◎ Limkianhui （閩南·廈門）

In-hô, chia lóng bô thiⁿ-kong tē-tō ?
因何，遮攏無天公地道？

In-hô, chia gín-á lóng bô bī-lâi ?
因何，遮囡仔攏無未來？

In-hô, chia lâng kah lâng lóng bô sìn-nāi ?
因何，遮儂佮儂攏無信賴？

Sī siáⁿ lâng, kā só·-ū kòe-chhò tàn-lo̍h hái ?
是啥儂，共所有過錯碇落海？

In-hô, chia ji̍t-chí chiah-ni̍h bê-bâng ?
因何，遮日子遮呢迷茫？

In-hô, chia seng-oa̍h sit-khì chin-ài ?
因何，遮生活失去真愛？

In-hô, kóng pe̍h-chha̍t kóng kah chiah hiau-pai ?
因何，講白賊講kah遮hiau-pai？

Sī siáⁿ lâng, kā lán ê sìn-sim pāi-hāi ?
是啥儂，共咱的信心敗害？

Lán chhut-siaⁿ, chhiàng-siaⁿ, tī âng-mn̂g-hoe-tiâⁿ ,
咱出聲、唱聲，佇紅毛灰埕，

Lán ê sim-siaⁿ, thiⁿ-kong mā ē thiaⁿ ,
咱的心聲，天公嘛會聽，

Lán siong-sìn chin-lí chóng-ū chi̍t-kang ē chiàⁿ ,
咱相信真理總有一工 會正，

Lán chai-iáⁿ, lán it-tēng ē iâⁿ !
咱知影，咱一定會贏！

Lán ê ba̍k-sái, liàn tī âng-mn̂g-hoe-tiâⁿ ,
咱的目屎，攆佇紅毛灰埕，

Lán ê hi-bāng, choân sè-kài ū leh thiaⁿ ,
咱的希望，全世界有咧聽，

Lán siong-sìn chin-ài m̄-sī keh-mî tiān-iáⁿ ,
咱相信真愛毋是隔暝電影，

Lán chai-iáⁿ, lán it-tēng ē iâⁿ !
咱知影，咱一定會贏！

Che sī chi̍t-chióng le̍k-liōng !
這是一種力量！

Che ū lán ê sìⁿ-miā !
這有咱的性命！

Tōa-siaⁿ hoah-chhut :
大聲喝出：

“Góa it-tēng iâⁿ !”
“我一定贏！”

Lán chhut-siaⁿ, chhiàng-siaⁿ, tī âng-mn̂g-hoe-tiâⁿ ,
咱出聲、唱聲，佇紅毛灰埕，

Lán ê sim-siaⁿ, thiⁿ-kong mā ē thiaⁿ ,
咱的心聲，天公嘛會聽，

Lán siong-sìn chin-lí chóng-ū chi̍t-kang ē chiàⁿ ,
咱相信真理總有一工 會正，

Lán chai-iáⁿ, lán it-tēng ē iâⁿ !
咱知影，咱一定會贏！

Lán ê ba̍k-sái, liàn tī âng-mn̂g-hoe-tiâⁿ ,
咱的目屎，攆佇紅毛灰埕，

Lán ê hi-bāng, choân sè-kài ū leh thiaⁿ ,
咱的希望，全世界有咧聽，

Lán siong-sìn chin-ài m̄-sī keh-mî tiān-iáⁿ ,
咱相信真愛毋是隔暝電影，

Lán chai-iáⁿ, lán it-tēng ē iâⁿ !
咱知影，咱一定會贏！PS. 頂幾日仔，轉去廈門歇假（hioh-ká），有一日早起時，睏醒了後，坐蹛沙發椅（碰椅），ná食茶 ná咧看報紙，雄雄bāi著一條“時政歌”，歌名號做啥，咱暫時mài講出來予儂聽（跳過~踉過啦）……Ah.聽咧講，chit條歌，即mái佇網路頂懸 （téng-koân）毋是當咧chhèng niâ，是有夠chhèng、chhèng kah 強卜 臭焦 了了！！Ah我從頭到尾（chêng-thâu kàu-bé）共唸一遍，oân-á 感覺講 即裡中的歌詞有影寫了不止趣味，不止心適。臨當時（liâm-tong-sî），soah 起興（khí-hèng），想講…ah無..來共伊改做閩南語的哩……下面 練一寡“sán話”，我罔講，恁罔聽。

“我” 即个儂 生成 有 較 龜毛。有噹時仔，恁父 實在 有影 顧儂怨，愛 孽khiat，愛佮儂 激五仁，愛講一寡有的無的、五四三的，專門卜氣死儂的。若 知 恁父 性素的，伊 bōe 佮 恁父 計較；若無瞭解的，不時 嘛 佇咧 跤脊後 共 恁父 罵kah、詈（lé / lóe）kah、誳（khu̍t）kah、穢（oè）kah、肏（chhoh）kah、譙（kiāu）kah、幹kah、蹧躂kah……Ah 恁父 是 攏 無chhap-siâu 伊，面皮較厚屎礐梆（sái-ha̍k-pang），“死bē 改變（ké-pìⁿ）”，“hông罵，當做咧唸經； hông拍，當做咧掠龍（lia̍h-lêng）”。儂講“見笑bē死，慣勢著好”，恁父 照原chiah 孽siâu，chiah chhio-thiô，食飽睏，睏飽食，一尾ná活龍！……阮兜祖傳的教示：beh kâng phiⁿ， 也毋hông phiⁿ。食儂三注到（saⁿ-tù-kàu），恁父 上蓋 gâu，….厝邊兜攏keng-thé 恁父“起狗株（khí-káu-tu）”，嘛有儂 呵咾（o-ló）我是“不服輸”（pù-hû-su）。我即个儂，一世儂無啥物興做的事項，無啉無thîn，無點薰（tiám-hun），連 諸姥（cha-bó·）嘛是久久仔chiah 開（khai）一擺。是講，恁父 雖然是 無poa̍h-kiáu，佫罕得開婊，不而過，oân-á 有 一步gâu，我“見錢死”（kìⁿ-chîⁿ-sí）！有儂講我 小庀眼（siáu-phí-lián）、糊趿趿（hô·-sap-sap）、見烏著趿（kìⁿ o· to̍h sahⁿ），大條、細條，我做一下hap，吞kah強卜漲破肚……本然，恁父 攏 據在 儂 thé-thak，後來，是 阮 柴耙（chhâ-pê）較 畏小人（ùi-siáu-jîn），“三八假淑女”、“瘕龜 咧 bē 忍（lún）嗽”，hông詈久，soah見笑轉受氣，硬 逼 恁父“六出祁山——拖老命”，局不局 出來佮儂póe-hōe、四界（sì-kè）搭戰棚；明明 著 事實 有影，koh死鴨仔硬喙棓（chhùi-pe），硬拗 硬拗，死龜諍kah活鱉；現現“有”，soah硬卜共儂諍講“無”……我咧幹！真正面底皮比恁父佫較厚！即款生活，即款時日，論真是真了然；ah事實，恁 父 嘛 有影 活kah足僐的。有噹時仔 倒落去 暝床兮，想講 既若（kà-nā）做儂 做kah chiah兩光，東海無khàm蓋，歸氣來去死死咧較快活！較省 予儂 指指鑿鑿（kí-kí chha̍k-chha̍k），予儂 比（pí）佮 thuh。恁父 咒誓（chiù-chōa）——後出世，卜做蟲，毋通 佫 做儂！

Tagged: 閩歌