閒閒無代誌，佇咧網頂一四界(sì-kòe) loa̍h-loa̍h-sô，注死（湊拄巧 / 湊拄坎）去chhiau著一篇刊登佇《泉州晚報》（海外版>>風情）的 文章，題目號做《泉州上元丸》。斟酌(chim-chiok) kā看咧，夭壽，佫是用閩南語（泉州）白話文寫ê neh！Taⁿ真正精神來啊，目睭嘛做一下金起來。這敢chiâⁿ-si̍t- -ê？我實在有淡薄仔毋敢相信家己ê目睭。Éⁿ，遮中國neh！正港大間 報社neh！有影 無簡單……

我真正有好玄，一睏頭 看到煞，連目睭嘛轉仁。雖然講，作者佇文中透濫著誠濟「華語」ê成分，總是，oân-á罕罕有趣味。傷閒，手賤kā改改chhiâu-chhiâu咧，拈(ni)來予逐个小bāi一下——

改編：Limkainhui

正月十五，叫做上元。做上元圓，食上元圓是咱中國儂的風俗，各地的風俗無sâng，上元圓的做法也無sâng，咱泉州儂愛食家己做的泉州上元圓。
泉州上元圓是用糖、炒的塗豆、蔥頭油、麻、冬瓜糖、桔仔皮、芎蕉油佫有紹興酒做腹，原本是用手捏（lia̍p），即陣計是用鋼模落去摳。圓仔腹，捏了、摳了，用秫米粞做皮來包餡（āⁿ），有的想卜省工就用手包。水滾，上元圓chiah落鼎，煮幾滾了後上元圓浮起來就熟囉。咱泉州有一句五色話叫做「上元圓包沙——浮」，這字「浮」字，現時誠少儂說（seh），「浮」的意思是說衫褲穿誠少，儂顯得誠輕剽（khin-phiò）。講到往過生活較歹過，無通食，無通穿，正月chiah有一軀新衫通穿，平常時若穿較好較才會予儂說，現時逐个穿kah一个比一个phāⁿ，boē輸時裝展覽比賽，穿好儂著較有自信，較有體面，無儂會說咱是「浮」、「浮衝衝」（phū-chhèng-chhèng）、「浮刮刮」(phū-koah-koah)。咱毋是咧講穿，猶是照原來講食。食上元圓，有的煮上元圓，湯底落幾粒紅棗，大粒的白圓，細粒的紅棗浮佇咧頂面，誠美誠好看，食紅棗，逐項好，食上元圓，慶祝團圓，大吉大利。上元圓仔湯普通無儂愛落糖，是啦，上元圓腹已經誠甜囉，配湯若是佫甜的，安呢會較逆喉（ke̍h-âu），boē清甜。也有儂將上元圓khē落鼎去炊，無佫煮湯起來配。Ah嘛有儂用chìⁿ的，不而過，卜chìⁿ圓仔著包伊好勢，捏伊實心（cha̍t-sim），毋通包kah phōng-phōng，若無內面有空氣，chìⁿ了圓仔食熱會脹會煏開；皮也boē-ēng-tit包無密，chiah boē chìⁿ了裂開。

咱泉州上元圓歷史也是誠久長囉。宋元時代啊，泉州對外貿易誠發達，主要是靠港跤行船去番邦，泉州刺桐港當時是世界東方第一大的貿易港，西國上大的港是亞歷山大港。咱中國陸路的貿易是向西行，過甘肅新疆thàng中東，去到西國，這條路是歷史上有名的絲綢之路。咱泉州行海路去佮外國做生理，就叫做海上絲綢之路，泉州算做是起點站，刺桐港時常停倚誠濟外國來的番船，街路排誠濟番仔貨，誠濟鬍鬚、醪目（lô-ba̍k）、thok鼻的番仔soah佇咱泉州蹛落來，生囝傳（thn̂g）孫。

南宋的時節，泉州來一个太守(thài-siù)，名號做真清秀，伊是咱福建浦城儂，佇泉州做過兩任太守，對著當時振興泉州刺桐港，發展海外貿易，拼經濟出boē少力，會用得說貢獻誠大。伊清廉勤政，愛民如子。有一年上元節，泉州照原是舉燈結彩，花燈放kah規四界，四箍圍計計誠熱鬧，太守真清秀伊就將官服脫sak，換穿普通衫褲，上街遊賞花燈，佮百姓saⁿ-kap娛樂。伊看見泉州城內，大街小巷儂馬濟濟，古燈照時舉，享受太平盛世，繁榮昌盛的好日子，心裡真正歡喜。

不而過，做為一个泉州百姓的父母官，伊心裡歡喜是歡喜，猶記心記肝有一寡出外行船的儂。咱中國儂自來就有傳統，誠重視過年過節一家口仔大細團圓。上元著是愛團圓，若是無團圓安呢著感覺加真鬱卒boē快活。Hit年番邦的船來咱泉州，番貨卸了，就換裝咱泉州的塗特產，啥物泉州緞啦、德化磁啦、永春漆籃、安溪茶米hâm-pa-lāng濟濟物件。往早時，無機器，佫較大隻船嘛是徛帆（phâng：篷）的帆船，行船全靠風。熱天時東南風行，船行入來；寒天時西北風吼，船行離港。西北風一行，番船要離港囉，哪知soah有幾个船員水手，佇咱泉州水土boē合（ha̍h），破病kah，一身軟糊糊，徛boē在，行boē浮。真太守就共伊倩（chhiàⁿ）幾个好腳數（kioh-siàu）的泉州儂落船去鬥相共（tàu-saⁿ-kāng），泉州南門有一个名做林圓的儂oân-á在內。

真太守過上元，掛念林圓厝內有老母姥囝（bó·-kiáⁿ），就專工來到南門林家，卜來看māi。伊看見林圓in厝門口排一擔圓仔湯，著是林圓in老母佮in家后佇hia咧賣上元圓仔。圓仔圓仔，看勢林圓in厝內底的儂是loā-ni̍h-á眏望（ǹg-bāng）一家伙會當團圓啊！真太守心肝頭誠boē過意，就近前說：「林圓去行船,boē得通倒來過年，實在是即个做官儂的毋著啊！」林家大家（ta-ke）新婦認得是真太守，趕緊請伊坐落來食圓仔湯。林圓in老母說：「我囝行船出外，毋kan-ta是伊討趁，嘛會得予咱泉州有好名聲，一時無倒來boē要緊，boē要緊！」真德秀聽伊安呢說，感慨萬千：「儂說泉州儂誠『四海』，聖聖（siàⁿ-siàⁿ）有影是深明大義，腹腸闊，著是安呢生，泉州港chiah會成做四界出名的大港跤！」就共安慰說：「林圓是咱泉州的好漢，伊誠緊就會倒來」。了後，choân攑筆替in即家口題一副聯對「泉郡千秋慶，林家上元圓」，祝願一家會得通團圓。真太守贈送聯對，林家賣的圓仔自安呢叫做「上元圓」。無偌久，林圓也行船倒來，一家團圓。此去，若拄著上元節，泉州儂著會煮上元圓仔來食，iah上元圓嘛愈做愈好食，毋kan-ta是節日的風俗，也成做泉州有名的小點。

原作：黄锡钧（照伊講，又佫是按李輝良的原作去改編的）

PS. 注意：文中個別所在拍字有重誕(têng-tâⁿ)，有ê字拍kah漏溝去。（這敢是佮網頁製作有關係？）

Tagged: 講古