阿輝伯仔：
無齒師的有來無？

阿花：
無齒師的咧？

阿輝伯仔：
著啊，哪無看著伊？是講，阿花啊，汝也咧揣伊哦？

阿花：
無啦，叫chhit-thô的。

阿輝伯仔：
叫心適的？叫歡喜的？

阿花：
係（hēⁿ）啊。

阿輝伯仔：
阿花仔，汝無睏中晝？

阿花：
等一下卜！

阿輝伯仔：
哦。是講乜代即陣毋去睏，卜等一下？

阿花：
則食拄飽爾（niā），小hâu一下。

阿輝伯仔：
汝意思是講，現食飽，勿會用得現去睏？

阿花：
Sīm一下。普通話講「醞釀下」。

阿輝伯仔：
汝是卜激酒毋？

阿花：
無啊。

阿輝伯仔：
無汝講啥物「醞釀」？

阿花：
我是講小sīm一下，看等咧有通夢著啥物好夢無。

阿輝伯仔：
哦，我想講汝是咧激酒。著啦，ah想好勢未？按算卜做啥物夢。

阿花：
好夢。

阿輝伯仔：
好夢？是卜夢著呂布抑是卜夢著潘安？

阿花：
夢著食好料的。毋是啥物「桌布…拌蠓」啦…，唉呀，汝老歲儂，汝毋捌啦……

阿輝伯仔：
啥物我毋捌！我共汝講，好食毋值得快活！若夢著呂布，拍算會hō·汝爽到叫阿兄，ah不而過，若夢著呂布咧起狂，彼汝著愛誠張弛，無汝敢（káⁿ）會無性命。

阿輝伯仔：
著啦，ah汝卜夢啥好食的？

阿花：
海貨啦。

阿輝伯仔：
日本核洩露，汝毋驚海水污染？毋驚死？

阿花：
誠久無食囉。食hō·死，較好死無食。

阿輝伯仔：
誠久無食？是偌久？

阿花：
敢（káⁿ）毋卜一禮外拜。

阿輝伯仔：
一禮外拜？有hiah久？

阿花：
係啊。

阿輝伯仔：
汝毋是昨昏則有咧食爾（niā）？24點鐘都未過，汝soah喝一禮拜？

阿花：
無咧！我昨天食素。汝咧番癲囉。

阿輝伯仔：
哦？汝昨昏食素？

阿花：
係啊，規日三頓計嘛是。

阿輝伯仔：
汝乜代食素？汝是無錢通買肉？

阿花：
無錢。

阿輝伯仔：
可憐代。

阿花：
汝則知？我50箍開一禮拜。

阿輝伯仔：
是講，無錢，汝勿會去偷摕哦？無嘛會當去搶啊！

阿花：
搶？哪會做按呢啦？

阿輝伯仔：
哦？乜代勿會用得按呢？汝驚死，驚hō·警察掠去？

阿花：
我是有良心的儂，卜thái-thó會做即號代誌？！

阿輝伯仔：
無我來借問一下，當（taⁿ）良心一斤值偌濟啊？

阿花：
無法通用錢來計算。

阿輝伯仔：
我佫問汝，是顧腹肚較要緊，抑是顧良心較要緊？

阿花：
這……

阿輝伯仔：
汝敢無聽儂佇咧講：世間，錢做儂；毋是儂做錢。有錢講話會大聲，無錢講話無儂聽。有錢上大，無錢儂儂驚。

阿花：
唉，無法度啦。講著錢，上怨嘆。有錢，儂咧食魚肉，咱無錢，求粗飽啦。

阿輝伯仔：
著啊，汝都（to）會曉講無法度。古早儂佇咧講「枵雞毋畏箠，枵儂無惜面底皮」，汝到（kah）無錢，汝使（sái）歹勢啥貨？

阿花：
世界真烏暗。

阿輝伯仔：
乜代真烏暗？

阿花：
較早農業社會，無錢是無錢，計誠善良。即陣攏變款囉，心肝計變烏的。

阿輝伯仔：
變烏的？係啦，聽儂講，儂過身了後，心著會家己烏烏去。

阿花：
活儂嘛是烏的，免講死儂。

阿輝伯仔：
阿花仔，汝有烏心肝無？汝有做啥物歹心行（sim-hēng）的代誌無？

阿花：
無，我毋捌。

阿輝伯仔：
哦。是講，汝咧教冊，敢毋捌收儂的禮？

阿花：
毋捌。

阿輝伯仔：
哦？真正無？

阿花：
真正無。

阿輝伯仔：
在我瞭解，有的家長，為著卜扶排（phô·-pâi）學堂的先生，凖做厝內佫較無，嘛是硬chek，chek出來，逐年計攢（chhoân）誠濟好物去佮先生相送。

阿輝伯仔：
汝講有影無影，看我有哺舌（pō·-tsi̍h）無。

阿花：
我毋捌收著。免講送啦，有的連見著面，問一句好，都無。

阿輝伯仔：
哦？Soah有即號家長？哪會攏按呢？

阿花：
係啊，攏無儂送，無我嘛卜。

阿輝伯仔：
哦？按呢是汝較……卜怎樣講啦，拍算是汝較無儂的緣，抑是汝傷過氣頭（khùi-thâu）？

阿花：
阮即號所在，教冊的計hông看真無。

阿輝伯仔：
若按呢，汝著愛加用一寡手段。比論講，有的考試考較無通好的學生，汝著刁工留in關佇教室做作業，毋通予in倒去食暗，了後，則khà電話通知家長來chhoā，趁機講話共hiah-ê家長「點tuh」一下……按呢按呢按呢…我看hò·ⁿ，儂家長自然著知汝的意思啊啦。

阿花：
讀無冊，考無，佮我啥底代？我咧插插in，管待伊死！

阿輝伯仔：
汝講話哪會按呢啦？死鴨仔硬喙巴！我共汝講啦，「敢的，摕去食啦」！汝毋通傷條直啦，逐項毋敢。

阿花：
卜讀毋讀，in兜的代。

阿輝伯仔：
汝著是即款個性，較加汝嘛趁無食。

阿花：
橫直，我也無想卜趁私奇（sai-khia）啦，我咧煩惱學生讀好讀bái卜創啥？我看破囉，無所謂啦。毋管較清閒，較省規日hō͘彼陣猴囡仔活卜chak死！

阿輝伯仔：
汝毋通按呢啦，囡仔生成是按呢，毋是哭，著是笑；毋是屎，著是尿。汝既然卜揀教冊即行路，汝著愛較巴結咧，較認本份咧，激氣是無路駛啦。

無齒師：
先生啊，落課囉，放屎哦！哈哈……

阿輝伯仔：
猴死囡仔，變鬼變怪！儂大儂咧講話，汝囡仔儂插喙啥潲啦！

阿輝伯仔：
Ah著啦，阿花仔啊，ah汝哪會講無所謂啦？

阿花：
唉，話若講透機，目屎是poé勿會離。儂若卜歹命，是天早著注好好著！

阿輝伯仔：
無囉！家己的命運，計嘛tēⁿ咧咱家己手頭裡（ni̍h）！歹命，毋是天注定，計是家己做得來的啦。

阿花：
毋是，像阮的命運，好歹攏別儂咧主意。阮著kán-ná柴頭尪仔咧，據在儂變弄（pìⁿ-lāng），愛汝徛，著徛；愛汝坐，著坐。

阿輝伯仔：
無囉！話勿會用得按呢講。家己若無走chông，無搰力，著勿會用得牽拖別儂。

阿花：
哪會無？我已經誠拍拚囉！

阿輝伯仔：
阿花仔，儂講三分命，七分拼。看汝是按怎咧拚，是拚著路抑毋著路。有時仔，冚（khàm）頭冚面，戇戇拚，嘛無路用，了戇力的爾。

阿花：
無是卜怎樣則號做拚著路？

阿輝伯仔：
哈哈，會拚，著愛佫會曉哀佮haiⁿ！會Haiⁿ，頭家則知影汝做偌濟代誌，汝有啥物無滿意，按呢儂則勿會共汝「古意看做戇直」，毋敢看汝無目地。

王碌仔仙：
伊無半撇啦，伊kan-ta會曉食爾，真了然……

阿輝伯仔：
會曉食，無路用啦。趁若無，則看有通食無？

阿花：
毋知汝咧講啥死儂骨頭？照我看，汝kiám-chhái連食嘛勿會。

阿輝伯仔：
阿花仔，若是硬的行勿會通，無汝著換軟步試看māi。汝著想看卜用啥物好步數，會當得頭家的疼。儂講，得儂疼，較好拚。

阿花：
哼！我看著彼箍死儂「頭」，著規腹肚火，愈看愈鑿目（chha̍k-ba̍k），愈看愈gê膦！誠想卜衝過去kā伊tēⁿ死。

阿輝伯仔：
所以講，汝著愛學會曉通落軟。明明汝都誠討厭伊，汝嘛愛tìⁿ笑面，毋通漚一支面。儂講「心歹無儂知，喙歹上厲害」。

阿花：
我著是勿會giàn hiù膦伊！

阿輝伯仔：
無囉！汝著愛學儂激心行，囥佇心肝內，表面好來好去，笑笑仔來，用軟步數的。儂講poa̍h心機，汝聽有無？

王碌仔仙：
係啦，毋通佮頭家激氣、攑硬篙啦，ah若無，時到，食虧的是咱家己啦。

阿輝伯仔：
係啊，儂講「得失著土地公，飼無雞」。會忍（lún），則會做有代誌啦。

Tagged: 觸喙股