頂幾工仔，用“Microsoft Keyboard Layout Creator (MSKLC／微軟鍵盤輸入法生成工具)”來咧編寫POJ佮國際音標輸入法的時，chiah發現著一个問題。講“發現”，不如講是“到taⁿ chiah知影”。

“MSKLC”應該算是bōe歹用的輸入法生成工具，操作簡單，准講是像我即款完全毋捌英文的儂（我是正港“鸚哥二四”的青盲牛!!），嘛共款chhit -thô kah有來有去。我定咧講，萬物(mi̍h)有一好著無兩好；有時仔，明明是優點，不而過，若用佇無共的時陣，抑是無共的所在，優點嘛會變成欠點。 MSKLC正正著是安呢。 假使一个Unicode編碼代表一个字元（字符），安呢來講，在我的了解，“MSKLC”一擺的操作kan-na有法度輸出一个Unicode編碼，也著是講伊無法度輸出”組合字符”(兩个或者兩个以上的Unicode編碼組合做夥)。所以，hit陣我咧編寫輸入法的時，即个“無法度”的代誌，一時成做一項真歹剃頭的問題。

“m̍, a̍, m̄, n̄, n̍, m̂, n̂, m̋……”親像即款的符號，其實Unicode內底已經有in 的編碼，比論講“a”的編碼是“U+e001”、“m̋”的編碼是“U＋e087” 。所以，做輸入法的時，只beh將“U+e001”設計入去，尾仔輸出的結果一定是“a̍”，並且百分百bōe走閃。照安呢講，代誌的確是真簡單，只 beh chhē出白話字內底帶調符的字元（像“m̍, a̍, m̄, n̄, n̍, m̂, n̂, m̋……”）的Unicode編碼，了後，將即寡編碼全部錄入去“MSKLC”，安呢著會使得。事實上，即款做法(暫時叫做“方法1”)應該是上利便的、嘛是上科學的方法。不而過，目前來看，按“方法1”做的輸入法，佇實際運用的時，hōan勢會產生真大的副作用，比論講出亂碼。在我了解，現階段beh 解決即个亂碼的問題，無除非是叫用戶另外安裝特定的字型。

這是因為現此時，大多數的字型（字體）並無完全支援Unicode，猶佫無法度正常顯示“m̍, a̍, m̄, n̄, n̍, m̂, n̂, m̋……”即款的特殊字元，所以，亂碼出現的機會嘛加真大。

因為“大多數的字型tòe bē著Unicode”，害儂加真困擾。為著beh防止出現亂碼，孤不而將，只好“近路毋行，行山坪”，放棄“方法1”。

“方法2”的做法，著是利用“字元組合”的概念。比論講，“ m̋ ”會當看做是由“m” 佮 “ ˇ ”兩个單獨的字元組合做夥；“ô·”會當看做是由“o”、“ ^ ”、“ · ”三个單獨的字元組合做夥。安呢做的優點是：
(1)拆散了後，chiah-ê單獨的字元，大多數的字型（字體）攏有支持，bōe出亂碼；
(2)所有的字元會當自由、靈活進行組合；
(3)毋免安特殊字型（對Windows XP用戶來講）。當然伊的欠點是，拍字的時陣，會較厚工。

Tagged: 輸入法