rt {font:16px;color:#666}

謝金鑫即幾日仔心頭鬱恤(ut-chut)。彼暗暗頭仔，倒轉到厝裡，一个儂徛坫走馬樓咧秋凊，無因致端(bô-in-tì-toaⁿ)去想著逐日上班計著行過的舊社。看著滿天星艷艷爍(sihⁿ)，天清月明，想著舊社的夜景穩當妖嬌秀麗、多姿多彩。月娘沓沓仔(ta̍uh-ta̍uh-á)浮懸，樓骹馬路邊咧嘻嘩(hi-hoā)、滾笑的囡仔嬰嘛攏總轉轉去啊……「嬰仔唔唔睏(o͘ⁿ-o͘ⁿ-khùn)，一暝大寸；唔唔惜，一暝大一尺……」彼是謝家的諸姥儂佇房內輕聲細說咧唔嬰仔睏。謝金鑫惦惦點一支薰，門牽(khian)咧，出去囉……
舊社彼角勢，全全一寡闖(chhoáⁿ)來闖去的巷路。巷仔路石枋、洋灰枋鋪到哩哩塌塌(li-li-lap-lap)、挐惝惝(jû-chhiáng-chhiáng)，早著予來來去去的過路儂磨到光捋卹(kng-lu̍t-su̍t)。即箍圍仔，攏全下厝仔(kē-chhù-á)，逐落破糊糊，毋成夠鬼，無一落交圇(ka-nn̂g)，無一落會挃得。舊城猶未赴改建，怯(khiap)厝無儂打揲(táⁿ-tia̍p)，無儂掠漏(lia̍h-lāu)，原底徛家的若趁有食，攏總遷遷去城內蹛，破厝仔順紲稅予一寡外江儂去徛，據在亻因thún，據在亻因碖(lún)，一套厝一月日佫通稅得兩百零(liân)箍。
巷路兩爿邊彼仔一个、彼仔一个，計是一寡二十捅歲的諸姥囡仔桃仔(gín-á-thô-á)，便若有諸夫儂行過，著共儂使目尾，抑是輕聲講一句「來喔」，有的規氣倚來共汝搝。毋過，濟濟諸夫的總是輕輕仔搿(poé)開，拍算若毋是趕緊卜去無閒，無著是看勿會合意(ha̍h-ì)。遐个諸姥囡仔計是規篷規括(kui-phâng kui-koah)鬥黨，做成一攤，收50，從中檯費10箍。嘛有彼號三十外歲的中年婦女，亻因較濟攏單操一個(tan-chhau-ih-kô)出孤枝，一攤差不多三四十箍的行情，免檯費。
彼條巷仔狹覕覕，日時攏無啥儂行，暗時烏暗暗，活卜驚死儂。彼暗無風無搖，四界惦chiauh-chiauh，月光殕殕(phú-phú)，曜(chhiō)著彼陣(tīn)面pô糊(khô͘)粉糊厚厚的趁食諸姥，白死慯(pe̍h-sí-siūⁿ)白死慯，的確會共儂餳(siâⁿ)，會共儂割。
謝金鑫小可頓蹬(tùn-teⁿ)一輒(tia̍p)久仔，行倚去。
「來喔，遮啦。」
「偌濟？」
「五十，戴帽仔。無戴，一百。」
「坫佗落？」邊仔橫的、徛的，鬥上(tàu-chiūⁿ)幾若个諸姥囡仔，謝金鑫小可自目尾仔瞭(lió)過去，揀一个大燈無講蓋大葩，枝骨仔幼秀幼秀的，叫伊毛灬路(chhoā-lō͘)。彼个諸姥連影都無共伊影一下，喙角仔ngiauh咧，起骹著行。
謝金鑫綴著彼个妹仔，佇巷仔巷屑(sut)彎來斡去，親像咧行迷宮，無偌久著來到一間舊式的破厝仔。內底暗挲挲，壁角排一張八徑(peh-kèⁿ)床仔，邊仔下椅仔(kē-í-á)頂頓一支電風扇，床頭下(hē)一絪粗紙，床頂床單、毛毯hiauh到荒荒(hng-hng)，一葩粉色的燈火，妖嬌打扮著破厝的烏暗。
兩儂對頭講無三句客氣話，彼个諸姥連鞭(liâm-mi)遛到光禿禿，sán抽sán抽的體格，一身皮肉白到若粉桃……
「汝幾歲啊？」
「九三年的」
「喔」……
「愛較緊咧，乾焦三字久爾喔，小等咧著愛別換儂。」彼个諸姥看謝金鑫神神，出喙共伊催。
臨當時，謝金鑫想著厝內的姥囝，「牽手的遐呢仔愛我，我哪會使按呢做啦？」謝金鑫趕緊褲頭攏(láng)咧，iam五十箍掟(tàn)咧床頂，講一句「歹勢」，越頭衝出門。
路裡，謝金鑫那行那咧想，遐个諸姥囡仔都大儂大種啊，好骹好手，骹健手健，好路毋去行，是按怎干干仔(kan-kan-á)卜行即途，頭兩年凡勢猶無差，加做兩年，青葡萄變烏葡萄乾、白木耳變烏木耳，日後是卜按怎嫁儂？想咧想咧，連鞭(liâm-mi)煞到厝啊，iam鎖匙開門，姥囝敢彩(kiám-chhái)攏睏交睡(ka-choē)啊。
謝金鑫輕輕挨開房間門，去開床頭燈，無疑亻因姥煞精神啊。
「汝即陣則倒來喺(hèⁿ)？」亻因姥原在陷眠陷眠，講話脩聲(sau-siaⁿ)脩聲。
「喺，下晡組長臨時臨要，叫我去加班。」謝金鑫講白賊。
「有食無啊？灶骹鍋裡高麗菜飯猶賰半坩–著……」
「食飽啊啦，勿會枵啦。」
「按呢緊去洗洗咧通睏，明仔載透早著佫上班–著。」
「嗯，汝做汝睏，我來去廁所一下。」

身軀、頭面洗好，謝金鑫感覺加真精英，牽手的頭拄仔著共被單趨好勢啊。看家後挺攲(thán-khi)身睏咧邊仔，尻脊sán梭sán梭則一條仔爾，謝金鑫臨當時想著頭先出租房彼个諸姥囡仔……伊雄雄感覺家己真夭壽，真卑鄙(pi-phí)。惦惦仔the咧姥的尻脊後，嘛毋知姥睏去抑未。想著敢若誠久無「辦公伙仔」囉，毋知有三禮拜抑成月日，勿會啥會記得啊，逐擺卜辦，牽手的攏講真悿，伊嘛無愛強勉(kiâng-bán)，著凖煞。謝金鑫真想卜共姥攬咧，臨當時又佫想講，敢彩姥真正是悿啊，著伸手輕輕仔捍(hoāⁿ)咧姥的肩胛頭，細細聲講一句「較早睏咧，án姥」。

Tagged: 講天講地