——古早漳泉在地歌

陳三受氣無做聲，雨傘攑起著卜行。Tân Saⁿ siū-khì bô tsòe-siaⁿ, hō·-soàⁿ kia̍h-khí to̍h beh kiâⁿ.
包袱背起在身上，毋甘毋願轉泉城。Pau-ho̍k phāiⁿ-khí tsāi sin- -siōng, m̄-kam m̄-goān tńg Tsoân-siâⁿ.
五娘看見亂紛紛，心想無計叫益春。Gō·-niû khoàⁿ- -kìⁿ loān-hun-hun, sim siūⁿ bô kè kiò Iah-chhun.
我爹毋甘予伊去，益春汝著去留君。Góa tia m̄-kam hō· i khì, Iah-chhun lí to̍h khì lâu kun.
三哥卜轉是汝事，卜留卜去阮毋知。Saⁿ-ko beh tńg sī lí tāi, beh lâu beh tńg gún m̄-tsai.
姻緣好歹娘福分，並無半點分益春。In-iân hó-pháiⁿ niû hok-hūn, pēng bô poàⁿ-tiám pun Iah-chhun.
Kán汝即事免驚慌，留轉恩情毋敢忘。Kán lí chit tāi bián kiaⁿ-hong, lâu tńg un-chêng m̄-káⁿ bōng.
娘汝說話若有定，予kán親身去留兄。Niû lí seh-oē nā ū tiāⁿ, hō· kán chhin-sin khì lâu hiaⁿ.
三步拚做兩步行，好喙著叫陳三兄。Saⁿ-pō· piàⁿ tsòe nn̄g-pō· kiâⁿ, hó-chhùi to̍h kiò Tân Saⁿ hiaⁿ.
手接三哥雨傘尾，小妹留兄是著聽。Chhiú chih Saⁿ-ko hō·-soàⁿ-bé, sió-bē lâu hiaⁿ sī to̍h thiaⁿ.
儂說有苦也有甜，月食也會再重圓。Lâng seh ū khó· iā-ū tiⁿ, ge̍h- -si̍t iā-ē koh têng îⁿ.
若有言語來相諍，三哥汝著放一邊。Nā ū giân-gú lâi saⁿ chìⁿ, Saⁿ-ko lí to̍h pàng-chi̍t-piⁿ.
阮娘真心愛汝轉，毋通害伊刈心腸！Gún niû chin-sim ài lí tńg, m̄-thang hāi i koah-sim-tn̂g!
陳三聽說氣憂憂，都是恁娘毋收留。Tân Saⁿ thiaⁿ seh khì-iu-iu, to-sī lín niû m̄ siu-liû.
恁娘無心假有意，挑工叫汝來相纏。Lín niû bô-sim ké ū-ì, thiau-kang kiò lí lâi saⁿ tîⁿ.
都是益春汝留阮，今我半句毋聽伊！To-sī Iah-chhun lí lâu gún, taⁿ góa poàⁿ kù m̄ thiaⁿ i !
益春再勸陳三兄，千萬停跤毋通行。Iah-chhun tsài khǹg Tân Saⁿ hiaⁿ, chhian-bān thêng khaⁿ m̄-thang kiâⁿ.
阮娘佮汝真情意，當初才會tàn荔枝。Gún niû kah lí chin-chêng-ì, tong-chho· chiah-ē tàn nāi-chi.
姻緣到尾會成器，毋通一時苦傷悲！In-iân kàu-bé ē sêng-khì, m̄-thang chi̍t-sî khó·-siong-pi.
三哥著聽小妹勸，夫妻恩愛是久長。Saⁿ-ko to̍h thiaⁿ sió-bé khǹg, hu-chhe un-ài sī kú-tn̂g.
今日留哥若毋轉，小妹一身僫擔當。Kiaⁿ-ji̍t lâu ko nā m̄ tńg, sió-bē chi̍t-sin oh tam-tng.
陳三聽說有實意，包袱雨傘放予伊。Tân Saⁿ thiaⁿ seh ū si̍t-ì, pau-ho̍k hō·-soàⁿ pàng hō· i.
恁娘有心卜留阮，姻緣事誌無相欺。Lín niû ū-sim beh lâu gún, in-iân tāi-chì bô saⁿ khi.
益春共伊說透枝，月老推遷無差移。Iah-chhun kāng i seh thâu-ki, goa̍t-ló the-chhian bô chha-î.
包袱雨傘我收起，姻緣成事會有時。Pau-ho̍k hō·-soàⁿ góa siu-khí, in-iân sêng-sū ē iú-sî.
陳三聽說從伊勸，兩儂相招入厝門。Tân Saⁿ thiaⁿ seh chiông i khǹg, nn̄g lâng saⁿ-chio ji̍p chhù-mn̂g.
五娘看見陳兄轉，親身出來見三郎。Gō·-niû khoàⁿ-kìⁿ Tân hiaⁿ tńg, chhin-sin chhut-lâi kìⁿ Saⁿ-nn̂g.
三哥受氣是毋通，五娘是汝的親儂。Saⁿ-ko siū-khì sī m̄-thang, gō·-niû sī lí ê chhin-lâng.
愛君轉來是實意，暝日思想無停時。Ài kun tńg- -lâi sī si̍t-ì, mî-ji̍t sū-siūⁿ bô-thêng-sî.
荔枝毋是tàn chhit-thô，配伊林大永是無。Nāi-chi m̄-sī tàn chhit-thô, phòe i Lîm Tōa éng sī bô.
汝且後堂去安歇，五娘毋敢誤三哥。Lí chhiáⁿ āu-tn̂g khì an-hioh, Gō·-niû m̄-káⁿ gō· Saⁿ-ko.
荔枝手帕為表記，月老推遷定佳期。Nāi-chi chhiú-peh ûi piáu-kì, goa̍t-ló the-chhian tiāⁿ ka-kî.

Tagged: 古早歌仔