即久仔亵體悿！拄拄看著新聞報講，馬雲故差3億著卜超過李嘉成，成做亞洲第一富的儂。聽了心肝窟仔搐一下，趕緊上網來查本身的排名。好得佳哉，無啥差，排名猶原猶故佇咧14億名的骹兜，當我著放心啊！其實我嘛是有目標的儂，我有烏目鏡，爭差猶未有跑車但定……

昨昏去食燙火鍋，看著火鍋店壁牆頂大大字寫講：羊是家己飼的，菜是家己栽的，油是家己夾（khoeh）的，儂客請放心仔食。結數的時陣，我細細聲仔共店頭家講：頭家啊，這紙字是我家己印的，請放心仔收去用！頭家共我迮去七條街佮八彎斡，迮無著，害我走到強卜害去。誠心適，骹是我家己的，想卜走去佗著走去佗，總有一工我會走揣著眏望卜愛的物件。王仔思聰?老父當初時予伊5億，尾仔伊趁40億，翻8倍；阮老父予我20箍，我買一副手束，去工地予儂倩，搬一工磚仔趁百八，翻90倍！事實證明講，其實我是不止有才調的儂，爭差母本較輸儂但定！

一年舞到迵，逐工用6位數的密碼咧保全彼條無夠3位數的存款，想著骹手嶄然軟。是講，翻頭故再想，其實嘛免傷氣惱。前冬若無收成，著望後冬毋㱏著！汝看，七一建黨，八一建軍，十一建國，濟濟偉大榮光的事業攏是佇下半冬建立完成的，啊若頂半冬毋是清明，著是三八；毋是五四，著是六一，攏是a-sa-put-luh，毋成節氣。

按呢想，心著歡喜啊，煩惱攏放一邊去。

Tagged: 講天講地