第8部
真緊，我對彼蕊花有進一步的了解。往過，佇小王子in hia，花開的時，花瓣透底kan-ta結一重(têng) niā。花攏誠細蕊，bōe 鎮位，嘛bōe 予儂感覺cha̍k-chô，往往是透早開，暗時隨蔫去(lian- -khì)。一時陣仔，嘛毋知tùi佗位吹來一粒草仔籽，尾仔即粒草仔籽又佫暴芛(puh -íⁿ)。彼陣，小王子特別注意即欉新芛，代先伊oân仔咧堯疑 (giâu-gî)，想講敢會是別種酸匏樹。毋佫，過無偌久，即欉新芛著無佫直直大欉起來，並且開始有咧結苞，看勢是卜開花啊。不而過，儘管小王子逐工守佇伊的邊頭，伊偏偏著是毋開花。小王子咧想：即蕊花穩當是覕(bih)佇花苞內底直透咧梳妝打扮，伊一定足愛súi的，若無裝kah súi噹噹、抹kah芳貢貢，伊是bōe hia緊出來的。對對(tùi-tùi/果然)是安呢，到kah有一工透早，日出的時，花嘛開啊。
花卜出世進前，雖然注心準備kài久，毋佫現出來，伊著假空咧哈耳(hah-hī)：
“失禮啦，我拄睏精神niā，汝看我的頭毛佫sàm-sàm…”
彼時小王子已經激動kah無法度控制：
“哇！súi súi súi！實在有夠súi……”
花蕊寬寬仔(khoaⁿ-khoaⁿ-á)共伊應講：
“喺啊(hēⁿ- -a)，我是hām日頭同齊出世的咯 (koh)…”
小王子感覺花蕊有淡薄仔咧展風龜，不而過，論真講，伊確實是súi kah會驚死儂。
伊對小王子講：“即mái應該是食早頓的時陣 ho·ⁿ，請汝順紲共我攢(chhôan)一份來…”
小王子soah歹勢歹勢，趕緊去攑噴桶(phùn-thàng)噴槍，舀水來沃花。
即蕊略仔愛風龜、又佫厚疑心的花，自安呢逐工咧拖磨、咧差教小王子。可比講，有一工，伊對小王子講起伊身軀頂彼四支刺：
“虎豹仔hiō·，汝共in 講，叫in 做汝來！我無咧驚in ！”
小王子共應講：“阮遮無虎豹仔，虎豹仔嘛無咧食草仔”。
花蕊細聲應講：“我毋是草仔。”
“失禮啦。”
“我是無咧驚虎豹仔啦，不而過我討厭即港(káng) 生凊風(chhiⁿ-chhìn-hong)。汝有風堵(hong-tó·)通閘風(cha̍h hong)無？”
小王子咧想：“討ià臭凊風…這對植物來講，運氣實在有較害淡薄…即蕊花佫是誠歹伺候哩…”
“我看暗時汝愛共我顧予好。恁即个所在有夠寒、有夠gân。我坫恁遮tòa bōe 慣勢，儂我往過tòa 佇…”
伊講到遮，家己soah恬去(tiām- -khì)。伊拄來的時陣不過是一粒草籽仔。伊根本無捌見過外口的世界。伊知影家己講白賊講kah煏空(piak-khang)去，soah見笑轉受氣，超工khām嗽兩三聲。伊使(sái)即招，其實是咧提醒小王子，頭先吩咐的代誌猶未做，伊催小王子：
“風堵咧？”
“我隨來去攑(giâ)。是講，汝頭拄仔講he…”
花蕊趕緊佫再大聲假khām嗽，意思bōe 輸是咧講：好也啦，汝佫毋緊去攢！
雖然講，小王子本然是真心咧佮意即蕊花，毋佫，鬥陣一暫了後，伊soah開始對即蕊花產生僥疑。小王子著是安呢，儂講一寡仔無要無緊的話，伊soah 看真重，結果是害家己咧加煩惱。
有一工，小王子共我講：“我無應該相信伊的話，無應該相信hit蕊花講過的話……憖看to̍h看、憖鼻to̍h 鼻，安呢著好也咯！我彼蕊花雖然是芳嗆嗆(phang-chhèng-chhèng)，毋佫我是bōe 曉通享受。彼擺，伊講著虎豹，本然我是應該愛同情伊，毋佫顛倒soah予我感覺誠怨嘆… ”
不而過，真緊小王子又佫講：
“彼陣仔我逐項毋捌！我實在無應該kan-ta憑伊講的話著來咧判斷伊的好歹，照道理，我是愛佫看伊作為才著。是伊豐富著我的生活，我實在無應該放捒伊做我一个儂走出來。我kan-ta看著伊的虛華，soah bōe 曉去感受囥佇虛華後壁的溫情。花的內心其實是hiah-ni̍h 仔矛盾！怪我當時傷chhóng-pōng，傷過毋捌代誌，bōe 曉通疼惜伊。”
第9部
我約(ioh/猜)小王子大概是趁一群候鳥搬岫的時，順紲走出來的。卜出來的彼日透早，伊共星球頂的大細項的物件攏款 kah誠齊整(chôe-cháⁿ)、誠四序(sù-sī)，連活火山嘛攏拼掃kah清氣tak-tak。 —— in hia有兩座活火山，早起時燃(hiâⁿ)寡仔飲糜(ám-bê)原在真利便。這以外，猶有一座死火山，卜出來進前，伊嘛順紲去共 (kā)清清拼拼咧。伊咧想，無定著死火山日後會佫變活起來嘛無一定！共拼拼掃掃咧，伊自然著會勻勻仔滾絞(kún-ká)，較bōe 雄雄爆發起來。火山爆發，著若像彼號煙筒(ian-tâng)咧噴火煙共款。是講，咱地球的人口實在猶無夠濟，無法度去拼掃火山，所以咱遮的火山才會hiah-ni̍h 仔”費氣”。
小王子共賰的幾欉”酸匏樹栽”全部攏摳摳起來。伊感覺心肝芛仔(sim-koaⁿ-íⁿ-á)略仔酸酸。伊想講hoān-sè bōe 佫倒轉來啊。彼工，伊感覺hiah-ê普通時逐工咧做的空課，taⁿ做著加真親切。小王子最後一擺去沃花，有按算卜共伊藏 (chhàng)起來。伊感覺鼻頭酸酸，目屎險險輾(lìn)落來。
“Bye…”小王子準備卜佮花蕊講再會。
毋佫花kán-ná無共伊應。
“Bye-bye……”小王子又佫講一遍。
”khe̍h…khe̍h…khe̍h…”花蕊ka嗽一輒(tiap)久仔，不而過無成(sêng)染風寒的款。
尾仔，花蕊總算開喙講話：“我頭拄仔實在有夠天 tho̍h。請汝原諒我。我希望汝會幸福。”
花蕊無怨嘆，小王子昂愕(gông-ngia̍h)一下，手摕花罩(hoe-tà)，柴柴(chhâ-chhâ)在(chhāi)佇hia，soah毋知卜安怎。伊想無花蕊哪會雄雄變kah chiah-ni̍h tiām、chiah-ni̍h溫純。
“無毋著，我愛汝。”花蕊共小王子講：“Ah毋佫，因為我的懵懂(bóng-tóng)，予汝煩惱，ah汝攏吞忍(thun-lún)落去。這攏無重要啦。不而過，汝soah佮我平(pêⁿ)愚 tû(gû-tû/愚蠢)……祝汝幸福。花罩仔汝收起來，我應該毋免佫用著這。”
“若起風落雨卜安怎？”
“我感冒無kài嚴重…暗仔時的臭凊風(chhàu-chhìn-hong)顛倒對我有好無bái……我是一蕊花。”
“若有蛇抑是蜈蚣趖過來咧?若是野獸咧？…”
“這汝放心，我若決心卜佮美蝶仔(bé-ia̍h-á)交陪，我是無可能會驚彼囉(hit-lō)蹺痀仔蟲(kiau-ku-á-thâng)來車盤。我相信這應該是一段傳奇的故事才著(tio̍h)。若無，是啥儂卜來看我？Ah汝嘛卜去真遠真遠的所在啊。汝毋免驚大mau的野獸，我有爪仔(jiáu-á)，毋免驚。”
講煞，伊佫攑(gia̍h)起彼四欉刺起來展……
“Mài 佫拖soa ah啦…哦！汝有夠cha̍k- -ê neh！汝既然卜走，愛趁早，緊去啦！”
伊是驚小王子看著伊咧哭。伊是一蕊個性儼硬(giám-ngē)的花…
第10部
佇附近的宇宙空間內底，猶佫有325、326、 327、328、329、330等等的小行星。小王子開始去訪問即寡仔星球，伊想卜佇hiah chhōe寡仔空課來做，順紲學寡仔智識kah經驗。
第一粒星球頂面tòa 著一个國王。國王穿一領茄花色（紫色）透濫白底烏花毛皮做的大禮服，坐tòa 一隻體形簡單毋佫真正英威的寶座頂頭。
國王看著小王子的時，喝一聲：
“哦，來一个臣民。”
小王子家己咧想：“伊也毋捌看過我，哪會捌我？”
小王子哪知影，佇彼个國王的心目中，世界其實真簡單：所有的儂攏是伊的臣民。
國王誠氣頭(khùi-thâu)，因為伊總算成做某一个儂的國王。伊對小王子講：“徛較過來的，予我斟酌bāi一下。”
小王子四界嘪嘪咧，想卜chhōe一个仔所在坐落來，不而過，規粒星球差不多去予國王彼領水噹噹的大禮服勘勘去(khàm-khàm- -khì)啊。 chhōe無所在通坐，小王子只好徛咧。毋知是毋是徛了傷久傷僐，抑是本成(pún-chiâⁿ)著誠thiám，小王子soah佇hia咧哈耳(hah-hī)。
國王對伊講：“佇一个國王的面頭前哈耳，是無禮體、毋捌禮數。我禁止汝拍哈耳。”
小王子感覺誠見笑：“歹勢啦，我實在控制bōe tiâu 才會安呢，我是按真遠真遠的所在，一路踅(se̍h)來到恁遮，到taⁿ 攏猶未睏的neh 。”
國王應講：“安呢哦…好啦，我命令汝開始哈耳。我已經幾若年毋捌看儂咧哈耳啊。對我來講，拍哈耳，hoān-sè 是一層趣味的代誌。來，汝佫哈耳一下！這是命令。”
“安呢哦，這…我soah略仔緊張緊張…我雄雄 soah哈耳bōe 出來…”小王子感覺真歹勢。
“嗯…嗯…”國王共伊應講：“若安呢，我…命令汝 liâm-mi哈耳，liâm-mi…”
國王家己咧嘀嘀嘟嘟、踅踅念(se̍h-se̍h-liām)，好親像略仔有咧受氣的款。
國王一心想卜展伊的英威，愛儂尊敬伊。伊無法度吞忍臣民毋聽伊的命令。伊是一个正港的君王。不而過，他嘛真善良，伊的命令透底有一定的道理。
伊定定安呢講：“假使我命令一位將軍變做一隻海鳥，毋佫將軍無服從我的命令，安呢，這bōe 當算是將軍的過錯，有過錯的儂是我。”
小王子誠細膩(sòe-jī)來咧問伊：“我敢會使坐落來？”
“我命令汝坐落來。”國王ná 吩咐(hoan-hù)，ná 徙動伊彼領大禮服。
是講，小王子實在感覺誠奇怪，行星chiah-ni̍h仔細，國王是咧統治啥貨？
伊對國王講：“萬歲爺…請汝原諒，我想卜請教汝…”
國王趕緊搶伊的話尾講到：“我命令汝問我。”
“萬歲爺…汝攏咧統治啥？”
國王簡單共伊應講：“我統治一切。”
“一切？”
國王輕輕仔用指頭仔(chéng-thâu-á)指著 ——伊tòa 的行星、別粒行星、佮所有的星。
小王子講：“統治這一切？”
“統治這一切。”
路尾，小王子才知影，伊不但是一个真真正正的君王，而且佫是整个(chéng-kô)宇宙的君王。
“若安呢，chiah-ê星，敢攏服從汝？”
“He定著的！”國王共伊講，“in 隨時攏愛服從。我是毋允凖無紀律的。”
即款的權力,實在予小王子感覺真驚惶(kiaⁿ-hiâⁿ)。設使真正掌握著即款的權力，安呢，國王一工著毋若 (m̄-nā)看會著四十三擺日落山niā，伊聽好看七十二擺，一百擺，二百擺，橫直愛幾擺著有法度看幾擺！嘛毋免捷捷(chia̍p-chia̍p)來咧 chhiâu椅頭仔！想著安呢，小王子又佫想起予伊
放捒的小星球，雄雄心肝頭感覺真艱苦。伊大膽對國王提出一个請求：
“萬嵗爺，我想卜看日落山，拜託汝…命令日頭落山好無…”
國王共伊應講：“汝想看māi，假使我命令一位將軍，叫伊愛親像一隻美蝶仔(bóe-ia̍h-á)安呢飛來飛去，抑是講命令伊寫一出悲情的劇本，抑是講叫伊著愛變做一隻海鳥，毋佫即个將軍伊無愛執行，安呢，汝講是伊毋著(m̄-to̍h)，抑是我毋著？”
“安呢當然是汝毋著。”小王子真肯定來回答伊。
“無毋著，”國王講，“共別儂提出要求，著愛看儂做會到抑是做bōe 到。若講權威，代先應該是建立佇咧理性的基礎上。假使咱若命令百姓去跳海，in 一定會攑刀攑槍(gia̍h-chhiuⁿ)來佮汝車拚。我的命令是合理的，所以我有權要求別儂服從。”
“若安呢，我頭拄仔講的日落山，這…”小王子見若 (kiàn-nā)提出問題，無問透機是bōe 凖煞。
“’日落山’毋，汝看會著啦。我定著愛吩咐 (hoan-hù)日頭落山，不而過按照我的科學統治，這一定愛等候條件成熟。”
小王子問講：“若安呢，愛等到底噹時(tī-tang-sî)咧？”
國王未應進前，先hiau出一本厚phiang-phiang的暦日佇咧反(péng)，那掀(hian)那咧唸：“嗯…嗯…這日落山，量其約佇咧…佇咧…下暗(e-àm)七點八字的檻站！彼陣，汝著會當看著日頭落山，到kah彼陣，伊自然會執行我的命令。”
小王子又佫開始哈耳。 Bōe 當看著日落山，他感覺誠遺憾。伊感覺誠無議量(bô-gī-niū)，chôan對國王講：“我無必要佫留坫遮。我卜來走啊。”
因為拄拄chiah有一个臣民，國王加真氣頭 (khùi-thâu)，伊用命令的口氣對小王子講：
“毋好(m̄-hó͘ⁿ)走，毋好走。我任命汝做大臣。”
“啥物大臣？”
“嗯…司法大臣！”
“不而過，汝遮kán-ná也無啥物仔儂通審判斷咯。”
“He無的確啦”，國王講，“我老囉，我即个所在又佫細，攏無位通排我的鑾駕。我若行路，著誠thiám，到taⁿ 我猶毋別巡視過我的王國lio·h！”
“噢！hia我攏去看過啊。”小王子那講，那越頭去看星球的另外一角勢，”是講，hia嘛共款無半个儂哩…”
“若安呢，汝著審判汝家己咯！”國王應講，“這有影較 oh啦，審家己定著愛比審別儂較oh！汝若有法度好好仔審判汝家己，汝著是一个真正有才情佫有智慧的儂。”
“我喺(hehⁿ)，凊彩啥物時陣攏有法度審判家己，無一定愛坫遮審。”
國王佫講：“嗯…嗯…我本然是想講…我遮有一隻老鳥鼠，下昏時定定安呢喌喌叫(chiu̍h-chiu̍h-kiò)，吵kah我攏bōe睏咧。汝會當來審判伊，會當捷捷(chia̍p-chia̍p)判伊死刑。所以，伊的生死完全teⁿ佇汝的手頭。毋佫，汝愛撙節用汝的權力，汝逐擺判伊死刑了後，著愛隨赦免伊，因為即搭kan-ta一隻鳥鼠 niā。”
“毋佫，我毋愛判儂死刑，我看我猶是來走較好。”小王子講安呢。
“Bōe-ēng- -ê。”國王小可咧起狂。
不而過，小王子已經款好勢啊。為著無卜予老君王感覺傷過悲傷，小王子共伊講：
“假使萬歲爺只是想卜得著一个實實在在的服從，汝會當予我一个合理的命令啊。比論講，汝會當命令我，佇一分鐘內離開。我認為即个條件已經成熟也…”
國王啥物攏無應。頭起先，小王子佫頓蹬頓蹬(tùn-tiⁿ)，尾仔，伊咽一口氣，著做伊行囉…
“我派汝做我的大使(tāi-sài)。”國王趕緊佫喝(hoah)一聲。
小王子越頭，看著hit-ê國王又佫激一个真英威的甫士……
小王子佇旅途當中，家己咧想：chiah-ê大儂實在有夠奇怪。
第11部
第二粒行星頂面tòa 一个愛風龜的儂，咱暫時著叫伊”風龜神的”、抑是”謗風水鷄”著好啊。
“哎喲！汝共(kā)看！一个欣慕我的儂來囉！”即个愛虛華的儂遠遠仔看著小王子行過來，著thiòng kah 、哀kah大聲細聲。
對hiah-ê愛風龜的儂來講，其他儂攏是伊的崇拜者。
“汝好！”小王子對伊講，“汝的帽仔足奇怪的。”
“哦，這是共(kâng)接禮的時卜用的。”風龜神的應講，“若有儂對我表示歡迎佮尊敬的時，我著愛褪帽仔共in 接禮。不而過，到taⁿ 攏無儂來行踏(kiâⁿ-ta̍h)。”
小王子無理解，chôaⁿ問伊講：“hâⁿ？敢有影？”
風龜神的chôaⁿ共小王子提一个建議：“汝用倒手拍正手看māi 咧。”
小王子chôaⁿ聽伊的話，佇hia咧拍撲仔 (phah-pho̍k-á)。 Ah彼个風龜神的，嘛隨褪帽來答禮，看伊是假kah 赫呢仔謙卑，又佫有風度。
小王子心肝內咧想：“這比訪問彼个國王較趣味。”伊感覺誠好sńg，chôaⁿ直透咧拍撲仔。風龜神的看伊佫咧拍撲仔，趕緊佫溜(liù)帽仔來答禮。
小王子chhit-thô差不多成字久(chiâⁿ-jī-kú)了後，soah感覺親像誠無義量、誠無趣味。伊對風龜神的講：
“有啥物好步數，會當予汝的帽仔落落來(lak- -lo̍h-lâi)？”
風龜神的假意無聽見，凡若(hōan-nā)愛展風神的儂，透底憖(giàn)儂呵咾，無愛儂嫌。
伊問小王子：“汝敢正實有欽佩我？”
“欽佩是啥物意思？”
“欽佩哦，著是講，承認我是即粒星頂…上巧的、上緣投的、上好額的、穿插上pâi-chí的儂。”
“毋佫，即粒星頂頭嘛才kan-ta汝一个儂 niā！”
“為著我會當快活(khòaⁿ-oa̍h)，費神汝緊來欽佩我啦！”
小王子聽了後，肩胛頭giauh咧giauh咧，共伊應講：“好，我欽佩汝，是講，安呢汝是咧歡喜安怎？”
實在誠無議量，小王子看破做伊離開。
小王子一路行，一路咧想：“chiah-ê大儂，實在有奇怪。”
第12部
小王子紲落來訪問的彼个星球，頂頭tòa 一个酒鬼仔。訪問時間雖然真短，毋佫soah予小王子感覺加真傷悲。
“餵，汝咧創啥？”小王子問彼个(hit-ê)酒鬼仔。酒鬼恬恬(tiām-tiām)坐佇hia，面頭前一堆酒矸，空的、無開封的，滿四界(sì-kòe)、挐蒼蒼(jû-chhiáng-chhiáng)。
“我咧食酒。”酒鬼仔看勢真鬰卒的款。
“你乜代(mih-tāi)卜食酒？”小王子佫問伊。
“為卜…放予bōe 記。”酒鬼回答。
小王子感覺伊誠可憐：“卜共啥代誌放予bōe 記？”
酒鬼仔頭殼勾勾，坦白共小王子講：“為了卜共我的見笑代放bōe 記。”
“汝有啥物見笑代？”小王子有心想卜共伊鬥相共。
“我興食酒，這著是我的見笑代。”酒鬼仔講煞，做伊激恬恬，無佫講話。
小王子感覺無法度理解。看破佫行。
一路行，一路那咧想：chiah-ê大儂確確實實是誠奇怪。
第13部
第四粒行星是一个實業家(大生理儂)的地盤。即个大生理儂規工無閒chhih-chhih，小王子來到了後，對方攏無taⁿ頭看伊。
小王子先佮伊相借問：“汝好。汝的薰支(hun-ki)熄去啊。”
“三加兩等於五。五加七等於十二。十二加三等於十五… 汝好。十五加七，二十二。二十二加六，二十八…無閒工通點啦。較停才來點。二
十六加五，三十一。哎喲！攏總五億一百六十二萬二千七百三十一。 ”
“五億啥？”
“嗯？汝佫佇咧哦？五億一百萬…我嘛記bōe 清是啥貨。我的空課(khang-khòe)誠濟…我做代誌一貫攏誠點陳，無彼个閒工佮汝練仙！二加五得著七…”
“五億一百萬啥貨啦？”小王子佫再問一擺。一旦有疑問，無問kah有一支柄通攑(gia̍h)，伊是bōe 煞尾。
大生理儂眈頭看著小王子，應講：
“我tòa 佇即个星球頂五十四年囉，kan-ta捌予儂擾吵過三擺。第一擺是二十二年前，毋知按佗位仔趖來一隻金龜，共( kā)我擾吵著。金龜仔的叫聲“啁啁叫”，實在歹聽 kah會驚死儂，害我一條數目(siàu-ba̍k)算kah重tâⁿ三四擺。第二擺，是十一年前，彼陣拄好風濕病giâ起來疼， he是我普通時欠鍛煉引起的。我實在無hia濟美國時間佮汝咧喝仙(hoah-sian)。我是个誠正經、誠嚴gâi的儂。即擺…這是第三擺！我計算的結果是五億一百萬…”
“幾百萬啥？”
Taⁿ即位大生理儂知影講即擺穩當無法度靜心囉，伊看破佫共(kā)小王子應講：
“幾百萬个kài細kài細的物件，chiah-ê物仔有時會出現佇汝的頭殼頂。”
“是胡蠅毋？”
“無nò·，是一寡會艶艶爍(iām-iām-sihⁿ)的物件。”
“是蜜蜂仔毋？”
“毋是啦，是彼款黃黃、又佫金金的物件仔，即款物件仔不時引起一寡仔貧憚儂(pîn-tōaⁿ-lâng)佇hia咧烏白想。我是一个真嚴肅的儂。我無彼个閒工想東想西。”
“啊，敢講是天頂的星？”
“著啦，to̍h是天頂星啦。”
“汝卜用即五億粒星創啥？”
“是五億一百六十二萬七百三十一粒。我是一个嚴肅的儂，我做代誌一貫攏真點陳。”
“你按算卜用chiah-ê星創啥？”
“啥創？”
“是啦，卜啥創？”
“無卜創啥。遮攏我的。”
“星攏汝的？”
“攏我的。”
“毋佫我捌拄著一个國王，伊…”
“國王無佔有權，in 只不過是咧’統治’niā。這是兩回事。”
“你beh 挃(ti̍h) hiah濟星有啥路用？”
“咱若好額起來，咱著會當去買別位的星，假使有儂 chhōe著新的星。”
小王子心內咧想：“即个儂考慮問題若像有淡薄仔 siâng進前彼个酒鬼仔。”
不而過，小王子真緊又佫問伊一寡仔問題：
“汝敢有才調共(kā) hiah-ê星攏佔tiâu-tiâu？”
“Ah無….汝講hiah-ê星是啥儂的？”大生理儂真bōe 爽，共小王子拄一句。
“我毋知，不而過，應該是無儂的。”
“若安呢，hia攏嘛算我的，因為我是頭一个考慮即層代誌的儂。”
“kan-ta憑安呢毋？”
“He當然的。假使汝抾(khioh)著一粒無主儂的鑽石，若安呢即粒鑽仔著是汝的；凖講汝發現一座無儂知影的島嶼，安呢即座島嶼著是汝的；佫比論講，汝若比儂較代先想著一个好步數，安呢汝著會當去申請一个專利，即个專利著是汝的。既然進前攏無儂想卜去佔hiah-ê星，安呢hiah-ê星著是我的。”
“安呢講嘛有理啦。是講，汝挃(ti̍h) he卜創啥？”小王子佫問伊。
“我咧經營佮管理chiah-ê星咯。我一遍佫一遍來咧計算in 的數量。這是一項無簡單的代誌。不而過，我是一个嚴肅佫骨力(kut-la̍t)的儂！”
小王子原在猶未滿足，伊佫講：
“對我來講，我若有一條頷巾(ām-kin )，我著會當共(kā)摕起來圍，愛卜扎去佗，著扎去佗；我若有一蕊花來講，準講想卜挽(bán)，我著共伊挽落來。Ah汝咧，汝敢有法度將星挽落來？！”
“我無法度，毋佫我會當共(kā)寄佇銀行。”
“汝是咧講？？….”
“我意思是講，我會使將星的數量寫佇一張紙條仔頂，了後才佫摕去鎖佇桌屜(toh-thòa)內。”
“安呢著好勢毋？”
“安呢著會使得。”
小王子心肝內咧想：誠好sńg。看起來佫不止仔趣味，是講，這敢有算真了不起的正經代誌？ ”
若講起啥物號做“正經代誌”，小王子的看法佮 hiah-ê大儂真無共款。紲落來，小王子佫講：
“我有一蕊花，我逐工共(kāi)沃水。我佫有三座火山，我逐禮拜去共拼掃一擺。連死火山嘛做一下拼，無儂知影伊啥物時陣會佫復活(ho̍k-oa̍h)起來。我有火山、有花，因為有我，對我的火山佮我的花來講，絕對有好無bái。不而過，汝本身，對著hiah-ê天星，soah無啥作用…”
大生理儂聽kah戇戇(gāng-gāng)，應 bōe 出來。小王子只好佫行。
小王子一路行，一路那咧想：hiah-ê大儂實在足奇怪、足奇怪的。 ”
第14部
第五顆行星上kài奇怪，嘛上kài細粒。細kah kan-ta會當khè一葩路燈、tòa 一个顧燈的儂。小王子實在想無：chiah-ni̍h細的星，又佫 chiah-ni̍h仔偏挹(phian-iap)，頂頭也無厝仔也無tòa其他儂，毋知點彼葩燈有啥路用？ Ah彼个儂是安怎卜佇hia顧燈？
小王子家己咧臭giâu疑：“kiám-chhái即个儂有淡薄仔無正常，毋佫伊穩當(ún-tàng)會比國王、風龜神的、生理儂佮酒鬼仔較好一寡仔，上無，伊的空課(khang-khòe)嘛較有意義。伊若點燈，著若像是加添一粒星，抑是一蕊花；燈若禁熄，就代表星抑是花卜來歇睏囉。即項空課有影值得呵咾(o-ló)，嘛不止仔有出脫。”
小王子來到，見面著誠有禮貌來佮點路燈的儂相借問：
“Gâu早。——汝頭拄仔是安怎卜共(kā)路燈禁熄咧？”
“Gâu早。——這是命令。”顧燈的應話。
“命令啥？”
“命令我愛熄燈。——哦…暗安。”
一目匿(nih)，伊又佫點著(to̍h)彼葩路燈。
“若安呢，是安怎汝又佫卜共伊點著(to̍h)？”
“這是命令。”顧燈的照原安呢講。
“我聽無。”小王子講到。
“無啥通好解説的。命令著是命令。”顧燈的ná講ná 咧做伊的空課，“敖早。”
話講拄煞niā ，燈佫再禁熄去。
小王子看伊按lak袋內iam出一條手巾來咧拭頭額 (thâu-hia̍h)。
“我做即款頭路(thâu-lō·)，實在真 thiám頭。往過(éng-kòe)猶佫泛泛代(hàm-hàm-tāi)，透早熄燈，下昏(e-hng)點燈，賰的時間，日時仔歇工，暝時仔睏ka睡(khùn-ka-chōe)…”
“照安呢講，是路尾有儂改變命令毋？”
顧燈的應講：“命令是無改啦，毋佫，會害嘛是為著這！即粒星咧踅(se̍k)，一年比一年較緊，毋佫命令soah攏無改。”
“路尾咧？”小王子問伊。
“路尾著是像即陣安呢，一分鐘伊著踅一環，我連一秒鐘著無通歇。見若(kiàn-nā)過一分鐘我著愛點一擺，佫禁一擺！ ”
“誠趣味，敢講汝即个所在，一日kan-ta 一分鐘久niā？”
“實在有夠無聊，”顧燈的講，“從(chêng)頭拄仔咱開講到taⁿ ，已經過去月外日啊。”
“月外日？”
“無毋著，攏總半點鐘久。三十工！——哦…暗安。”
話講拄煞，燈火佫著(to̍h)起來啊。
小王子金金共伊相，講實的，伊誠欽佩顧燈儂 chiah-ni̍h仔死忠(sí-tiong)來咧遵守命令。伊想起較早家己嘛定定chhiâu椅頭仔來咧看日頭落山。伊真想卜幫助即个朋友。
“我共汝講一个撇步，會當予汝偸歇睏一下，汝憖 (giàn)卜啥物時陣歇睏攏會使得”。
“我定定嘛咧想卜歇睏。”顧燈的應話。
有的儂雖然一貫真踏實(ta̍h-si̍t)、真照起工，毋佫有時oân仔會想卜小可踉港(làng-káng)一下。
小王子佫講紲落去：“即粒星遮細，汝行三伐 (hoa̍h)著聽好(thèng-hó)踅一輾(se̍h-chi̍t-lìn)。汝只卜勻勻仔行，不管時攏嘛會當看著日頭光，凖講汝想卜歇工，汝著會使照安呢去做…汝卜愛日偌(lōa)長，伊著有偌長。”
“汝即个撇步，對我來講應該無較choa̍h，其實我上希望的，是會當倒落去眠床頂的睏ka睡。”顧燈的應伊。
“噢，安呢毋soah誠無拄好。”小王子咧咽氣。
“誠無拄好。”顧燈的紲一句，“哦，gâu早。”
就安呢，路燈佫再禁熄……
小王子佫再繼續伊的旅行，即擺，伊心肝內咧想：
“即个顧燈的，定著會予hiah-ê 國王啦、風龜神的啦、酒鬼猶佫大生理儂看無目地。毋佫，kan-ta伊bōe 予我感覺可笑。這hoān-sè是因為伊所關心的毋是伊家己。
小王子又佫嚥一口氣，伊對家己講：
“本然，伊應該是我唯一會當做夥交陪的朋友。可惜，伊彼粒星球實在傷過細，兩个儂根本tòa bōe 落…”
實際小王子是無勇氣來承認：伊是咧留戀彼粒”濟儂呵咾 (o-ló)少儂嫌”的星，特別是佇hia，二十四點鐘著有法度看著一千四百四十擺日落山!
第15部
第六粒行星，看勢噯比第五粒咔大成十倍。頂面tòa 一个老先生，他綿精(mî-chiⁿ)咧寫一phō冊，一phō大部頭的冊。
“喲！一个探險家來啊。”老先生看著小王子來遘，見面(kìⁿ-bīn/即時)著來咧相借問。
小王子揀一tè椅頭仔，坐tòa 桌仔邊，那咧喘大氣。伊已經行真久真久啊！
“汝tùi佗位來的？”老先生問小王子。
“即本冊hia大本，是啥貨？汝咧創啥？”小王子倒問伊。
“我是地理學家。”老先生先應(ìn)伊。
“啥物號做地理學家？”
“地理學家，著是一種學者，伊瞭解佗位仔有海，佗位仔有溪、有城市、大山，抑是講沙漠。”
“這佫是不止仔趣味neh！”小王子講，“像這毋才有算正經頭路！”伊那講那越頭(oa̍t-thâu)四界bāi、四界看。伊從來毋捌看過chiah-ni̍h仔大的行星。
“汝即个所在誠súi neh！遮有海無？”
“這我無了解。”地理學家講遘。
“喲！”小王子誠失望。 “Ah無…有大山無？”
“這，我無了解。”
“若安呢，遮有城市、溪仔、抑是沙漠無？”
“這，我照原無了解。”
“無..汝佫講汝是地理學家？！”
“規欉好好——無錯(剉)，”地理學家應講，“不而過我毋是探察家，ah我暫時嘛無即款骹數(kha-siàu)。地理學家是無咧計算hit-lō城市、江河、大山、海洋抑是沙漠。地理學家誠重要，毋好四界拋拋走。伊bōe 使離開伊的辦公室。不而過伊聽好(thèng -hó)佇辦公室接見探察家。伊聽好斟酌詢問 hiah-ê探察家，共in 的回憶記載落下。假使伊認為某物儂的回憶有價值，安呢伊著會想卜調查對方的德行( tek-hēng)。”
“這是為啥物？”
“設使探察家若講白賊，寫出來的地理冊定著會造成嚴重的後果，有可能是災難！佫有，愛食酒的探察家嘛共款噯共(kā)調查。”
“這是為啥物？”
“酒醉誤大事啊，本然是一个儂，予伊看做兩个儂。遘尾仔，明明kan-ta是一座山，soah變記做兩座山。”
“我有熟似(se̍k-sāi)一个儂，若是叫伊做探察，伊穩當無夠格。”小王子講。
“有可能。所以講，假使汝感覺一个探察家德行bōe 歹，安呢汝著會使去調查伊發現著的物件。”
“汝是講，叫伊chhōa汝去看毋？”·
“無no·h，安呢傷費氣。不而過汝會使叫探察家提供證據。比論講，設使伊發現一座大山，汝著噯交代伊扎(chah)一寡仔石頭轉來。”……
……地理學家雄雄soah佇hia咧車東車西，毋知咧無閒啥。
“拄仔好，汝敢毋是拄拄按真遠真遠的所在來的！你著是探察家！來，汝緊共(kā)恁星球的情形介紹予我聽！”地理學家卜請小王子鬥相共(tàu-saⁿ-kāng)。
就安呢，地理學家chhiau出伊的筆記簿，又佫來咧削鉛筆。伊定定先用鉛筆記錄一个初胚 (chho·-phoe)，等待探察家提供證據了後，才佫用烏墨水正式共記錄起來。
“啥物情形？”地理學家開始來咧問。
“啊？阮hia噢…”小王子講遘，“嘛無算啥啦，阮hia，所在誠細。我有三座火山，兩座活的，一座死的。不而過，喙講’死的’，其實嘛無一定啦。”
“無毋著。”地理學家oân仔同意小王子的看法。
“我佫有一蕊花。”
“噢，阮是無咧記錄花草的。”地理學家共伊講。
“這是為啥物？敢講汝毋知影花是hiah-ni̍h 仔súi。”
“因為花真緊著會lian去，花的生命真短暫。”
“啥物號做短暫？”
“地理冊是通世間所有的冊本當中，上kài嚴肅的一種。”地理學家講，“這款冊是永遠bōe 過時的。真少有山咧徙位(sóa-ūi)，嘛真少有海水會凋(ta)去。阮咧寫的是一款永遠的物件。”
“是講，死火山嘛有可能佫再复活。”小王子抵(tú) 伊一句，又佫繼續咧問：“啥物是’短暫’？”
“火山有咧振動、無咧振動，對阮來講攏共款。”地理學家講，“阮關心的是有山無山。山的位置bōe 變。”
“毋佫…’短暫’是啥物意思咧？”小王子問第三擺，伊若提出一个問題，著硬卜問kah清楚。
“意思是講：有可能真緊著會消失去。”
“汝是講我的花真緊著會lian去毋？”
“當然的。”
小王子自言自語來咧念講：“我的花是短暫的，並且伊 kan-ta靠四欉刺咧防身！Ah我佫共(kā)伊孤一个hìⁿ tòa hia！”
這是小王子頭一擺感覺後悔，毋佫伊真緊又佫振作起來：
“汝敢是卜建議我四界去探察？”小王子問伊。
“無毋著，有一个所在，叫做地球，伊是一粒行星，”地理學家應講，“伊真有名聲…”
就安呢，小王子離開地理學家，一路行一路那咧數念 (siàu-liām)伊的花。
：歡迎加入《有緣來做夥》QQ陣（陣號：81229762）
發佈留言