高鐵公司 無講土話 百姓揬膦

台北車頭,常在(chhiāng-chāi)予儂怨嘆講是大迷宮,若卜佇遐揣儂,著若親像海底咧摸針。有民眾佇網頂咧哭父講,頂幾工仔去台北車頭接老大儂,毋過,煞任揣也揣無儂。一時,姑將無奈,來到高鐵服務站,按算卜請服務台開廣播共鬥揣。因為老大儂干單(kan-na)拄會曉講閩南語niā,ah毋過,高鐵的人員煞講高鐵廣播服務干單普通話佮英語niā,無法通提供閩南語的服務,予民眾聽了誠凊心、骹手冷吱吱。

濟濟網友,佇網頂看著即層消息了後,計計出聲責備高鐵公司傷驕頭、傷鴨霸。佇即塊土地徛起,食即塊土地的米,食即塊土地的水,趁即塊土地的錢,煞攏無咧顧、無咧為即塊土地的人民百姓,真正講勿會得過。

無偌久,高鐵即爿出來解說講,高鐵廣播服務會當提供普通話、英語、閩南語、客家話四種語言,全部的原因攏是因為當當時(tng-tang-sî)負責接待的員工,閩南語“勿會輾轉”,雖然是按呢,毋過,路尾嘛是趕緊共gâu講閩南語的同事揣來做廣播。

高鐵食認講是內部員工當場處理無妥帖,代誌發生了後已經共儂叫去批評教育。

ps. 龜怪咧,像即款服務性質的機構、場所,面對的服務對象,應該講大部分猶佫是在地儂嘛!哪會「無想著」講,著用在地話來做服務?退一步來講,汝卜用幾種外地語言做服務,彼是恁兜的代誌,彼是汝趁食的撇步,不而過,斷斷bē-sái講無在地語言!這已經毋是利便群眾的問題,講較歹聽的,這是無尊重在地儂,是咧蹧蹋即塊土地的尊嚴!古早儂講「食果子拜樹頭,食米飯拜鋤頭」、「食儂一斤,還儂四兩」,若像即款「食碗內、洗碗外」,毋捌通報恩的,彼真正通講是社會的悲哀,人民的失敗,去飼著一隻毋知通報恩的「無人情狗」,無彩米。

Tagged:

發表迴響

你的電子郵件位址並不會被公開。 必要欄位標記為 *

*