（一）

溫疫澶開真厲害，
全國頂下足悲哀。
儂儂驚心勼厝內，
門窗關密驚儂來。
今年時機夠範䆀，
底時轉好鬼會知。
初九天公着照拜，
乞求好運㱏應該。

（二）

體瘑病菌颺颺飛，
親像雞鳥咧着災。
目目聶澶到滿四界，
穢着彼號死父衰。

（三）

講着疫症儂煩惱，
穢來穢去真體瘑。
病源到底出佇佗，
較濟講是對蜜婆。

蜜婆自本覕山豅，
怎樣會來過着儂。
十途生理百百項，
偏偏有儂做彼行。

梟行失德害社會，
全國人民趁著衰。
當今百業褿荒廢，
時局親像糜櫥鍋。

勸咱逐个着覺悟，
眾儂同心相幫扶。
災難面前毋驚苦，
保家衛國是正途。

（四）

庚子年頭否字運，
國內逐項較勿會循。
究勘因由蓋鬱悶，
車入故宮硩龍根。

上慘武漢出毒菌，
勿會輸雞鳥着禽瘟。
上北落南咬咬滾，
海內海外蟯蟯恂(chun)。

國家危難的時陣，
勸咱毋通四界巡(ûn)。
遵守規矩認本份，
害儂害己無火薰。

當今各項猶未順，
醫護物資無夠分。
朋友請恁着吞忍，
相分相讓食有賰。

國家布置有分寸，
招兵買馬起三軍。
治病預防兼整頓，
污穢腐敗順紲髡。

着信咱國基礎穩，
一時勿會直若伸淪。
雖然目今有失損，
風雨過了出祥雲。

（五）

病菌出來對武漢，
全國頂下哼哼呻(hàiⁿ-hàiⁿ-chhan)
政府叫儂着防範，
口罩愛掛毋通蠻。

車站廣場褻體亂，
儂濟插雜風險懸。
無病汰去醫生館，
勼坫厝內上安全。

小區社口攏着管，
出入來去過五關。
有病無病免判斷，
照量體溫勿會麻煩。

規矩儂儂愛遵趁，
政策也着加宣傳。
天下各國相支援。
共心共命渡難關。

（六）

疫病當今未消退，
親像雞鴨咧着災。
五路四界大慘慼，
經濟倒到蝦蝦蝦。

有儂幹撟有儂詈，
出門行路穢着衰。
也有梟行失德貨，
一儂過着規百个。

防範病毒毋是勿會，
口罩毋通做瀾垂。
衫褲捷換手捷洗，
着拭門柄佮皮鞋。

講起電梯誠污穢，
消毒殺菌㱏勿會gê。
房內馬桶搰力摖，
毋食冷菜佮凊糜。

儂儂衛生若照做，
免食人蔘佮高麗。
運動鍛煉顧身體，
無驚病毒亂亂飛。

（七）

古早吳真人濟世，
當今鍾南山治災。
列位序大佮序細，
千千毋通看輕彼。
汝看病起對武漢，
目目聶穢去到荷蘭。
毒菌咧傳毋是慢，
生死全在不意間。

近來疫情無較減，
親像赤骹踏刀尖。
上好猶原厝內坫，
鹹菜脯仔罔咬鹹。
勸咱開銷着准節，
防疫防病着防賊。
道理儂儂都盡捌，
毋免加講咧着力。

（八）

前線抗疫真艱苦，
咱做閒儂也無辜。
勼坫厝內無補所，
關到強強卜生菇。

食飽着顧眠床鋪，
天光睏到日焓烏。
規日思想儂的姥，(su-siúⁿ)
三日無髡臭鬢鬍。

也有彼號姣諸姥，
蹛咧抖音餳諸夫。
落胸落胛現腹肚，
衫褲毋穿展奶蒲(pô͘)。

勸咱列位眾諸夫，
毋通悾戇做花奴。
厝內姥囝若毋顧，
露家散宅誤前途。

（九）

新冠肺炎僫持防，
穢着較慘着熱狂。
全國和齊支持黨，
封城截路斷交通。

中國即過大慘慼，
經濟消退像水跌。
敢是六月天落雪，
本然無米故閏月。

佳哉政府有膽智，
防控病毒有措施。
疫情日日有較止，
百姓安心無驚疑。

中國防疫有眏望，
韓國日本煞否空。
一隻郵輪倚香港，
過來過去港千儂。

有儂調查出報告，
刊登佇咧柳葉刀。
華南毋是頭一號，
究勘病源捎攏無。

講起退僑真嘐潲，
世界各國亂操操。
有的落機隨放走，
有的予儂揕石頭。

彼个美國蓋趣味，
武漢退僑包飛機。
濟儂轉厝病隨起，
府院責任相推辭。

日本即滿較厲害，
疫情擴散無儂知。
南韓也是悽慘事，
防備失算足悲哀。

即擺抗疫若卜好，
天下眾儂着抾和。
梟行失德現紲報，
天理昭昭毋是無。