【電影】

有消息講，台灣新電影《回家》（周渝民主腳），自底的編排，是三種語言（北仔話、日本話、閩南話）濫摻佇咧講。不而過，有儂講，若卜佇中國的電影院看，聽勿會著閩南話。啥物原因？in講閩南話是「方言」，勿會用得佇中國的電影院講即號話。我咧駛in老母…的牛車！東北話著毋是方言？四川話著毋是方言？北京話，又佫是啥物潲？

著啦，即齣戲，我是斷無去電影院看的道理啦！

【宿舍】

真衰！頂幾日，隔壁間搬一个「蟳看，蟳pū瀾；蝦看，蝦倒彈」，眾儂嫌、顧儂怨的老cha-po·來咧蹛。好死毋死，別位毋去蹛，chhoàn-chhoàn卜來蹛佇遮。死無儂哭，一暝食酒食到半暝，倒來則咧起酒痟；一透早天未光，著起來咧咳嗽（khe̍h-sàu）到強卜予鬼掠去的款。噪（chhò）儂耳，拍醒儂的眠！若佫舞落去，伊無痟，恁父會先痟去。

【廣播】

社頭的廣播，即幾日真正有夠拚！天未光，狗未吠，著開咧tân，liâm-mi唱薌劇，liâm-mi唱流行歌，三不時佫插一半聲仔現場的廣播聲。有夠亂的。問儂，講是社內toh一間廟佇咧鬧熱，看勢穩當是啥物王爺公抑是太子爺咧做生日。相連sòa舞幾若日ah，毋知卜舞到底時則會煞……唉，神咧暢，儂咧勿會快活。

【輕軌】

早起看新聞，講廈門五年內，卜建三條輕軌。順sòa佇遮做一个記錄。

一號線：號做南北線。起點佇島內舊市區中山路遐，終點佇島外集美的廈門火車北站。中央，有行過：中山路（起點）→桂花路→金榜→廈禾路→火車站→蓮坂（Lâu-poáⁿ）→嘉禾路→海堤→杏林→杏前路→杏錦路→集美新城→北站（終點）。

二號線：號做東西線。起點設佇鍾宅（Cheng-the̍h），終點佇海滄的馬青路北爿。中央行何厝（Oâ- -chhù）→呂嶺路→江頭（Kang- -thâu）→濱北→海滄（Hái-chhng）。

三號線：西南←→東北線。起點設佇廈大，行思明南路→鎮海→市府大道→七星路→仙岳山→湖里大道→枋湖（Png-ô·）北→翔安區的新店（Sin-tàiⁿ），終點是馬巷。

Tagged: 講天講地