【公交車頂】

頂禮拜六，公司開年會。拜五下晡著倒去。頭家講暗頓卜請一寡較早的下手食飯，叫我敽（kiau）伊做伙去。彼暗，燒酒食傷濟，規个儂茫茫，尾仔搭公交車倒去。真久無坐公交車ah，心適心適。無想講，公交車soah有閩南語報站的，呵呵。雖然報了柴硬柴硬，聽了無通真自然，總是，算做是好代誌。

隔轉日，去查新聞，講現此時kan-ta集美的公交車有閩南語報站niā，島內的敽島外別位的，拍算攏無（毋知是無按算，抑是猶未設）。

【祖家買地】

今年新正，轉去祖家過年。兩間破厝桶仔，序大儂講，見若（kiàn-nā）起風落雨，厝頂的iúⁿ仔啦、厝瓦角啦，直直落（lak）落來，雨漏雨滴，真煩惱tah一日無張弛，厝蓋lap落來，厝倒倒去死。兄弟姊妹，一句來一句去，毋好講，著趕緊來審計，看是卜偃偃落來重頭成（chhiâⁿ），抑是卜kan-na翻厝蓋著好。講叫我主意。

我厝前厝後斟酌看，即落厝，佮即片厝埕，因為近路墘，前有大厝身，後有大馬路，正手爿是巷路，倒手爿是港路，全全無一个好地理通講。尾仔，毋知啥儂鑿空（chha̍k-khang）講，無規氣社裡（ni̍h）kâng買厝地來起。講是講厝地，事實阮社里（siā-lí）早著無厝地ah。進前，儂卜起厝，較濟攏嘛自彼號耕保地圍圍thūn-thūn來起。

別儂會起得，咱嘛卜佮伊起，管潲伊！有樣看樣，無樣家己想。當今即號社會，古意，儂當汝是戇直。七探聽，八吩咐（hoan-hù），講社頭猶佫一桗（tè），按算卜賣。是講，咱卜kâng買，嘛著儂卜賣，著無？儂想講，咱都較有咧外口走跳，拍算咱敢（káⁿ）比儂較有，較好過- -儂，開喙，著喝講卜賣兩萬，佫講，是咱卜買，帶著（tòa-tio̍h）siâng社儂，siâng親堂的，則有賣咱較俗，亦若無，儂隔壁社，早早著來交定（ka-tiāⁿ）ah，講出價猶較懸- -著。講賣咱，伊是減趁；講彼是咱卜，硬撥，伊嘛著撥予咱。

話講到按呢ah，好啦，知影是汝咧做話啦，兩萬著兩萬，予汝去啦。無法度，是咱咧欠用，毋是儂咧欠用咱，該予儂趁的，嘛是著予伊去，無卜死予伊？敢（káⁿ）有講，目金金看彼落破厝桶仔，據在伊倒去？

話講倒轉來，娘仔喂，兩萬neh！會疼neh！

【掛證】

前年（chûn-nî / chûn- -nî），趁儂去考一本建設部的一級建造師證，舊年攏無去注冊。到kah年尾仔，注死有儂牽線，按算卜摕出去掛。想講，若掛出去，上無，一年冬嘛加減趁- -一兩萬箍仔，較贏袋（tē）佇lak袋仔咧袋燒的。代誌到即禮拜則講定。總是，當今錢佫猶未摕著。

【工作（kong-chok）】

舊年，工程做去八成有較加。賰的，講是講較無兩成的量，不而過，上歹賺食（choán-chia̍h）的，嘛是尾仔即兩成，卜做到會好勢，今年原在猶佫誠拚- -著。本然，舊年年中有來一个骹數（kha-siàu），儂看是泛泛搰力，泛泛靈。毋則想講，用心來共伊栽培，一來，通替咱分寡擔頭，二來，嘛是按算此去kiám-chhái有佫較要緊的代誌通交予伊。儂講，儂gâu，天咧做對頭！鬼會知影即箍死無儂，過一个年，soah共恁父踉蹽（làng-liâu），喝講毋來著毋來，害我枉費心機。菜瓜摃狗——雙頭了！了然，有影誠了然！做儂若卜無講信量（sìn-liōng），佮豬狗精牲有啥無共（kāng）？煞煞去啦……

【培訓】

接著通知，後- -日，卜來去培訓。即擺，毋是讀公家的，是讀家己的。無法度，評職稱，逼著ah，無讀嘛勿會用得。暢罔暢，飯碗嘛是著顧。先顧腹肚，則顧佛祖。

Tagged: 講天講地