【說明】 本文內容，是按《廈門話文》（作者：李熙泰／許長安，《廈門文化叢書》系列，鷺江出版社）摘錄落來的。自底是華文，咱將伊改編做閩南文。

（一）翻譯中國古書（古籍）的目的

早期（量其約仔 是十九世紀尾，二十世紀初），白話字（POJ）猶佫佇福建南部流傳的時陣，主要是予儂用teh翻譯聖經、聖詩chiah-ê佮教會有治代的冊，用來編印一寡天文、地理、數學、生理學等等的科學讀物。這以外，佫捌用來翻譯中國的古冊、名作，比論講《四書》、《三字經注解》、《通鑒要略》等等。

用閩南白話字翻譯中國古代的名作，目的主要有兩个：第一，為著幫贈（pang-chān）教徒（食教／落教的儂）學習漢字佮中國文化（漢文化）。第二，嘛是為著beh用基督教的教義來「糾正」儒家學說。過去，白話字雖然佇教會裡中真普遍，不而過，行出教會，外口猶原是漢字的世界，教徒准講會曉白話字，嘛是kan-na有法度讀hiah-ê用白話字寫的冊niā，nā拄著漢字，猶原是毋捌，猶原是青盲牛。對大多數的教徒來講，in總是愛適應中國社會即个大環境，愛去學習漢字、瞭解中國古代的文化。不而過，中國的古冊，伊的內容（主要是儒家思想）透底佮基督教的教義有對kê，甚至相違背。所以講，也beh翻譯中國古冊，也beh用基督教教義「批判」儒家學說，這是當時教會必須愛去做的一項任務。《三字經注解》的作者“維饒里”，佇咧《論三字經本文的體統和三字經新撰白話注解》即篇文裡中（lāi-tiong）講kah真明，伊講：「中國冊，所議論的代誌有真濟攏無合（ha̍h）上帝的真理，所以設使教會nā是無用心剔除（thak-tû）hiah-ê 無正確的教示，著會予儂感覺錯亂，又佫迷茫。坫學堂，假使 硬硬 著用孔子的冊，就應該愛來改正冊底hiah-ê『無合』的所在。即本《三字經注解》著是beh予儂知影上帝的真理佮聖賢的教示有啥物無共款的所在。」

（二）翻譯古冊的做法

照頂面所講的目的，教會咧翻譯中國古冊的時，用著下底三个步數。

第一、是注音。著是講，用白話字來kā漢字注音，幫助儂捌字認字，也著是咱即陣所講的注音認字。用白話字來注音，有一點較特別的所在，攏全注讀冊音（文音）。閩南語語音有分「文音」（讀冊音）佮「白話」（白話音）。往過讀冊，背唸的時陣，一定愛用文音，iah-nā解說（ké-soeh / kóe-seh）著用白話，安呢儂chiah聽會捌。是講，白話字自本是用來拼寫白話（口語）的，taⁿ 摕去替古冊注音，soah攏全注讀冊音，這嘛說明講，目的是beh學漢字。比論講，《大學》有佇全文的漢字頂面加注讀冊音。Iah《三字經注解》除去全文注音，猶佫有詳細的解說。即款的解說，著是用白話的款式寫出來的。

第二、是解說（ké-soeh / kóe-seh）。著是講，用白話（口語）來翻譯古文，解說（kái-soeh / ké-soeh）予儂聽啦。閩南語號做「白話解說」。《大學》即篇的標題，著有注明「字音解說」即四字。「字音」，表示講kā漢字注音；「解說」，表示白話拆解兼說明（口語翻譯啦）。這比論講，《大學》裡中的第一句「大學之道，在明明德，在親民，在止於至善。」，標準的廈門話讀冊音是：tāi-ha̍k chi tō, chāi bêng bêng-tek, chāi chhin-bîn, chāi chí û chì siān. 對即句話，伊是安呢用白話解說的：「大儂所學的道理是怎樣咧？一項是咱會當明白本身光明的德，一項是咱會當予百姓新的知識（或者幫助百姓得著進步），一項是咱會當歇在足好足好的所在。」佫比論即个《三字經注解》，開頭四句講「人之初，性本善，性相近，習相遠」（jîn chi chho·, sèng pún siān, sèng siong kūn, si̍p siong oán），是安呢解說的：「在咱儂的起頭，in的性 本然 好，in的性大概攏相倚近（oá-kīn），後來因為各儂學的無共，chiah 會 變 kah 相離遠。」即款的解說，等於講用白話kā古文翻譯一遍，予儂現聽現捌，對古文的理解加真緊。

第三、是評論。也著是講評議論，不但愛批判 hiah-ê 無合基督教教義的儒家思想、觀念，siâng時，又佫 順sòa 吹銷、介紹教會的教義。《三字經注解》的評論寫kah躼躼长（lò-lò-tn̂g），講：「三字經記載的即个教示無合（ha̍h）上帝的真理。聖冊的教示是安呢講的——『咱的始祖（咱儂的祖先）亞當佮夏娃原本是完滿的好儂，後來有魔鬼來擾亂、來迷亂著in的心，害in失去了好的本性。in的罪惡連累著萬世代的後裔（āu-è），所以，儂儂出世攏是帶罪來的，無 一个 無罪的，好佳在 救主 耶穌降臨到即个世間，beh對頭佫生儂的心，予儂重新得著新的心性，chiah通 欣慕好的，怨恨歹的；也通疼愛上帝、疼愛別儂，著親像咧疼愛in本身安呢。』」《注解》猶佫引用荀子的《性惡篇》，講荀子捌講過：「設使儂的本性是好的，著毋免用禮義、法律、制度來kā約束囉。可見儂的本性是歹的，不是好的。」《注解》講，荀子的性惡論有合（ha̍h）《聖經》的道理。

（三）翻譯古冊，有一定的參考意義

用白話字做翻譯的中國古典名作，在咱瞭解，ná像毋是真濟，不而過，即款的經驗猶原值得咱做參考。

代先，用白話字來kā漢字注音，確實是學漢字的好辦法。照咱調查知影的，有真濟原底毋捌漢字的，上頭仔攏是通過白話字，尾仔chiah佫ta̍uh-ta̍uh-á學著漢字。即款注音認字的撇步，對初初學文化的囡仔嬰，佫較有效。《三字經注解》的作者有寫講：「中國真早就有出過幾落種《三字經》的注解，不而過，hiah-ê 冊，對囡仔的幫贈（pang-chān）無大，因為囡仔認的字無濟。好佳在 白話字會當kāin提供上大的幫贈。學即種字，只要短短一兩月日，以後著毋免先生定定來教，無論啥物冊，只要是用白話字寫的，都（to）會曉家己看，家己讀。所以講，即種新款式的注解，實在是有好無歹。」

佫來，白話字會當成功翻譯chiah-ê古冊古典，嘛證明講拼音文字有利（中國）古代文化遺産的繼承。上無，佇當時，白話字佫有即款路用佇咧。一方面，將重要的古典名作翻譯做白話字，予hiah-ê 毋捌漢字的儂，也通好來瞭解（中國）古文化；另一方面，通過白話字去學漢字，掌握漢字，安呢著有愈來愈濟的儂，有法度直接去讀古文。所以，佇hit款年代，白話字不但bōe去礙著古文化遺産的繼承，顛倒有利古文化的傳播。美國傳教士Rov·M·Hubber捌安呢講過：「舊文字自本瞭解有透的學者，將來定著會佇咧真久長的一段時間裡繼續使用四角字來做古典學問的研究。Ah毋佫，nā beh幫贈所有的儂，行入智識的倉庫，羅馬字拼音可比是一支好用撰匙。」咱按白話字的《四書》佮《三字經注解》裡中的漢字注音，著會當看出講，用白話字做翻譯的目的，是幫助儂學漢字佮中國文化，毋是講beh用白話字來取代漢字。

佫sòa落來，實際是牽涉到「用現代白話文（口語）翻譯古冊、古文」即款有時代覺悟、時代意識的觀念問題。雖然是用閩南白話來翻譯古文，毋是用北京語的白話來翻譯，不而過，毋管用啥物語言，總是，白話文（口語文體）會使講是老百姓普通時上熟似、上瞭解的文體，嘛是上kài通俗，佇社會流傳上緊的文體。二十世紀初，佇中國北方發生「新文化運動」，正正著是一場「車倒 古漢文，扶正 白話文」的革命。佇hit-ê年代，知影用閩南白話來翻譯中國古冊，會當講是真正「有眼見」的做法。古冊，只有是用白話文來翻譯，chiah會當予逐个攏來瞭解，嘛chiah會當較好的傳播出去。《聖經》有hiah濟儂知影，其中有一點，著是因為《聖經》是白話文翻譯的。中國自來攏有整理古冊古典的傳統，不而過，透底較致重文字校對，顛倒是較無致重口語翻譯，所以，普通的老百姓，在來對古冊攏較生份。

Tagged: 文獻