原作：徐楓（泉州）
改編：limkianhui

頭一擺看着即種花，彼是誠濟年前，有一過佇咧中央電視臺一檔半暝咧搬節目，號做「詩歌散文欣賞」即檔節目裡（ni̍h）看着的。

會記得第二擺佫看着，是佇一个朋友的QQ空間裡（ni̍h）。起頭，佫想說是「畻烏（旱蓮）」 nih。Ah都…從來毋捌看着即款烏tò·色的玉蘭花，iah伊彼个的外形都有影生做誠成「畻烏」。

第一愛即種色水的玉蘭花。chiáⁿ黃chiáⁿ黃，日頭光曜（chhiō）落來，粉粉、透明透明，誠媠誠古錐，親象ná玉做的nih。

咱厝儂時常咧講的玉蘭花，佮即種誠sâng，精差有較細蕊淡薄，規蕊花但（nā)三、四公分長爾（niā）。彼種玉蘭花，佇咧樹欉裡，着kán-ná新婦仔咧，不時都勼（kiu）蹛規片（phiàn）密啁啁（ba̍t-chiuh-chiuh）、又佫青phiàng-phiàng的箬仔內中咧探頭，是hiah bih-chhih，hiah妖嬌。
無像即款的，計無看着箬仔，規欉是按呢開kah峇峇（bā-bā）計褿（kè-châu）玉蘭花！誠大蕊，誠大範（tōa-pān），親象咧飛的白鴿nih。

離阮厝無偌遠的所在，有栽一排玉蘭花。

細漢的時陣，想講彼排玉蘭花誠懸誠懸，懸到強卜抵着天囉。

逐擺熱儂，定定趁厝內儂咧歇晝的時陣，一个儂按厝內底偷赸出去，走去迄排玉蘭花骹，着攑頭戇戇看樹仔頂，ná揣樹頂佗落有花，ná鼻玉蘭花的芳味。有時仔，湊拄坎仔撞着厝邊兜的ta-po·囡仔趖去咧樹仔頂挽花，若挽有，我會共亻因討，亻因嘛會一半蕊仔分我。手拈（liam）着花，心肝頭免講有偌仔歡喜lio·h！上愛共伊插咧頭殼頂，抑是囥咧lak袋仔裡，三不時iam出來鼻芳一下。

阿母知影我愛挃玉蘭花，佇我做客了後，伊捌買着一欉玉蘭花栽hō·我，想講hō·我栽咧厝裡。

路尾聽厝邊儂講，玉蘭花勿會做栽咧厝裡，則共伊徙去厝外口，尾手毋知乜代，soah hō·儂iah-iah去。

頂日倒去厝裡，車未曾（bē-chêng）行倚迄片玉蘭花，遠遠着鼻着玉蘭花迄款透天芳！迄个味是hiah嬌，hō·汝無法通閃覕，強強hō·伊餳倚去！敢（káⁿ）是拄chhian開花的時節，徛咧樹骹瞻頭（taⁿ-thâu）看，哇！ka-nn̂g樹，攏全開，siat-thái豔！siat-thái chhio！想着儂佇咧講「大石嘛着石仔拱（kāiⁿ），紅花嘛着青箬配」，汝kāi看，滿樹嬌滴滴的玉蘭花，略略仔（lio̍h-lio̍h-á）佇咧插色陪媵（pê-thīn）的青箬，猶佫有四箍輦轉咧伴舞踅玲瓏（se̍h-lin-long）的尾蝶、蜜蜂……有影媠kah若親像畫出來的nih！若毋是雄雄聽着過路的車聲，誠實掠做來到着世外的仙源lio·h！

從細漢到即陣，鐘樓骹，逐日有一个阿婆咧賣花。見若到kah玉蘭花開的時節，伊着來咧賣玉蘭花。我若行過看着，定定會共伊交關幾蕊，袋咧lak袋仔裡，閒若想着，着iam起來小鼻芳一下。

【添注】事實，咱厝儂較慣勢講的「玉蘭花」，伊的學名號做「黃桷蘭」。

Tagged: 講古