我七歲讀小學，彼年是西元一九八四年。細漢的時陣，佇我的心中，暗暗有一個夢，大漢卜出頭天，卜做縣長。為著即个夢，我下命讀，下力拚，逐擺考試攏卜拚頭名。

會記得彼冬讀三冊仔，毋知按怎，好死毋死，開學則無偌久，語文冊拍毋見。床頭桌屜、衫仔櫥、眠床骹…規四界搜（chhiau）迵迵，反（péng）了反，任揣都（to）無。佇彼个年代，讀冊囡仔拍毋見冊，彼著親像當今大儂拍毋見車共款，正經是大條代誌。讀冊囡仔，一儂一本拄拄好，學堂嘛無賰。卜買是無tè通買。凖做有，嘛無紙字通買。會記得，彼暫仔，為著即層代，傷心幾若禮拜，通講會吼吼到勿會吼。好得佳哉，共班的，有一個留級生，借我一本舊的。伊較大我歲，嘛是阮共社里的囡仔。彼是伊頂冬未留級咧讀的彼本。雖然則差兩冬爾（niâ），冊soah無啥共，濟濟所在攏有改編過。凡在著是按呢，罔抾來讀，有較贏無。為著這，定定咧予彼个師兄討人情。平常時，若小可無順著伊的意，著予伊訕掛削，放刁而五轉。見擺伊若按呢，我較濟攏激惦惦，欠儂的人情，家己著知己，無卜死予伊？

雖然感覺真冤屈，總是，我會曉通吞忍。我拍斷喙齒含血吞。 為著心中彼个夢，大漢卜做縣長。卜做縣長，著愛認真讀，搰力拚。讀冊較要緊，賰的攏無重要。

會記得，彼冬期尾考，語文我考全學區（全白水鎮十外仔外間小學）頭名！99分半！差半分滿分。本然有法度考滿分，因為一字『夜』字寫了無通真明，予儂扣半分。

分成績單的時陣，我歡喜到目滓轂轂輦。先生嘛替我歡喜。我一路衝轉去到厝裡（ni̍h），阿爸阿母、阿兄阿姊，眾儂都（to）歡喜到（kah）！呵咾到！

講我少年立志也好，講我四角駱駝、孔子膦脬也好，彼著是一个細漢囡仔真正單純的心理。

Tagged: 講古