Cho̍h日暗，去廈門讀冊。駛一把（pé）小斗車（的士頭- -ê）去。即把車舊的，四五年車囉，敢（káⁿ）是即暫（chām）較無咧駛抑是怎樣（cháiⁿ-iūⁿ），三不時定定咧脫箠（thut-chhôe）。未去進前，車著發動勿會起來，路尾，嘛是叫儂來用推（tu）的則會發動。公司hiah-ê機師，有的講是電瓶無電，有的講漏電，有的講舊車本然著是按呢，痟神痟神，有時好好，有時起痟……

我本然驚驚，無啥敢駛，驚了半路若是歹去，時到，駛勿會得通倒來，按呢都有影害去。尾仔，有儂講，無要緊啦，車若起動了，會家己充電，叫我安啦無代誌，做我駛去著好。我想想咧，嘛是有影啦，管待伊啊，怯車是怯車，總比搭車坐船去，較利便。橫直，凖講真正是半路歹去，上慘khà電話叫儂來拖轉去，哈哈。佫較講，卜thái-thó會hiah衰？！自按呢，車駛咧，做我去囉。

好得佳哉，去是一路平安，駛kah到，攏真次序（sù-sī），無代誌。雖然，路裡（ni̍h），佇海滄大橋有拄著窒車（that-chhia），不而過，我攏真張弛，驚講若是熄火無法通起動，著慘囉！

誠無簡單，等到落課。八點外囉，趕緊卜佫駛倒轉來工地。即擺，我小可放放（hòng-hòng），想講，頭先來的時陣，都也無代誌，總無，倒去soah反常？呵呵，應該勿會hiah衰啦，乎（ho·ⁿ）？

儂講，愈驚愈著尻脊骿（kha-chiah-phiaⁿ）！儂，有時仔，著是hiah歹運，chhoàn-chhoàn卜予汝拄著的，任閃都閃勿會離（lī）啦。天若決意卜創治汝，準做汝是仙，嘛是勿會免得！

講來chhoàn-chhoàn著是hiah-ni̍h衰。倒轉來，駛到角美（Kak-bóe），看車kán-ná強強卜無油（拍算賰較無一格油的款），趕緊駛入去就近的添油站，熄火添油。添油是無乜代啦，鬼會知影油添好，一下卜起行，我苦啊，對對（tùi-tùi）有影無法通振動（tín-tāng）！死啊，即pang真正揣鬼哭無父。著啦，講到彼个添油站的服务生，有影真夭壽，有够靠勢，有够現實的。未添，是按呢好好叫，誠好頭喙，誠好禮，kā汝按呢扶扶挺挺（phô·-phô· tháⁿ-tháⁿ），連哄（hōng）帶術（su̍t），講到規喙全全好聽話……ah聽候（thèng-hāu）添好，錢算了niā，soah現換一支面。我車咧發動勿會行，想卜喝伊來鬥骹手，鬥推（tu）一下，無想講，伊soah反面毋捌儂，推（the）講伊真無閒，叫我家己想辦法，kā我hiù咧邊仔，無卜插潲我……我，我…我咧駛恁娘的牛車！唬，想著真正有影褲底囥針——有夠揬膦啦！

犯著鬼！真正有夠悽慘……無法度，siâng叫咱卜駛一把漚車？有影啦，社會著是chiah-ni̍h-á現實，勿會怪得儂啦！唉，猶是khà電話叫儂來推（tu）車較有影！

舞規暗，車嘛駛倒轉來ah。錢了，儂無代。無，應講講是「了眠了精神，儂、車，計無代」。汝kā看，這著是號做——儂若衰，一來，種瓠仔生菜瓜；二來，燃滾水佫會牢（tiâu）鍋；三來，呸瀾soah會毒（thāu）死雞。

幹！即把破車，恁父永遠勿會佫摸……

Tagged: 講天講地