今仔日，聽儂teh報馬仔，講「粵語wikipedia」（廣州話維基百科）佇昨昏正式來成立囉。先kā in講一聲「恭喜恭喜」。

廣東版的維基百科總算是正式開版囉！真正有夠拖挲，chêng舊年 毋知 佗一月的佗一日的佗一時的佗一刻……一直透拖到即陣chiah起步。He真正予儂「望啊望，等啊等，等到目箍漸漸紅」，會等 等到 bōe等。總是，此去 beh等嘛無機會啊。
根據瞭解，「當初時，維基人士佇咧討論講beh開辦一寡漢方言版本的時陣，著有將 上海話、廣州話、客家話、閩南語chiah-ê語言按算在裡，毋佫，尾仔為著某物原因，kan-na閩南語wikipeida辦有成niâ」，ah chhun–ê hiah-ê to̍h暫時無即款福氣囉。即擺粵語wikipedia正式成立，安呢，佇即个beh到300種語言版本hiah-ni̍h濟的維基大家族裡底，攏總著有 三个漢語言的版本囉。

「聽著」粵語wikipeida成立的消息了後，我to̍h隨拼過去看。Taⁿ順sòa佇chia kā儂 凊彩 小介紹一下（我的同胞——中國的朋友，chiàng時 猶 無法度 正常訪問wikipedia）：

• 粵語wikipedia，用傳統的「粵語漢字」來寫的。頭頁，號名「首頁」（佮中文版兮sio-siâng）。歡迎辭，嘛佮「中文版兮」beh kāng beh kāng，是安呢寫的：
  

  「歡迎嚟到人人都可以編輯嘅維基百科！

  海納百川，有容乃大，粵語維基喺2006年開始，已經有 24條條目。」




• Hoān-sè是因為拄拄chiah開始niā，目前暫時先按算8个類別：自然 | 地理 | 歷史 | 文化 | 社會 | 生活 | 技術 | 科學。
• Chhun–ê，差不多攏是照wiki軟體基本的風格佇咧佈置in的梆模。

總是，這是一个新的wiki，需要社會各界有心的儂，出力鬥扶持（hû-tî）、鬥贊聲、鬥牽成，尤其是會曉讀、會曉寫粵語文字（漢字）的網友出來做貢 獻，予即个wiki會當較緊生根puh-íⁿ，較緊生長起來，滂湃起來，嘛thang冗早來為社會、為人類粒積佮貢獻伊的智慧。

粵語wikipedia使用的文字，對對to̍h是hit款「粵語漢字」，這著說明講即个wikipedia注定佮hit-ê共款使用漢字的「中文維基百科」真無sio-siâng，會當預測，in此去beh行的路線嘛定著會真無sio-siâng。這是咱願意看著的。

不而過，嘛因為即个粵語wikipedia是透底用「廣州話白話文」來寫的，所以，伊的前途到底是好是bái，是熊是虎，chiàng時 實在猶佫真「歹講」。雖然粵語漢字有定型，有統一，有規範，有電腦支持，有香港政府teh扎氣，不而過，自來 佇hiah-ê「高級社會」佮「正規場合」當中，攏罕得看著「粵語漢字白話文」；濟濟堅持用「標準現代漢語書面語」（官話白話文/中文）寫作的儂，對著民 間咧使用的即款「粵語漢字白話文」，濟少攏嘛抱持（phāu-chhî）著輕視的看法。當然，將來會變安怎，無儂會知，hoān-sè即个新的wiki soah會來帶動著「粵語白話文書寫」的熱潮，he嘛無的確。

Tagged: 母語運途