彼暗，敿一陣同事相招去歌廳唱歌。半中剸(poàⁿ-tiong-tn̂g)，去廁所，行過一間包箱，聽著內面有儂講話。雖然音箱真pōng，嘛是予我認著彼个聲。彼是阮翁一个死忠兼换帖的兄弟仔群。伊kán-ná啉麻去ah，佇遐大聲哀佮嚷。注死去予我聽著一句『是咧創啥潲啦，頭先毋是交帶恁去共上嫷、上嬈的諸母，攏叫叫入來？按呢拖拖挲挲……佫毋較緊去叫？』

當時，我頭殼規个攏燒起來！我想著日時，阮翁有共我講，暝昏(ê-hng)卜敿換帖的出去食飯，講卜較晏則倒來。我共伊講無要緊，我嘛拄好卜出去thit-thô。

我趕緊斡去一个較靜的所在，敲電話予伊，問伊底時卜倒來。伊講小等咧著卜倒來。我佫問伊，敿啥儂鬥陣。伊講，著是彼个某物仔儂。死無儂，正正著是頭先彼箍！當(taⁿ)我是卜按怎？頓蹬(tùn-tiⁿ)一輒(tia̍p)久仔，我決定先冷靜一下，暗靜跟看māi，則佫講。

量其約仔過四五字久，我敿做陣的同事相辭，講厝內有代誌，著做我先斡出來。我佇巷路閘著一个服務生，共伊探聽彼間包箱，起頭，伊啥物計毋講，我看破，窒(that)兩佰箍予伊。伊共我講，內底五六个諸夫(ta-po·)的，叫幾若个小姐咧陪啉陪唱。我共阮翁的生做、穿插(chhēng-chhah)，講予伊聽。伊講有即个儂！

我聽一下，血壓chiâu衝懸(chhèng-koân)！真想卜衝過去蹔門！毋過，我猶是強強忍牢(lún- -tiâu)，我想卜看紲來伊卜變啥物齣頭！我自按呢覕佇歌廳外口一个較挹澀(iap-siap)的所在，佇遐咧當(tng)。

過久久，一陣儂則出來，佫有幾若个諸母，穿到現胸現胛，不答不七。亻因分做兩三括(koah)，閘的士仔走。我嘛順手ia̍t一頂的士，綴伊尻脊後(kha-chhiah-āu)去。

暗時仔車較少，路好行，一路共伊跟牢牢。亻因佇一間賓館落車。我看亻因總入去了後，則綴入去。大廳無半个儂，我直透走去問工作人員，頭先彼陣儂徛佗落。工作人員講保密勿會用得講。我氣暢忍(khì-thiòng-lún)，起性共伊放刁講，遮个儂是來遮咧開諸母，ah汝若佫毋講，恁祖嬤決定報警察來掠！時到，若出代誌，恁賓館穩當足凄慘的。彼个工作人員予我驚著，趕緊報房號予我。

我嘛毋知影，彼當陣我哪會變到遐清醒！我無想卜衝入去掠猴，我無愛看著彼號垃圾代(lah-sap-tāi)！我知影，汝有法通擋伊一時，無法通擋伊一世。

按賓館出來，我現敲電話予伊，敲勿會通ah……

我知影我的婚姻，通煞ah……

我親像秞草儂彼一樣，倒轉去到厝裡(ni̍h)。Siàng咧眠床頂，目屎雙港倒，親像咧落雨。彼个聲聲句句講愛我的諸夫儂，伊是遐呢仔爛賤(nōa-chōaⁿ)，遐呢仔下路(kē-lō·)，遐呢仔夭壽！

毋知過偌久，聽著撰門聲。我趕緊自被墘拭目屎，目睭瞌(khoeh)咧，假睏。伊無開燈，拈(liam)骹拈手，輕輕仔趖入來…穩當想講我敢(káⁿ)睏去ah，佫做伊行去冊房，看是去上網。

我根本規暝無瞌著目，天光起來，看伊覆(phak)咧電腦桌睏。我入去，伊現精神，問我目箍哪會蚶蚶。我應一句講，陷眠，做兇夢。著做我出來，無佫插伊。

伊起來卜款早頓，我推(the)講單位佫有代誌，卜較早去。出門了後，我順绁敲一通電話共頭家請假，駛著車佇街仔路kho̍k-kho̍k踅。了後，踅去阮老母遐，摕伊的身份證。我共阮老母講，單位卜用。伊連問都無問，著摕予我。

差不多八點半仔骹，我斡去銀行。身軀頂所有的存摺，總iam-iam出來，按我的戶頭，一氣轉百外萬出來，用阮老母的身份證新開一張，做一下存存入去。

好得，厝內底錢項攏我咧掌(chiáng)，厝嘛記我的名。

我無想卜掠姦在床，無想卜當場看著彼號見笑代！我卜做的，著是盡量保全家己的利益。

中晝，我共阮小妹叫出來，代誌自頭到尾，hâm-pa-lāng講予伊聽。伊無苦勸我，伊知影我的儂，我心肝若是掠挺橫(thán-hoâiⁿ)，仙儂來怙情(ko·-chiâⁿ)嘛無彩工。

我共伊講，愛請伊鬥骹手一下，卜共厝仔過過去伊的戶頭。

伊小可sīm liām-mi仔，著應好。

暗時，我真暗則倒去，上網上到天光。第二工，早早著敿阮小妹去辦過戶。即號代誌毋是現辦現成，足厚手續的，毋過，我會用得等。

下晡時，我敲電話予阮翁。我專工揣一个較肅靜的所在，叫伊來。我問伊頂一暗的代誌。

現此時，厝內的紙字，通講計是伊趁的。我毋是貪財的儂，假使為著別項代誌離緣，我會當啥物計毋挃，ah毋過，獨獨即號代誌，勿會用得！我問伊頂一暗去佗，伊頭犁犁，毋應毋tn̄g。我臨當時起狂，大聲共伊嚷「汝毋講是毋？會用得！汝耳空擘予利，我講予汝聽…汝去啥物所在，睏佇佗落一間，我攏知……」

伊照原頭chhih-chhih，勿會hiⁿ也勿會haiⁿ。我佇邊仔，早著目屎四淋垂(sì-lâm-sûi)。

伊雄雄『撲哢』一聲跪落來，骹骨共我撏(siâm)咧，求我著原諒伊，咒誓(chiù-chōa)講下擺毋敢囉。

我那吼那共伊謲(sàm)倒轉，『汝咧快活的時陣，汝哪無想著今仔日？』我大聲共伊講，錢當(taⁿ)攏無佇我的戶頭ah，厝嘛卜過戶予別儂ah。我共伊，若是感覺冤鬱，會當去法院告我。伊照原跪咧毋起來，講伊啥物攏會使毋挃，kan-ta勿會用得無我。我共伊講，無路用ah，傷慢ah啦！等到厝的手續若創好，各儂離緣書爽快簽簽咧，也較毋免咧膏膏纏。我佫共伊講，即暫仔我無想卜看著伊，嘛勿會佫敿伊蹛做伙，佫叫伊物件嘛愛款款咧，冗早搬出去。

伊看我踏真硬，全全無落軟，則徛起來，叫我三思而後行，講較bái-bái嘛做遐濟年翁某，無愛情嘛有親情，叫我著愛相帶著(sio-tòa-tio̍h)一下。我氣到強卜炸開，應伊講，汝咧做彼號勿會見笑代的時陣，哪會無帶著咱的感情？我決定好ah，毋免佫考慮！

講煞，我越頭做我去。

卜暗仔，我凊彩揣一个所在，垫一个腹肚，順紲啉幾杯來麻醉。代誌chhiâu勿會直進前，我無想卜予序大儂替我煩惱。按算即暫毋倒去蹛，卜先搬來去另外彼套厝遐。不而過，著先倒去款一寡物件。

暗時則倒去，門一下開，掣一趒！大家倌即爿的親堂攏全到！規間窒到密啁啁。看我入門，在場的攏全徛起來。伊問我猶未食是毋，講卜去灶骹煮予我。我無做聲。阮大倌peh起來，見面括(koat)兩个喙phòe予伊！大聲幹三代，講頭拄仔拍後生，新婦無在場無準算，即下當新婦的面是卜拍新婦看，佫罵亻因後生是豬狗精牲。

我苦笑，我共亻因講，彼無啥啦，逐个毋免遐致意，即个婚姻注定是失敗，早慢著離……我講，我看過足濟戇諸母儂，翁婿變鬼了後，心肝落軟佫去原諒伊，結尾凄慘罪過(chē-kòa)，則來咧想苦慼(khó·-chheh)。我共亻因講，我勿會佫予伊有機會，予逐个咧操煩……阮攏大儂ah，阮的代誌予阮家己來發落，好毋？

規厝內的儂，十喙九尻川，但有(nā-ū)是講一寡叫我著原諒的話。

唉…真暗ah，逐个通倒去歇睏ah，乎……

看我poa̍h真硬，亻因大概嘛想講，佫勸嘛無彩工，著攏轉轉去囉。卜出門彼輒(tia̍p)，大倌再佫大力共亻因後生蹔一下。

我做我款物件，即擺伊無佫過來chhām-chhām纏，一个儂歹命叮咚徛蹛咧門邊，直透踅踅唸，愛我著原諒伊，講伊永遠勿會佫犯即號錯誤。

我做我皮箱捍(koāⁿ)咧，應伊一句『諸夫儂著愛有諸夫儂的樣相，敢做著愛敢擔當！』講煞，一手共伊捒開，開門做我去。

落來到樓骹，我敲通伊的電話，放刁講「汝若敢共即條代誌講予阮母仔聽，代誌著毋是今仔日按呢則好解決，ah汝生理嘛免想卜佫做ah。」離開了後，我無按算卜佫揣一个啥物款的儂，彼是別日的代誌，即mái無法通想遐濟。此去，卜圓卜扁，攏隨在緣份，真正拄勿會著妥當的嘛無差，家己一个過，嘛不止清閒–著。

彼暗，規暝靜靜，無儂來吵潲。大家倌彼爿的，攏知我的性素。卜講的，卜勸的，攏講煞ah，勸過ah，我若執意卜行，亻因講較濟嘛無效。

Ah若講著分家伙，假使我無十成把握，我嘛勿會按呢做。我是一个真儼硬，真孽潲的儂，毋是據在儂páiⁿ-thāiⁿ，據在差教(chhe-kah)的儂。

毋是我無惜情。初初結婚彼陣，著品好ah，啥儂變鬼，啥儂被蓆仔掛輾錢，家己爬出去。當時一句話，無疑(bô-gî)變真的。

感謝逐个，佇我上艱苦的時陣，安慰我，鼓勵我。鬱佇心內的話，講出來，加足輕鬆。佫過幾日仔，則來去共手續辦辦予伊規矩。

此去，路猶佫真長。我卜好好仔過。我無想卜縛死佇咧過去暗糝的記持內面。毋過，空喙卜過皮，愛沓沓仔序(ta̍uh-ta̍uh-á-sī)。

諸夫儂家己犯錯誤，真緊著會放勿會記得，想講毋是啥物大代誌，會過著卜凖過。亻因也無想看māi，即號代誌若換做是諸母儂，有tah一个諸夫儂會當原諒？

我按呢做，不過是盡我的能力咧保護家己，減少家己的風險，減輕家己的負擔佮傷害。也kiám-chhái真濟諸夫儂無法度理解，毋過，會理解勿會理解，彼是亻因兜的代誌。一个諸夫儂做毋著代誌，該然著家己去擔當！做毋著，佫毋情願擔當，彼毋是諸夫囝！汝想看māi，一个諸夫儂，連hiah-ni̍h垃圾(lah-sap)的諸母，伊嘛sut落去，即个諸夫儂本身著有夠垃圾！我thài-thó有法通予即號諸夫儂佫來倚近我？

伊佇網頂發消息予我，問我氣有較消無，講我若真正卜離，伊嘛無意見，物件伊半項也毋挃。伊講是伊毋著在先，伊勿會佫膏膏纏，予我咧看伊無目地。

我應伊講，好，我會定一个時陣來去辦手續。

Tagged: 講古