博餅（poa̍h-piáⁿ），嘛叫做「博狀元」、「博中秋」，是咱廈門儂慶祝中秋節的一種傳統的活動，一種特殊，又佫心適的月餅文化。民間方誌記載，廈門儂博饼，到taⁿ上少有三四百年的歷史。現此時，博餅活動已經成做閩南在地文化當中十足重要的一項，會使講是閩南民俗的一个標誌。

廈門民間博餅，有伊的歷史故典。民間傳說講，往早，鄭成功佇福建起兵，按金門廈門即位仔做根據地，一寡做兵仔儂透底是泉州府、漳州府、潮州府即三个所在的散兇儂。俗語講，「中秋無轉厝無祖，年兜無轉厝無姥」，做兵仔儂，出外口久長長，數念厝內的親儂決定是未免得。尤其若到kah八月半，想厝的心情較佫是無法度平靜落來。為著卜安搭、排解士兵鬱chut、稀微的情緒，鼓舞軍隊的鬥志，鄭成功佮伊的軍師、部將著想出一套會當消譴娛樂的遊戲，予in的將士做夥來chhit-thô消譴。經過一代傳過一代，即套遊戲嘛按彼當時直直流傳到taⁿ，成做今仔日廈門、同安、金門所在kái有特色的例俗。

今仔日，咱著beh共廈門博餅的規矩，來做一个詳細的介紹。

【會餅】

博餅博餅，著是用「餅」來咧博，來咧輸贏。看啥儂贏的餅較大桗(tè)，啥儂贏較濟。用咧輸贏的餅，有一个專名，叫做「會餅」。傳統的會餅，每一會，固定是63桗，有大有細；每一款月餅，攏代表一个名號，分別是：狀元餅1桗，對堂餅2桗，三紅餅4桗，四進餅8桗，二舉16桗，一秀餅32桗。當中，狀元餅上大桗，上有價值；一秀上細，數量上濟。

【遊戲儂數】

參與博餅的儂，無定著的儂數，建議一會上好毋通超過10个。當然儂傷少嘛無趣味。

【準備空課】

1、攢(chhoân)傢俬頭仔：一桗桌頂（輔助工具）、一會會餅、一副骰仔(tâu-á，六粒)、一桗大碗礓（硘的，愈弧（ô·）愈好）。

2、桌頂排蹛廳中央，碗礓khē坫桌頂。眾儂圍倚(oá)來，準備博餅。

【遊戲規矩】

博餅有一套規矩（無siâng社里，小可有增差），儂儂攏愛遵守。講起來誠簡單，講破毋值錢。代先，咱來設計的一條「鬥句話」：

博餅著準備，代先唱（chhiàng）規矩。
眾儂聽分明，事後莫（bo̍h）交纏。
逐家圍桌墘，某儂先開始。
手la̍k骰仔子(jí)，鏘喨tàn落去。
碗底現數字，賞罰有根據。
博著啥物點，著賞伊啥物；
骰若跳出礓，罰伊停一期。
博好換隔壁，直直輪落去。
等到月餅盡，遊戲嘛停止。

唸煞即條鬥句話，相信各儂心肝頭照講攏有一个粗淺的概念。紲落來，詳細的規矩，說明如下（對照圖畫看說明）：

1、一秀：出一粒紅四，得一桗一秀餅。
2、二舉：出二粒紅四，得一桗二舉餅。
3、四進：出四粒點數共款的（四粒紅四無算在內），比論講，四粒一、四粒二、四粒三、四粒五、四粒六。
4、三紅：出三粒紅四，得三紅。
5、對堂：點數自一排到六，號做對堂。
6、 狀元：狀元餅的輸贏，上kài 趣味。「狀元」分做幾偌个坎（等號、級聲），有「大狀元」佮「小狀元」的之分。不而過，狀元餅kan-ta一桗，所以，逐个著愛來拚輸贏，看啥儂博的級聲較懸。輸贏的規矩，會使講是「大魚食細魚，細魚食蝦米」、「賊劫賊，鎖管仔劫墨賊」，總是，到尾仔真正的「狀元」kan-ta一个niā，第一猛的摕(the̍h)去食。大細狀元的級聲，按照自細到大的順序，規定如下：

（1）出「四紅」，也著是四粒紅四的情形（毋佫，無包括「四粒紅四，帶兩粒幺」），著會使算是狀元。假使有兩个儂（或者是較加兩个儂）攏出四紅，安呢，愛佫比看啥儂帶的點數較大，大的贏。其中，「四紅帶十二」上大。
（2）、比「四紅」較大的，是出五粒點數相siâng的（除去五粒四），號做「五子登科」（省稱「五子」）。「五子帶一秀」上大，佫來是「五子帶六」。
（3）、比「五子」較大的，『五紅/五王』，著是五粒紅四。五王內底，帶六的上大。
（4）、『五子』佫起去，即陣的計講是「六pū烏」，著是出六粒烏的（紅四除外的骹仔，按一到六計有算）。按古例，出「六pū烏」是「歹吉兆」，著緊關門禁燈，眾儂相爭來搶餅，烏白搶，由在儂搶。搶贏儂的，搶無是恁兜的代誌。不而過，即項古例，即擺較無咧時行囉，因為按呢實在誠無文明，所以，即條古例早著予儂sài去囉。
（5）、「六pū烏」佫起去，即陣計講是『六pū紅』，著是出六粒四。按古例，，博著「六pū紅」的儂，規會的餅攏總伊的，總ba̍uh。總是，現代儂感覺即條規定毋是真合理，所以即條嘛予sài去囉。並且規定「狀元插金花」大過「六pū紅」。
（6）、「狀元插金花」，即代儂規定，出四粒四帶兩粒一，也著是「狀元插金花」，全局統大。按規矩，博著「狀元插金花」的儂，除了得狀元，佫會當搶走兩tè「對堂」。
7、添注說明：

（1）、狀元餅kan-ta一个。橫直，啥儂是上kài 大的狀元，啥儂得去。
（2）、只beh遊戲猶未煞局，著准講某一項會餅已經暫時予儂分了，按規矩，猶原會當佫緝(chip)倒轉來，意思著是講後壁博著點數較懸的，照原會當共頭前點數較下(kē)的儂「搶」餅，ah嘛有可能會佫再去予別儂「搶」走。這是遊戲當中上蓋熱絞(jia̍t-ká)的、嘛是上蓋有趣味的。只卜是點數較懸儂，後來者著會當憑點數來「搶走」進前予儂摕去的月餅。比論講，三紅餅暫時分了，過後，若有儂佫博著三紅，而且伊所帶的點數佫比進前的較懸，按呢，著會當「搶走」。若照起工來講，到「四進」即級的，猶有儂咧搶，ah若二舉、一秀就無儂搶囉。搶到底時煞咧？只卜遊戲無煞局，著會使直直搶落去，一手過一手。
（3）、傳統博餅，博的是真真正正的月餅。不而過，現此在的社會，月餅實際無啥儂咧食，所以會餅透底攏換做實實在在的物件，比論講各式各款生活用品、家用電器、金銀器，甚至紅包、現錢……會餅雖然換做物件，不而過博餅的規矩無變。所以，博餅嘛變到加真趣味，加真熱絞。

PS：博餅做為廈門、金門、同安在地傳統的節日文化，早早著「社會化」囉，taⁿ成做全市各族百姓共同的節日文化；成做全市各行各業95%以上的企業佮公司的「企業文化」。現此時，博餅文化愈傳愈遠，傳去到漳州、泉州內地、省內的龍岩、三明、福州……另外，在咱瞭解，今年，廈門市就博餅文化向國家有關部門申報，按算卜共「博餅文化」摕去申請「國家級文化遺産」。

作者：有閒來坐 2004年 廈門

相關連結：2004年第二屆博餅文化節

Tagged: 民俗