今仔日上大的收成，著是學會曉按怎來予BLOG網頁執行“Unicode”標準的字型（字體）。

頂一chām仔，不管時，攏嘛為著網頁無法度認出“Unicode”標準的字型即ê問題，tī遐家己咧鬱chut。本然，電腦技術著真害，啥物碗糕“html”，我透底毋捌，到taⁿ猶佫毋捌。

原底，我是坫咧中國大陸的“博客中國”咧寫網誌。做一chām仔，後來，發覺“博客中國”的服務器真害，網站不時著咧thut箠，有幾若擺，實在予我氣kah 攏無力。

後來，注死有一擺，我閒閒無代誌，又佫蹛咧線頂四界趖，探聽著一間起佇臺灣的“樂多”（網站）。Bē-bái,佫有提供BLOG的服務，空問嘛是hàm-hàm大（30MB），速度kài 緊……總是，比進前hit間“博客中國”（BLOG.CHINA）較有出脫。“新屎礐好放屎”，經過短時間考慮了後，我決定beh 來搬厝（ùi“博客中國”搬來去“蕃薯藤-樂多”）——

……

若無即擺搬徙(sóa),我猶原佫毋知影到底beh 按怎來修改BLOG的樣式（stylesheet）。即个問題，對別儂來講，凡勢kài 簡單，簡單kah 親像桌頂拈柑；不而過對我來講，實在真正費氣koh複雜，這著若像俗語來咧講“攑筆,鋤頭重”（攑筆較重過鋤頭）共款。

我決定beh 來試看有法度修改網頁的字型無..即擺，猶原是Google鬥相共，chhiau著bē 少資訊，予我加捌不只仔濟…知影講若beh 修改抑是佈置網頁的字型，一定愛著去chhiâu“樣式（stylesheet）”的設定。

我興刜刜(hèng-phut-phut)……

江湖一點決，講破毋值錢！

開開“樣式（stylesheet）設定”了後，佇“編輯區” 語法hit欄(nôa)，將內底所有的“Font-Family”語法攏總chhōe出來，紲落來，共咱想beh 叫網頁執行的字型代號添落去，有偌濟“Font-Family”，咱著愛添偌濟下。保存檔案了後，頭尾著攏總OK囉！！

因為白話字（Pe̍h-oē-jī）用會著的符號（調符），濟濟攏算是較各樣的“組合字型”，所以咱照講是著揀“Lucida San Unicode、抑是“Doulos SIL”即兩套字型來配合電腦（網頁）正確顯示POJ(凡勢犹佫有其它好用的字型,這我chiàng時iáu毋知影)。目前，有的用POJ寫的網頁（網站）著是iōng按呢ê撇步來顯示白話字。

Tagged: 母語技術