阿土伯仔去市場買物件，伊今仔日是專工卜來買農藥。伊來到專門咧買農藥的店頭。
「頭家，恁有賣 樂果精 無？」
「較早有，即陣無」
「無…恁有咧賣 六六粉 無？」
「較早有，即陣無」
「哪會攏無咧賣啦？當（taⁿ）是卜按怎咧，總無叫我目睭金金看秞仔據在 秞飛蝨 佇咧 哺佮蛆（chhu）？！」
「無要緊，免煩惱，阮有咧賣 酒鬼酒！」

「啥物？酒鬼酒！？哭枵，汝賣農藥佫兼賣燒酒喔？？？」
『是啊，即款雖然是酒，毋過，比農藥較毒』
『按怎講？』
『汝敢無咧看電視？』
『無啊，我真久無看啊，厝內電視歹一年外啊』
『莫怪啦，莫怪汝毋知……』
『是按怎毋？』
『是按呢啦，因為酒鬼酒 驗出有塑化劑，即號物件真毒。即陣酒無儂通啉啊，無銷路啊，廠家著揣著阮，叫阮去搬來做農藥賣』
『是講，彼敢有效？」
「無效退錢，塑化劑是咱現代科技新發明，有大企業出錢研究提煉，後壁佫有政府佇咧做靠山，產品絕對無問題，做汝放心買轉去用啦！」
「按呢喔，是講彼敢毋是…」
「勿愛佫這啊、彼啊啦，卜買着愛趕緊買，亦若無，小等咧予儂買了了，汝着無通買囉！」
「啊！我想着啊！彼暗我影影有聽著阮後生咧講，講儂若食着彼，會中毒抑毋是…」
「着啦，阿伯仔有影巧，老是老，頭殼佫誠精光！汝看，咱儂生做遐大箍，輕微仔bak着，着足淒慘囉，莫（bo̍h）佫講是小小一尾蟲仔、一隻虼蚤蠓仔？！」
「聽汝按呢講，嘛有理乎…」
「係啦，趕緊買轉去用，着（to̍h）着啊啦！」

Tagged: 講笑詼