俗語講「雷打蟄（ti̍t），雨天陰天卌（siap）九日」。昨昏是咱儂的驚蟄，毋知恁hia有tân雷無？若是有，哈哈，汝即siaⁿ慘囉，拍算愛忍（lún）月外仔外日，則有通看著日頭。是講，阮chia雷是無tân啦，不而過，相連紲兩日soah烏陰有霎雨，活卜寒死，誠艱苦。

落雨天，歹天時，勿會快活，來講一寡社會事，輕鬆一下。

早起看著一條新聞，講有一个姓陳的諸夫儂，成十年前刣死儂，走路走十外仔外年，即暫（chit-chām）佇廈門hông掠著。儂講「法網灰灰，疏而不漏」（hoat-bóng hoe-hoe, so· jî put lō·），任何儂犯法，到尾都嘛愛食罪，所謂「不是不報，時機未到」（put-sī put pò, sî-ki bī tò）。

儂講「種啥物因，著會得啥物果」，咱儂出世來活佇世上（sè-chiūⁿ），論真講，這是福氣，嘛是緣份。咱做任何代誌，攏著愛三思而後行，觀前顧後，毋通因為一時糊塗，骹步踏差，soah來造成永遠的痛苦。

代誌講是按呢啦。講即个姓陳的諸夫儂，14年前，in某定定去予kāng村的另外一个姓潘的痟豬哥強姦，前後強去幾若擺，猶佫一擺比一擺較惡質。即个諸夫儂忍（lún）到無法通佫忍，暗靜（àm-chīⁿ）下決心卜揣機會出手，好好來kā彼个痟豬哥教示一下。

姓陳的諸夫儂講，會記得彼是1997年上元暝，彼个姓潘的痟豬哥食酒過後，又佫紥著豬刀佮鐵鎚來in兜kāi亂。講彼暗大概半暝的時陣，一家伙當咧好睏，姓陳的諸夫儂眠眠soah聽著諸母儂佇外口咧哀，伊趕緊翻身peh起來，走出去外口一下看，夭壽啊，家己的諸母儂soah當（tng）予彼个猪哥拖去佇門後強姦！可惡！無想講對方chiah好大膽，三更半暝，侵門踏戶來做即號代誌！姓陳的諸夫儂真正氣一下當場險險腦衝血，規腹火做一下著（to̍h）起來！伊緊緊chhi̍h倚去卜拍對方。想勿會到對方原在無咧驚伊，賊較惡儂，反倒攆轉soah攑豬刀對著伊咧耀武揚威。兩儂khiú-khiú la̍k-la̍k，骹來手去，尾仔，姓潘的無細膩絆倒，姓陳的趁勢順手捎（sa）一鐵栱（thih-kóng）照著對方的頭殼下命bu̍t，bu̍t到對方斷氣chiah煞手。了後，尪仔某兩儂做伙kā屍體拖去tàn咧塘仔內。刣儂過後，姓陳的諸夫儂看破去走路。尾手，in某hông判共謀，判關監6年。有一个囝，本然考著北京大學，因為無錢通交學費，姑不而將，嘛來退學。

可憐代！一个好好的家庭，因為按呢生，soah舞到浪家散宅。

Tagged: 講天講地