殖】【殖民】
復：正音「ho̍k」，偏音「hok」，【光復】
複：正音「hok」，偏音「ho̍k」，【複雜】【重複】
艦：正音「lām」，偏音「kàm」，【軍艦】
霓：正音「gê」，偏音「nê」、「nî」，【雲霓】【霓虹燈】
援：正音「oān」，偏音「oân」，【支援】【援助】
泳：正音「éng」，偏音「ióng」，【游泳池】（又，「ióng」〖漳浦〗）
微：正音「bî」，偏音「ui」，【輕微】
薇：正音「bî」，偏音「ui」【薔薇】
湄：正音「bî」，偏音「mûi」，【湄洲】
埔：正音「po·」，偏音「pó·」，【大埔】【狗屎埔】
費（姓）：正音「pì」，偏音「hùi」，【費玉清】【費翔】【費孝通】
迎：正音「ngiâ」（話音）、「gêng」（文音），偏音「giâ」、「êng」，【迎神】【歡迎】
俠：正音「kiap」，偏音「hia̍p」，【大俠】
潛：正音「chiâm」，偏音「chhiân」、「chiân」，【潛水】【潛力】
態：正音「thài」，偏音「thāi」，【態度】
代：正音「tāi」，偏音「tài」，【代表】
晚：正音「boán」（文音），偏音「oán」，【晚會】
恐：正音「khióng」，偏音「khóng」，【恐驚】【恐龍】【恐怖】
臥：正音「gō」，偏音「ō」、「ok」，【臥鋪】【臥虎藏龍】
末：正音「boa̍h」，偏音「mo·、mo̍·h」，【藥末】【粉末】
沫：正音「boa̍h」，偏音「mo·、mo̍·h」，【泡沫】
沒：正音「bu̍t」，偏音「boa̍t」，【沒收】
颱：正音「thai」，偏音「tai」，【做風颱】
賴：正音「lōa」，偏音「nōa」，【姓賴】
纖維：正音「chhiam-î」，偏音「chhian-ûi」，【粗纖維】【纖維素】
音樂：正音「im-ga̍k」，偏音「im-ba̍k」，【音樂會】

Tagged: 正字, 正音, 稽考