為啥物我佫卜講客家話

原作:劉鎮發
編譯:Limkianhui

舊年有一工,我佮阮朋友做伙咧食飯,臨當時(liâm-tong-sî)厝內有代誌,我撽電話轉去。從中有一位朋友,聽我咧講客家話(即位朋友是廣州儂,佇外國讀冊讀煞,當仔(tang-á)來香港徛無偌久,伊真佮意香港遮的環境佮生活),伊等甲我電話磕落去,現問我講「汝哪會猶佫咧講客家話啦」……

『汝哪會猶佫咧講客家話啦?』
『我是客家儂,講客家話哪有啥物毋著?』
『哎呀!遮香港嘛,全部攏廣東儂嘛,佇遮講別種話,聽著怪怪!』
『是啊,我嘛廣東儂,ah毋過,客家話嘛是廣東的一種話啊。』
『Ah毋過……客家話毋是標準的廣東話嘛,毋捌字的chiah會講即種話,卜我著勿會去講!』
『Ah無廣州話敢是標準的中文?是按怎汝逐工佫咧講?佫再講,汝是廣州儂,卜汰討(thài-thó)會曉講客家話咧?!』
『毋是哦,阮兜往早是惠州儂,照講我嘛是客家儂,ah毋過我著是無想卜學即種話!』
『是按怎?是嫌客話倯?嫌歹聽?抑是嫌無標準?』
『總講一句,少數服從多數嘛,香港是講廣東話的所在,無應該佇公共場所講彼號別儂聽勿會曉的話,按呢誠無禮貌。』
『Ah汝佇外國的時陣,敢有想卜顧面子,毋佇公共場所講中國話啦?哦,外國番仔著無面子啊毋?』
『這… …』
『佫再講啦,香港本然著是客家儂的所在,廣州儂是倒尾來的,客家儂佇香港講客家話攏是佇厝內底,勿會像中國儂去到外國猶佫咧講中國話遐呢仔無禮貌。毋相信汝會當去掀一下仔香港的歷史佮香港的地名。』

客家儂從宋朝著來香港

『毋過… … 這我無清楚… …』伊看別儂攏惦惦無講啥,尤其邊頭遐个香港朋友看起來敢若(kán-ná)嘛無啥意見,因為香港的廣州移民是三十年代過後chiah慢慢超過在地的客家儂。Ah若卜講客家儂佇香港的歷史,從宋朝著有囉。佇英國佔香港進前,廣州儂全全毋知影有香港,ah香港儂較佫毋知影廣州話(即陣講號做廣東話)是啥貨。

『而且,廣東省內嘛有幾落種無共款的方言,in攏是中國方言,攏毋是標準的漢話。廣東的漢話,廣東省嘛無才調講廣州話是廣東的標準,汝講客家話是無標準的廣東話嘛無理由、無根據,上無廣東省政府嘛毋敢按呢講。客家話是客家話,粵語是粵語,各儂有各儂的標準,這無輸若(ná)法語佮意大利語共款。汝總無講義大利語是無標準的法語?』

『冊汝是讀並我懸啦,ah毋過事實著是按呢,儂gâu天咧做對頭,我猶原認為客家話真正無必要佫傳湠(thn̂g-thoàⁿ)囉。』阮彼个朋友照原佫咧諍。

『啊好!香港是語言自由的所在,各儂有各儂的主張,我嘛無想卜為著即个問题逐个佇遮咧諍勿會煞。另日若有機會chiah佫討論一下。ah無,我先共我的觀點寫寫咧,先予汝看了後,咱chiah佫來探討,好無?』

講客家話是權利,嘛是責任

我是按怎卜佫講客家話,講起來有幾落个因由,從中上主要是為著尊嚴。士可殺不可辱!我是客家儂,這是事實。是客家儂,著有權利講客家話,嘛會使講是責任,卜來承擔家己的語言佮文化。這道理簡單甲:我是啥物儂,該當著去做啥物代誌,講啥物話。設使我出世是烏儂,我著愛搰力做hông看,hông知影講烏儂並無較戇儂,烏儂嘛真巧,嘛有信心來提懸烏儂的社會地位,留予儂好探聽;毋是想空想縫將家己的皮膚漂白,予儂認勿會出我是烏儂。既然我是客家儂,我著愛證明客家話嘛會當佮廣州話、閩南話遮个兄弟方言徛平大,共款嘛行會上台。廣州話、閩南話,甚至北京話會當做的,客家話嘛定著做會到。我堅決相信講,逐種語言在本攏平等,攏會當靠本身,攏無分好歹、懸下(koân-kē)。

卜怪,著怪客家儂傷荏爛(lám-nōa)

客家儂若予儂看會起,著愛勇敢來面對別的方言族群,展出客家儂的優點,提懸客家的形象。既然平平攏是香港的一份子,著愛將自己的形象展出來,mài予儂共咱體剔(thóe-thak)、共咱畫烏漆白。愛hông知影客家儂勤儉、拍拚、頭殼靈的本性,予in知影客家儂個性嘛真儼硬(giám-ngē)、真巴結。客家話是有智慧,有活力的語言。我無想卜講客家儂往過偌gâu拄偌gâu,講啥物勤王抗蒙軍、反清、革命……有的無的,我干單(kan-na)卜愛即陣的客家儂攑頭(giâ-thâu)勇敢面對現實,面對即个蓋殘忍的現實。粵、閩即兩種方言當咧搶佔客家儂的地頭,搶佔客家儂的心,總是,我無怪in,顛倒是客家儂家己彼種『無要無緊』的態度,激放放(khek hòng-hòng),放外外(pàng gōa-gōa)、據在儂變(pìⁿ)佮創。著是按呢,數十年中間,香港按客家庄變做「廣州城」,原底徛佇遮的客家儂,煞毋敢佮家己的囡仔序細講客家話(換講粵語),借問按呢汰討有儂看汝會起?儂活了無尊嚴,性命汰討有意義?所以我卜講客話,卜保全家己的尊嚴,無愛遐緊hông挾去配,準講全天骹下的客家儂攏無愛講、攏勿會曉講客話,我嘛照原卜保全我身軀頂的骨,硬共伊撐(keng)起來!因為放捒客語,彼著是咧卸客家儂的體面(thé-biān),是加(ke)予儂愛笑的niā!

真濟客家儂定定犯錯誤,想講客話毋知有偌漚屎(àu-sái),偌下路(kē-lō·),偌爛賤(nōa-choāⁿ)。自頭到尾,in犯著「循環論證」的錯誤。一種語言,設使只是佇一寡無蓋正式的場合chiah有儂咧講,ah若佇大學講壇、國會即款所在又佫換講別種語言,按呢前者的詞彙,定著愛比後者加較粗俗。現此時(hiān-chú-sî),既然kah無儂佫用客話咧讀書(tha̍k-chu)、講學(káng-o̍h),按呢客話就干單(kan-na)會當用佇日常生活即个階層,也莫怪(bo̍h-koài)客話會漚屎。偏偏遐个蹛佇城市的客家儂又佫毋愛講客話,客話全全賰庄骹儂規工講一寡關係鋤頭糞箕、飯籬鱟桸(pn̄g-lē hāu-hia)的代誌,按呢卜叫伊勿會倯chiah龜怪!咱愛知道講,語言是生活的一部份,是反映社會佮生活溝通(ko·-thong)的工具,若是干單(kan-na)卜共客話縛(pa̍k)蹛農村所在,限制佇無正式的場合,按呢客話就無法度行到各領域、各階層去,定著穩死無救,結尾只好綴(tòe)著華南城市化的骹步行入墓仔埔!這一切干單(kan-na)會當怪客家儂無遠見,無智識,予祖公的語言受儂蹧蹋(chau-that),予囝孫卸敗(sià-pāi)。相反,粵語入電台、電視,入大學講壇,廣州儂因為in的語言,有資格通好昌颺(chhiaⁿ-iāⁿ),通好hiau-pai,通好chhàng鬚。客家儂若佫無覺悟,佫毋來『改善』客話,改善客家儂的形象,是干單(kan-na)予儂笑衰的耳(niā)。

傷好禮,傷謙卑

客家儂對待儂,著是傷好禮,傷謙卑,毋chiah會來廣東800外年,去廣西、台灣300外年,猶佫直直將家己當做客,毋捌當家己是主儂,予儂軟塗深掘(nńg-thô· chhim-ku̍t)。著是按呢,客家儂無論佇厝內抑是佇外口,拄著勿會曉講客話的儂,攏嘛換講對方的語言來將就伊,予別儂感覺講客家實在無值得尊存。客家儂無共家己當做主儂,造成的後果,著是愈來愈濟廣州儂遷入香港了後,煞換in變做『在地儂』,客家儂成做『儂客』。客家儂將家己自早徛起的所在當做『借徛的』,佫教家己的囝孫去學講廣州話,將客話毀佇家己的手頭。咱佫來看廣州儂,in共香港五路四界的族群同化了後,近年來又佫搬徒(poaⁿ-sóa)去加拿大、澳洲,佇遐建唐儂街,起學校,辦電台、電視台。廣州話滿四界生根暴芛(puh-íⁿ)!客家儂若會曉學著廣州儂的一成,著有夠通予客語湠落去,偏偏客家儂的頭殼著是遐呢軟汫(nńg-chiáⁿ)、遐呢荏爛(lám-nōa),結尾行到hông淘汰的地步嘛是早著注定。

客家話排佇三十名內

現此在,世上(sè-chiūⁿ)的語言干單(kan-na)六千種斂斂(lím-lím),大概是頂世紀尾的一半濟,這著若親像濟濟動植物共款,有寡較弱勢的語言賰無幾个儂會曉講,目一nih隨無去啊。總是,若卜照人口數來算,客語猶原佫排佇頭三十名內,照講是勿會遐緊無去啦。只不過,每年放捒客話的儂,嘛是世界第一濟,這是客家儂勿會長志所致的。我堅持講客話,毋是卜反動,顛倒佮環保、保護文化的觀點叁合(saⁿ-ha̍p)。動植物khu̍t種,著勿會當佫生;語言無去,嘛勿會當佫來。若卜對得起後代囝孫,毋但(m̄-nā)愛保護環境,挽救強卜khu̍t種的動植物,嘛愛知影照顧弱勢語言,捷講弱勢語言,保全祖先留落來的文化寶藏。

我對客話的未來無蓋樂觀,因為大多數客家儂頭殼攏無夠開化。Chiàng時,有的儂猶佫規頭殼全中原思想,講家己是『借蹛』佇南方的中原儂,萬事攏放外外,佮儂無計較。佫有的,猶像三十年前按呢,想講家己的話是庄骹話,下路話,下命去學別儂的話,來展講伊有偌『颺』(iāng),翻頭佫來笑講客話的儂倯佫漚膿(àu-lông)。卜講,無幾个儂會知通提懸客話的地位,予客話通佮世界潮流行共步(kiâⁿ kāng-pō·)。嘛無幾个儂暸解講,若是放捒客話,毋但(m̄-nā)無法通佮祖先溝通,無面通見囝孫佮別的族群,佫較會使講是中華文化的罪儂,世界文明的戇儂。

我希望,共遐个無志氣、勿會寸進的客家儂篩(thai) tàn-sak了後,猶佫會當賰濟濟客家人口,來維持客家文化佮語言,ah我著是彼款永遠毋甘願hông『thai tàn-sak』的儂。

文章來源:客家月刊60期,作者是劉鎮發先生

Tagged:

Comments: 2

  1. Taokara 2010-01-04 at 23:17:18 Reply

    佇台灣有設客家委員會,一冬 ê 預算 10 外億台票,辦認證考試、辦研習、做文化活動、補助客語出版品,比起往過,客話 ê 形象 kap 地位應該有改善。

    顛倒是台灣話(台灣閩南語),無固定組織,無固定預算,萬項事愛民間家己想辦法來 kīng,有時仔真予人煩惱。

    Taokara 兄: 罕行。著啦,有影ku怪哩,聽汝按呢講起來,kán-ná佫比客儂佫較無覺悟。頂過,看新聞知影講有國民黨的儂出來擋,害死預算通bē過。是講,尾仔哪會自按呢準煞去啦?(by Lim)

  2. Taokara 2010-01-05 at 22:44:30 Reply

    林兄:

    尾–a 無 án-ne 準 suah,阮揣人去立法院 kap 教育部抗議,所以教育部有落軟,講 beh uì 特別預算撥寡錢來辦認證考試,由成功大學試題研發中心出面,kap 縣市政府合作,結果,教育部內底 m̄ 知是 m̄ 是 koh 有人出 àu 步,thiau-kang kā 錢 kha̍h tiâu–leh,害辦試務 ê 單位無 ta-uâ koh 延期,慢幾 ā 月日 tsiah 考試,總講 1 句,就是揣 khang 揣縫 beh hō͘ 你歹食睏–lah。

    Taⁿ khah 希望是 Holo ē-tàng 有親像原住民 kap 客家仝款,佇政府內底有 1 个獨立 ê 委員會,有獨立 ê 預算,按呢 khah 有資源 thang 投入語言復振,tse 講–來悲哀–lah,tsit-ê 案本 tsiâⁿ 是 ē 成,二冬前立法院連署 mā 過–a,結果是當初時執政 ê 民進黨官員反對,自按呢來擋恬,in ê 理由是:「驚引起族群 ê 緊張。」橫直民進黨內底,mā 是濟濟頭殼有問題 ê 人–lah!

    馬英九當初出來選舉,有提 1 項政見講 beh 創立閩南語影視製作中心、建立全閩南語 ê 電視台,做全世界閩南文化 ê 首都,結果–leh,就親像伊其他 ê 政見,講 hau-siâu–ê,逐張支票攏 pa̍t-á 票,了然–lah!

    Taokara 兄: Chiah-ê政客,看勢攏是走街仔仙,慣用 走街仔訣,騙食騙啉騙百姓騙選票ê niâ,儂講「生雞卵ê 無,放雞屎ê 有」,有影了然to̍h著。(by Lim)

發表迴響

你的電子郵件位址並不會被公開。 必要欄位標記為 *

*