Taⁿ網路頂，關係blog的iân-jín，會當講是百百款，著親像汽車的動力共款，真正濟kah塞倒街。從中，wordpress thèng講是一粒一的好物仔。wordpress毋但仔本身根底好，另外koh會當匹配真濟優秀的插件（plugin）。咱來做一个比論：一頂馬車beh 走會緊、走會遠，代先愛看即隻馬是毋是會勇健（ióng-kiāⁿ），gâu走koh有擋頭；koh來愛看車桿、車手、車斗、車身、車棚、車輾、椅坐hâm-pa-lāng配件是毋是攏有ân-tan，會堪得受力。“馬”佮“配件”，兩項攏真要緊，欠一項to bōe-ēng得！WordPress網站著可比是一頂馬車，wp系統程式本身可比是“馬”，插件可比是馬車的配件。配件品質若好，馬車著會走較緊、擋較久；插件若讚，wp-blog網站著會加真水氣、加真有活力。

網路頂早早著有咧時行一个“中文WP”的插件，號做“中文工具箱”，是專門咧配合中文版的wp用的。中文工具箱開發，量其約仔佇咧兩三年前，開發者是“桑林志”的主儂桑葚。中文工具箱，伊的設計思路，上主要著是beh共“wordpress隨機文章”hām佮“wordpress評論”即兩款插件的功能khioh-oá，合合（kap）做一个插件。桑葚佇咧介紹“中文工具箱”的功能的時陣，寫講：

“用来解决官方 WordPress 没有照顾到的中文相关问题。使用这个插件，你可以显示随机文章，最新留言，留言最多文章，发表评论最多的网友，以及真正的文章摘要（如果你的模板里使用的是the_excerpt()来调用内容的话）等等，真正截断，没有乱码。”

著是憶著（it-tio̍h）chiah-ê功能，濟濟wp站長講著中文工具箱，攏嘛o-ló kah會觸舌（tak-chi̍h）。不而過，有一好無兩好。從（chêng）舊年尾wp版本翻新做2.3.3了後，“中文工具箱”soah雄雄pai-kha去。因為從wp2.3.3即版開始，wp程式本身著有合（kah）widgets（坦邊欄插件），ah若即个widgets拄好佮“中文工具箱”相沖，無法度鬥做伙用。

widgets本然著是不止讚的傢俬頭仔。真濟wp-blogger為著保全widgets，姑不而將放捒“中文工具箱”，實在有影真無彩。怨嘆罔怨嘆，是講，敢真正無法通一兼二顧？為著解決即个問題，四界去走chhōe國內外的插件。儂講有心拍石石成穿，有心開山山成園，予咱jîm著一款名號做samsarin的插件，拄仔會當治即个症頭。samsarin_php_widget插件，講破 事實是widgets的配件，通（thang）增強widgets的功能，予widgets佇坦邊欄嘛有法度編寫PHP代碼。

會當佇坦邊欄寫PHP代碼！真好！安呢拄好通（thang）用坦邊欄的PHP代碼來調用“中文工具箱”插件的語法。讚啦～

Tagged: IT