『嘭嘭嘭』……『開門！開門！』，
『啥儂啦！挵到pìn-piàng叫，是咧創啥貨啦？』
……
『喂……ah恁是？卜揣siâng啦？』
『汝姓陳，號做大柱是毋？』
『係啊，ah恁是？有啥代誌？』
『啥代誌？！猶佫咧tìⁿ-chhiⁿ！』
『無啊，ah恁是……啥物tìⁿ-chhiⁿ？』
『恁娘較好！汝真痟抑假痟？」
『阿sir啊，ah當（taⁿ）到底是按怎啦？我…我霧sahⁿ-sahⁿ呢…』
『真霧是毋？小等咧汝著明ah』
『阿sir，這……』
『我問汝！汝底時娶某？』
『娶某？幾若年ah……』
『幾年！』
『我想看māi，kán-ná五六年ah……』
『講分明！到底tah一年？』
『1、2、3……今年2011年，舊年2010年，前年2009年……著啊，04年啦！』
『04年毋？年頭抑年尾？』
『04年……年尾啦』
『04年年尾是毋，記起來！』
『我問汝，頭養仔底時生的？cha-po·的抑諸母的？照實講！』
『隔轉年年中出世的啦，ah..ah諸母的啦』
『囡仔幾歲ah？』
『今年卜讀小學仔。』
『問汝幾歲啦！』
『冇歲八歲，實歲卜lím仔七歲』
『恁某咧？』
『去做儂客啦』
『去tah做儂客？叫伊轉來！』
『即陣？』
『無敢會明仔再？緊去叫！』
『是講，伊轉去後頭厝，路頭誠遠呢』
『是偌遠！敲電話叫伊現轉來！』
『喔……』
……
『春枝仔，咱厝當（taⁿ）來兩个警察，歹衝衝（pháiⁿ-chhèng-chhèng），講卜叫汝轉來啦』
『警察？叫我轉去？』
『係啊』
『卜創啥貨？』
『嘛毋知。看彼號形的，不止歹聲嗽lio·h！』
『有講啥無？』
『Ah to…見面入門，著直直問東問西，問咱底時結婚，底時生頭養仔……』
『夭壽啊！彼是保領卜來查計生的啦？』
『查計生的？？死啊，當（taⁿ）卜按怎死……』
『無也使講汝孝呆！真正有影儑頭儑面（gām-thâu gām-bīn），攏勿會曉看勢面，有影了然。』
『我哪會知？』
『好ah啦！ah汝到底有共恁講啥無？』
『無啦，哪有講啥？計嘛亻因咧問我，我都（to）猶未共亻因倒問咧…』
『哎喲，汝即个戇柴頭！汝緊敲電話叫保生仔叔來一逝（chōa）！叫伊趕緊…』
……
『喂！ah汝是咧創啥潲啦！敲一个電話敲規晡！汝是敲去美国hio·h！』
『喂…大柱的啊，汝是咧創啥貨啦？我叫汝敲電話叫保生仔叔……』
『免叫ah啦！勿會赴ah啦！保生仔即mái當佇阮所裡咧啉膏啡啦！』
『汝是啥儂啦！大柱的……阮大柱的咧？大柱的…』
『大柱大柱，我中脊楹（tiong-chit-êⁿ）啦！我共汝講，諸母儂啊，較目色巧咧，做儂毋通傷白目。』
『汝是咧講啥？我聽無……』
『好ah啦，勿愛佫假ah啦！佫假，著無成ah！』
『汝siâng啦！阮大柱的咧？恁想卜創啥？』
『創啥？汝免管！我共汝講，我限汝半點鐘內轉來到厝裡，ah若無，我保證，汝會規月日看勿會著翁！』
……
『阿Sir啊，有話好參詳啦。Ah是講，諸母儂毋捌禮數，若有得失，則相帶著（sio-tòa-tio̍h）一下，毋好佮伊計較啦係（hehⁿ）…』
『勿愛共我咧激五仁！我無咧食汝即套！』
『無啦，阿Sir……』
『好ah啦！勿愛共恁父咧七鐲八鐲……恁父無彼个美國時間敿汝咧牽尪仔補雨傘！』
『我講大柱的啊，汝共我聽予好，我兩條路予汝揀，看汝卜行tah一條。』
『啥？路…予我行？』
『汝共我聽予好勢，第一，乖乖仔共恁諸母儂交出來，逐个好參詳，攏無代誌。第二，儂會使做汝佫去覕，看卜覕去tah，攏無要緊，逐个則來輸贏看māi咧。』
『這……』
『我會予汝考慮，兩日後，我會佫來聽汝親喙共我講，汝卜愛行tah一條……行！來走！』
……『嘭！」

【紲下篇：嘭嘭嘭（2）】

Tagged: 講古