◎limkianhui 2011.7.7

古早流傳一句話「北頂有一粒山，山骹有一條路，路邊有一逝（chōa）溝，過溝有一條橋。橋頭有一座廟，廟裡蹛一个老和尚」。聽儂講，老和尚本然誠良善，對別儂真好禮，儂來拜託，從來(chêng-lâi)毋捌共儂推辭(the-sî)。有一擺，老和尙落山化缘，佇山骹拄著一个乞食囡仔。即个乞食囡仔規身烏臭臭，穿到破糊糊，生做矮鑿鑿（oé-chha̍k-chha̍k），佫sán-pi-pa，有夠bái猴！老和尚可憐伊，收伊做師仔，chhōa伊上山，教化伊。即个乞食師仔，個性真儼硬（giám-ngī），真巴結，做代誌不止搰力！老和尚看伊按呢，惜伊的才，著將家己所知所捌的道理、智慧攏總傳予伊。

春去秋來，一工過一工，一冬過一冬，乞食師仔大漢囉。有一日，老和尙共伊講，「汝佇我遮綴我chiah濟年，該學的汝攏學著囉。師父牽汝學行，無包汝一世儂。日後，卜熊卜虎，在儂的造化。咱師徒緣份到遮，汝通落山，去拍拚家己的前途。」乞食師仔知影老和尙叫伊落山，毋是無因的端（in-tek-toaⁿ）。伊叩頭拜謝老和尙了後，著落山做伊去囉。卜行的時陣，老和尙另外交代一句話，叫乞食師仔此去永遠勿愛佫倒轉來。意思毋好講，師徒情份到坎，緣盡，儂也著散，若佫見面，的確會破拍（phòa-phah）。

路尾，又佫過誠久誠久。有一日暗暝，老和尙taⁿ仔咧坐禪頌經。臨當時（liâm-tong-sî）一陣臭凊風請來，窗仔門捒開開！一个烏衫伏面，手攑銃尾刀的強摃賊chông入來！雄蓋蓋，佫惡khia̍k-khia̍k！看即號體勢，包領是來搶劫的！

月光下，刀肉一下爍（sihⁿ），親像畫過一條痕。老和尙倒落去，伊無哀，無驚，連chùn-būn一下都無！

彼日，拄好西元1937年7月7號。此去，民間著流傳一句話：

「北頂有一粒山，山骹有一條『路』，路邊有一條『溝』，過溝有一座『橋』……」

ps:記念「七七·盧溝橋事件」七十四週年。

Tagged: 講古