（即个古，是照“晉江電視台”《僑鄉頻道》共名節目落去改編的，改編者：Limkianhui）

紫帽山佇晉江西北勢的紫帽鎮，算做是戴雲山脈在佇東南即勢的一條尾溜。紫帽山佮泉州清源山是“對山”，遠遠攏會得通相看。清源山，石頭生做三角六耳，實在有出名；紫帽山，光景夠pān水，確確嘛是儂看儂謳咾。紫帽山攏總十二粒山頭，伊的形，著ná親像古早的烏紗帽，頂面佫定定有hit號茄花色的雲霧佇咧框來踅去，看着bōe輸一頂茄花色的帽仔，毋chiah號做“紫帽山”。紫帽山上蓋懸的所在517.8公尺的海拔。古早儂講“山不在高，有仙則名”，確確是安呢。一座山，卜出名，毋nā光景愛水，佫較要緊的是愛有文化做根底。紫帽山歷來著是hiah-ê斯文儂或者公子爺愛來的所在。明朝有一个理學家，講起來嘛是咱晉江的才子，伊名號做陳琛，伊是真合意這紫帽仔山，應信將家己的字號換做“紫峰”。陳紫峰是晉江陳埭涵口儂，明朝成化十三年出世，也著是西元1477年。伊少年的時陣，捌蹛咧紫帽山主峰的金粟洞小丹邱古元室讀書，後來中進士，做官做到吏部考功郎中，食老無愛佫做官，倒轉鄉里，69歲過身了後，風水著做佇紫帽山hit-tah的秀林山。

講起陳紫峰，佇泉州南門外，通講是大細漢囡仔 通儂知，伊大號叫做“泉州第一通”。通甚物啊？著是講伊咧對“聯對”真有本事。

古早儂讀書佮即陣無相同（saⁿ-tâng），毋免讀即號數理化、英語、歷史、政治，hit-ê時代，逐个儂攏總專專咧攻四書五經，吟詩作對。對“對仔”通儂會，不而過懸下手ûn-á差真濟。古早時，有一个地主，生一个戇囝，食kah一二十歲，厝內倩的教冊先生，一个來一个去，來去bōe輸ná走馬燈，換去卌八个，串串教伊bōe曉，jīm教to bōe出脫。地主為著這，是苦佮ló·，煩惱罔煩惱，iah嘛無法度。儂講“教囝泅，毋通教囝peh樹”， 串串著是hit-ê地主婆，定定替即箍戆囝咧瞞來騙去，牽拖先生差氣、頇顢教冊，攏無認路家己的後生較戇儂。有一工，地主又佫咧問in囝冊讀了怎樣，地主婆趕緊應講：哇，即暫進步iá大噢！地主聽安呢講，著喝in囝來，想卜當面共伊考看māi。伊共in囝講“我出一个第一簡單的，予汝對——‘天對啥？’”天對卜啥貨咧？即箍戇囝頭攑懸懸，雙目看天，想規半晡，想bōe出來。看伊的形，孝呆面孝呆面，親像瞻頭鵝共款，戇戇tsû-tsû。地主婆愈看愈食急，趕緊伸手偷指塗跤，卜教in囝“天對地”。戇囝看in老母暗靜偷指，真正歡喜，tsoân順著伊手指的所在看去。戇囝看著塗跤兜一pû雞屎，臨當時目睭soah搋開開，大聲喝講：我知影囉！地主婆著叫一聲“乖囝的啊，天對啥，汝毋著緊講”。戇囝喙唇mauh咧mauh咧，喙瀾連吞幾落喙，chiah應講“我知，天對…雞屎！”地主一下聽，氣kah面仔烏tè-tè，手曳咧，按喙phòe著卜共伊巴落去。地主婆看老爺手咧振動，知影代誌毋好，未等伊搧落來，著緊緊述過去共伊掠tiâu，好喙苦勸老爺“毋好受氣，乖囝穩當一時慌場，chiah濫糝應。這無准算，佫出一對，保證會曉對”。地主對喙應講“也好，恁爸佫問汝，老爸對啥貨？”地主婆想講即條佫較簡單，著指家己。戇囝一下看，老母仔手搭咧胸前，著應講“老爸對ni”。即聲，地主氣一下規腹血險險bū出來。此去，即句“天對雞屎，老爸對ni”的笑詼古，嘛自安呢直直傳落來囉。

陳紫峰著無saⁿ-sâng囉，hit-ê戇囝ná卜kiau伊比，的確是一个天頂，一个地跤下，真正 天差咧地 著tio̍h啦。陳紫峰自細漢聰明（chhang-miâ），不時安呢四界拋拋走，真活潑，真跳鬼。伊七、八歲的時節，拄著鄉里祠堂咧做“春祭”儀式，鬧熱佫盛大，三牲五味排kah滿滿是，大儂囡仔挨來捒去，真正是儂khoeh儂，人山人海中國儂。陳紫峰儂細漢，khoeh bōe入去，tsoân順著祠堂廳前的石獅仔爬起去，僕蹛咧頂面的橫匾的看鬧熱。眾儂來到祠堂，計計十二萬分的誠意佇咧拜，雄雄看見有儂瘼蹛祠堂頂，實在對祖宗大不敬。眾儂發落共伊捎落來，喝縛喝拍。Hit陣，有一个鄉里老大出來講話“聽咧講汝陳紫峰誠巧誠聰明，囡仔佻仔niā，著有會曉得對對仔。我今仔日出一个對仔，汝若對會出來，阮著放汝倒去”。老大看見供桌頂頭有一枝祭祀用的鳥銃，一時有主意，著出一對“銃入藥，藥入銃，銃彈濃煙散霧”。陳紫峰聽了，目睭相來相去，看見桌頂一支插花的花矸，著行過去，無紛無會，花矸chang咧，做伊按土跤的出力摔落去。眾儂一下看，閣較受氣，十喙九尻川，蹛咧肏幹khiāu。“恁娘較好哩啊，猴死囡仔，有影kài可惡！對仔汝無卜對，佫敢摔破花矸？！共伊縛起來！毋通予伊走去……共雷公借膽……”一時，喝圍喝掠，bōe輸咧包猴仔，ná圍ná過來。陳紫峰毋但無驚，顛倒soah咧歡喜，大聲嚷講“我對出來囉”。是對甚物碗糕咧？伊手比塗跤，念講“矸插花，花插矸，矸破落花流水”。眾儂一下聽，“哼，ah著bōe歹！”句tāu清，對kah齊斬齊斬，bōe輸肉伯穿肉姆的褲，是安呢鬥搭鬥搭。有儂指桌頂“九節蝦”，卜陳紫峰佫對一對。陳紫峰大曳大曳做伊行倚去，手伸長著mi，lak一把九節蝦起來，擘開著ná咧食。眾儂拄卜起狂，soah聽陳紫峰喝一聲“我對‘五爪龍’，水無？！”眾儂聽了，相爭喝好。即聲，蝦嘛予伊白白食去。

Hit个鄉里老大猶佫毋甘願，又佫出一對，講“雪造觀音，日出歸南海”。即對較僻，陳紫峰一時對bōe出來。鄉里老大暢kah喙笑目笑，想講即幫穩伊贏囉，著喝講“共伊縛起來，掠來草間仔關”。四个後生家聽老大有聲，隨chhi過來，掠跤掠手，共陳紫峰規个攑咧頭殼頂，扛出祠堂外。陳紫峰hông插咧天頂尾，頭向天，看見天頂白雲一蕊一蕊，隨在風飛來飛去，雄雄有主意，自安呢大聲哀叫“緊共我放落來，我會曉對囉”。眾儂問伊對啥貨，伊著念講“雪造觀音，日出歸南海”，通對“雲搖羅漢，風吹對西天”。確確有影對kah和和和、bā-bā-bā！眾儂無伊法，汝看我，我看汝，親像啞口硩死囝——無話講。逐个看破認路輸，目金金看伊大曳大耀斡倒去。

佫一擺是陳紫峰一个親堂辦喜事，卜請紫峰in老爸去鬥相共。拄好in老爸去外口，無佇咧。In老母叫紫峰去替。紫峰hit陣仔chiah十捅歲，佇灶跤共儂鬥擇蔥洗菜、破柴燃火，真搰力做，舞kah大粒汗細粒汗。廚煮師疼惜伊，問伊講“紫峰啊，聽儂講汝真gâu對對仔，我taⁿ出一个予汝對，卜毋？”紫峰對喙著應伊講“汝做汝出咯，我對看māi”。Hit時，廚煮師拄好咧炒鱟肉，著講“鱟杓也是鱟，鱟肉也是鱟，鱟勺hô·鱟肉，鱟hô·鱟，hô·到日過晝”。紫峰看著壁邊拄仔好一支鐵錘，順喙應講“鐵錘也是鐵，鐵釘也是鐵，鐵錘摃鐵釘，鐵摃鐵，摃到腹肚枵。逐个講對安呢有通無？”。臨當時，所有圍來看鬧熱的儂攏謳咾講“通通通，紫峰真真是泉州第一通”。

Tagged: 講古