設使汝常在(chhêng-chāi)有咧寫閩南文，汝定著需要一套好用的“漢字輸入法”，佮一套好用的“POJ”輸入法（假使汝有咧寫POJ）。這是上起碼的傢俬，若汝無即套傢俬，我實在想無汝卜用啥來做工課(khang-khòe)。 閒閒無代誌，我想卜共逐家報告一寡仔普通時仔較有咧用的“閩南語輸入法”，若是佗位講毋著去，請知影的儂來指教。

一、【漢字輸入法】
漢字輸入法，我揀“方旻五筆”。 “方旻”有足濟版本，攏差無濟，透底支持“GBK漢字擴大字元集”。只卜汝會曉普通的五筆輸入法，汝著會曉用“方旻五筆”。簡單講啦，汝若是用普通的五筆輸入法（比論講“Microsoft Windows”系統有合(kah)的“王碼五筆86版”），安呢，我共汝講，真不幸，汝干凋有法度拍（輸出）一寡仔較簡單的漢字，對著遐个略仔較複雜的字，抑是繁體字，汝根本無法度拍出來，“看有食無kan-ta-giàn，親像佛祖咧蒸油煙”，即款“艱苦兼氣努(khì-ló·)”的滋味，相信汝穩當有真深的體會。親像“王碼五筆86版”、“智慧拼音ABC輸入法”、“微軟拼音輸入法”……即款“兩光兼無路用”的輸入法，正正著是予汝鬱chut的兇手。

現此時，線頂有足濟真讚真好用的漢字輸入法，實在“俗佫大碗”。“方旻五筆”是其中的一種，尤其適合中國儂的氣口。凖講汝到taⁿ 猶未chhē著合意的輸入法，若安呢，我家婆介紹汝來用“方旻五筆”。頭前有講過囉，“方旻五筆”的用法（拍字的撇步）佮普通的“五筆輸入法”（比論講“王碼五筆86版”）差不多共款，增差in 的功能無sio-siâng。干凋即點來講，著會當看做是“天佮地”的差別。“方旻”支持GBK，毋若(m̄-nā)會當真簡單來拍出所有的簡體漢字（簡化字）佮繁體漢字（正體字），上重要的，伊佫會當輕鬆拍出一寡複雜，罕得看著、罕得用著的“古早字”（普通話叫做“生僻字”），這著是 “方旻”予我憶著(it–tio̍h)的所在。汝用別款的輸入法，hoān勢無法度拍出“俍、肏、墘、憖、即、勿會、墘、覕、嘅、険……”即款予汝感覺誠龜怪(ku-koài)的字，不而過，我共汝報告，若用“方旻五筆”，是真輕鬆著攏拍出來矣。安怎？啥款？有想卜試看māi 無？

二、【白話字(POJ)輸入法】

“白話字”（POJ）的輸入法，定著會少。

1. keyman poj_v0.6

現此時，上kài交易(ka-ia̍h)的是一套名號做“keyman poj_v0.6”的東東（最新版本“keyman poj_v1.00”嘛已經上線，詳細請看第2條。“Keyman poj_v0.6”有支持“Unicode”（著是“萬國碼” / “統一碼”啦！），實在tah心佫好用！我是用kah真慣勢啦，憑良心講，感覺bē歹用。若有興趣的朋友，會當去lia̍h來試看māi ，佇遮(開放予儂download，並且教儂安怎使用）。

2. keyman poj_v1.00

最近“keyman poj”輸入法的發明儂陳柏中先生，佇伊個人的BLOG公布最新版本Keyman POJ_1.00（試用版，正式版本），現此時當咧提供予儂试用。有按算卜去试用的朋友，愛會記得先安装舊版的keyman poj_v0.6。Keyman POJ_1.00比起Keyman POJ_0.6”：加设计“第九聲”（请参考“第3條”）、安装的時，會自動鬥Doulos SIL佮Taigi Unicode即两套Unicode标凖字型。站長我鬥吹銷一下！！卜安的朋友，會得去陳先生的網誌看使用说明，嘛會當佇遐lia̍h檔案。

3. Taiwanese Package2.0

除了頂面所講的“keyman poj_v0.6”，猶佫有另外一套，oân仔有支援“Unicode”編碼，嘛是bē歹用，著是“Taiwanese Package2.0”(簡稱“TP2.0”，毋是TP1.5哦！)。 “TP2.0”毋但仔會當拍閩南白話字，佫會當拍客語(Hakka)羅馬字佮臺灣原住民語羅馬字！就閩南白話字來講，“TP2.0”比“keyman poj_v0.6”加設計一个“第9聲”的聲調——用 ̋ 即个聲調符來表示(比論講：a̋ , e̋ , ő, ő· , ĭ , ű , n̋g, m̋……)。這以外，TP2.0設計的“葫蘆點”（著是“O·”正爿頂懸hit點！）佮“keyman poj_v0.6”oân仔無共款，TP2.0的“葫蘆點”較懸，Keyman的“葫蘆點”較下(kē)。會造成即款的差別，完全是“字型”咧作弄，這in 兜的代誌，毋是咱卜講的主題。

佮“keyman poj_v0.6”共款，“TP2.0”嘛是完全免費予儂使用（免錢啦）。有興趣的朋友，去試看māi ，佇遮(共款會得download，嘛有教儂安怎拍字)。

4. MSKLC POJ 輸入法

本站家己開發的。有想卜瞭解詳细的情形，會當佇本站search一下。

三、【“漢+羅”輸入法】

順紲佫kâng報告一下（hoān勢儂已經知影！），有通lia̍h閩南語漢羅（漢字+羅馬字）輸入法的所在：

* 廈門音漢字輸入法
佇遮：http://www.phahng.idv.tw/ ,按算卜用即套的朋友愛注意，即套ná像猶未支持“Unicdoe”。

* “OpenVanilla”輸入法
“OpenVanilla”（開放香草輸入法），這是一套配合“Mac OS X”作業平臺（作業系統）來咧使用的輸入法，佇遮：http://openvanilla.org

Tagged: 輸入法