“當后何如當妓樂”（Tong hō· hô-jû tong ki lo̍k），即句話是南北朝時期北齊的胡太后講的，意思是講”做皇后無通做婊的暢（thiòng）”，相信真濟儂聽了後攏會笑kah落下骸。俗語講，一樣米飼百樣儂，世間十色儂，各儂穡路無相共（sio-kāng）。各項職業在本無應該分好歹、懸下（koân-kē），儂伊胡太后興做即途，倒咧趁，佫有通爽，這是儂的自由。香港有一齣电影號做《性工作者十日談》，當中，有一个趁食諸姥，名號做”happy”，伊講伊對家己的要求著是做一个樂暢的妓女，做即途愛即途，總是較按怎講，著oân-á感覺有淡薄仔是咧強逼家己苦中作樂，心頭未免會酸酸搐搐（tiuh-tiuh）。總是，儂胡太后伊是真真正正的”happy”，即種情形，確實有較罕見。是講，因何做皇后soah會較輸做婊？請聽我來詳細講sòa落去。

胡氏本然著是一个美人，出世佇大厝宅的好額儂兜，伊後頭厝oân-á算講有頭有面的pâi-chí儂。朝廷選美的時陣，胡氏因為生做出擢（chhut-tioh），選有著khau，入宮了後，冊封（chhek-hong）伊做長廣王妃。武成皇帝高湛繼承北齊皇位了後，又佫封伊做皇后。不而過，胡氏soah得bōe著皇帝的疼愛佮寵恿（théng-sēng），伊oân-á佮濟濟嬪妃共款，予武成皇帝tàn咧邊仔，有棺材無靈位。總是，胡太后伊毋甘鬱蹛深宮守活寡，自安呢想空想縫，變東變西，七創八創。

“初武成時,后與諸閹人褻狎”(Chho· Bú-sêng sî, hō· ú tsu iam-jîn siat-ha̍p，《北齊書》)，這是咧講”武成帝初期，胡皇后定定hām宮中的太監佇咧hiâu痟，牽猴捙跋反（chhia-poa̍h-péng）”，論真講是較齷齪（ok-chhok）淡薄。後尾，胡皇后真正bā著一个契兄公，即个儂著是皇帝的親信，姓和，名士開。聽咧講，和士開生做嫣投佫飄撇，兩个儂一下見面，著親像紅毛土去chhiau著沙，粘kah密密密（bā-bā-bā）。像即款”花齣”（hoe-chhut），佇南北朝即个花kô-kô的朝代來講，實在無算啥。武成帝家己貪戀大嫂，攏無咧管皇后佇遐咧變啥魍，照原重用和士開，嘛照原予胡氏做皇后。即對翁仔姐（ang-á-chiá）真正是隨儂chhit-thô隨儂的，相予無干礙，互相無怨慼（oàn-chheh），有影比現代儂佫較開化。

歷史記載，南北朝大多數皇帝攏tsiâu tsau酒色，將國家大事放一邊，即个武成帝嘛共款未免得。佇和士開的勸說之下，武成帝將皇位讓予胡氏的囝，也著是太子高緯。此去，自安呢二線退休，專心享樂。胡氏嘛按皇后升做太后。短命的皇朝，出短命的皇帝，三年後tsau色過度的武成帝冗早（liōng-tsá）轉去蘇州賣鴨卵。此去，胡太后佮和士開兩个儂中間，著無佫像較早安呢掩掩挹挹（ng-ng-iap-iap）、偷來暗去，顛倒soah那來那公開，舞kah通世界的儂攏tsiau知。和士開hia-pai一時，無疑悟soah招來殺身之禍，真緊著予高緯的小弟高儼設計害害死。契兄無去（bô- -khì），胡太后鬱tsut罔鬱tsut，局不局著佫另外chhōe寡齣頭來變。無偌久了後，和尚咧蹛的寺廟，成做伊的目標。歷史上，關係後宫的風花 契兄代，通講是有痕通巡，有tsōa通掠（lia̍h），hiah-ê契兄公嘛透底攏tsiâu一寡太監、近臣，iah無著是和尚，chiah-ê有的無的。皇宫佮寺院，通講是嬪妃獨獨會當行動（kiâⁿ-tāng）的所在，普通時仔會得通佮chiah-ê嬪妃相交插（sio-kau-chhap）的儂，無非嘛chiah幾種儂niā。

胡太后從（chêng）佮和尚昙獻私通了後，差不多通儂知，佫hàm kah連”龍床”嘛搬kah按寺廟去。即層”見笑代”，雖罔眾儂知，不而過，獨獨高緯毋知。有一擺，高緯看太后身軀邊有兩个尼姑生做白拋拋，細咪咪，著吩咐（hoan-hù）下跤手儂 專工去叫來服侍伊，siáng知影，衫褲剝落來了後chiah知講oân-á”公的”（諸夫的），槌摃槌。噹時仔即兩个thu̍t仔著是太后刁持（thiau-tî）安排入宮作樂的”猴公”。代誌煏空（piak-khang）了後，胡太后hông掠去軟禁佇北宮，bōe當烏白行動（kiâⁿ-tāng），出入全無自由。好哩佳哉，無偌久了後，北齊亡國。哪知影，代誌無hiah拄好，破厝佫偏偏去拄著雨漏。胡太后佮高緯的皇后，大家新婦（ta-ke sin-pū）兩个儂同齊落難，佇長安城四界（sì-kòe）討三頓。路尾，真正kàu-kah進無路，退無步，又佫 同齊 予 妓女戶 收留，tsiâu-tsiâu潦落去做婊。按”母儀天下，眾儂拜”，臨當時（liâm-tong-sî）變做”倒咧眠床，眾儂chhāi”，bōe輸 按 天頂 一下手仔 雄雄 跋落到 地跤下。即款的變換，若普通儂早著無法度接載（chih-tsài）。Ah毋佫，胡太后soah顛倒興phut-phut，暢kah，歡喜kah 強卜 歪風去！伊謝天佫謝地，感謝運命有即款的安排。按烏暗暗的深宮鑽出來，來到即个花花世界，伊真正暢（thiòng）一下險險仔起痟。Hit當時，伊拄仔40歲跤兜（kha-tau），雖罔是半老老（poàⁿ-ló-lāu）的歲子，看起來猶原佫是老súi老súi。聽講北齊的皇后、皇太后 雙雙 潦落 諸姥間（tsa-bó·-keng） 咧趁食，全長安城攏tsiâu驚著，成千成百的諸夫儂（tsa-po·-lâng）按四圍八達拼來到長安城，透暝排長龍卜來捧場。

若換做別儂，凡勢早著見笑吊脰，投胎轉世去囉，iah毋佫，胡太后soah bōe安呢想。伊拍算做婊毋是啥物見笑代。做太后是按怎soah bōe比得做婊的樂暢（thiòng）咧？胡太后家己自然有一套哲学佇咧，著是講，萬項代誌，快樂上要緊。做婊毋免像皇后、太后安呢，假大端（tāi-toan）、假淑女、假貴氣、假仙假tak。若照即陣的時代來講，胡太后通講是”性開化”先鋒隊的隊長。雖罔濟濟儂thóe-thak伊”鱟母、邪神、破媌（phòa-bâ）”，iah毋佫，在咱看來，胡太后oân-á不止仔古錐。上無，伊bōe想講職業著愛分好歹、懸下 安呢。伊即款境界，實在比普通儂加真開化。

Tagged: 講古