從（chêng）阮大家（ta-ke）搬來佮阮蹛了後，大家新婦關係著無通好，定定為著一寡小可代誌咧匊襇（kiuh-káiⁿ）。拍算計是一寡蠓仔骹踏著的代誌，我也較無所謂，無愛佮伊計較，差不多計是我吞忍。Ah毋過，阮大家真正足超過的，連阮翁仔某『辦公伙仔』伊都卜插，三不五時搬出來講閒仔話，句句攏是對著我來的，siak-sau而gō· tńg。

講出來毋驚儂愛笑，有時仔，暗時仔阮翁仔某佇咧房間內『辦公伙仔』，我定定感覺後壁敢若（kán-ná）有一蕊目睭覕咧偷看，毋過，越頭看是看無儂。阮翁講我厚僥疑（giâu-gî），叫我毋好烏白想。總是，我有彼號感覺毋是一工兩工囉，我敢按呢講，決定毋是無憑據。

會記得，有一過仔是下晡時，我頭一擺發現有儂佇門口偷看阮翁仔某『辦公伙仔』。彼陣，大家拄仔好佇客廳咧看電視，伊上第一愛看動物世界。阮翁仔某兩儂勼佇房內咧『做空課』。本然，我小可驚驚，共阮翁講『無…mài啦，阿母猶佇外口咧看電視著……』，毋過阮翁哪有咧管待伊，講阿母也毋是別儂，叫我放心。伊興刜刜（hèng-phut-phut），三下半手，著共我剝（pak）到一尾若鰗鰡。

兩尾水蛇當咧（tng-leh）交纏，雄雄soah聽著房門砰（piāng）一聲關去。我驚一下規身儂攏褿掣（chhoah）起來，凊汗做一下煏出來，臨當時（liâm-tong-sî）一尾冷到若死魚咧。趕緊衫穿咧，開門出來共伊看，大家原在坐咧胖椅（phòng-í）仔遐，面漚面臭，目睭giân佫反（péng），看著會驚。我知影大家穩當是看著阮翁仔某咧『辦公伙仔』，一時見笑到無面通見儂。

阮翁sī-sōa來安搭我，毋過，從（chêng）即層代誌過了後，阮翁仔某著加真張持（tiuⁿ-tî），凡若大家佇咧厝內，斷斷（toàn-toàn）毋敢佫再『辦公伙仔』。雖然講毋是外儂，做即號代誌予儂看著，總是毋好。俗語講，草索看做蛇。因為按呢我soah驚到入骨，卜『辦公伙仔』soah著佫揣日。毋但按呢，咧辦的時陣，規頭殼想著的計是彼日予儂NG的情形。

彼工食暗頓的時陣，大家嘈嘈唸，講一寡五四三的，講我即个做儂新婦的傷嬈、勿會見笑，無親像諸母儂款。我都（to）毋知卜按怎應伊，也毋愛佮伊冤，頭犁犁做我kho̍k-kho̍k食。彼頓糜食到無滋無味，通講是一世儂上蓋（siōng-kài）礙瘧（gāi-gio̍h）的一頓糜。阮翁嘛有共亻因老母使目色，毋過，大家猶原做伊踅踅唸，唸勿會煞。活卜氣死！

大家會搬來佮阮做伙蹛，是伊身體自底毋好，愛儂照顧。徛共一間厝內，逐工相眏見（sio-ǹg-kìⁿ），閃勿會離，僻勿會去，有影是礙瘧啊！彼層代誌了後，阮翁仔某著誠少『辦公伙仔』。逐擺計是趁大家睏去抑是出去外口散步，阮則會有通小可happy一下，艱苦啊。