2005年5月1號，中國國民黨主席連戰chhōa伊的某囝序细，來到西安清凉寺迄搭(hit-tah)培墓(pôe- bōng)，這是in 阿嬷的墓地。聽講，從(chêng)阿嬷过身了後，連家六十外年來無侬來过。連戰趁著即擺訪问大陸，专工來到西安，有一个真重要的原因，着是卜來拜墓。這 應该嘛是”毋去漳州，卜去西安”的主要原因。 假使讲，親情需要用语言來寄托，若安呢，即种语言定著是母语。時間经过一甲子較加，做囝孙的，頭一擺倒轉來拜祖，心肝頭迄种講bōe 出來的艰苦佮遺憾，干凋母语，干凋祖公传(thn̂g)落來的话，才有法度表达。

5月1號早起，连战chhōa伊的某囝，徛踮阿嬷墓庭(bōng-tiâⁿ)的面頭前，選擇用阿嬷教伊的閩南語，嚉阿嬷说出”序细内心的感恩”。伫即个离故乡千万里远、四界听無乡音的所在，虽然只是简单的三两句话，卻是深深來感动着随行的闽南记者。

连战对逐个讲起，阿嬷一世侬干凋会曉讲閩南話。

伫阿嬷的墓前，伫“祖德遗芳”的下骹，連戰用阿嬷聽有的鄉音來讲起：

“今 仔日，我chhōa牽手的，佮囡仔序细，来西安，来祭拜我的阿嬷，这是60外年头一擺，对我来讲，即个意义重大。60外年，实在会使讲是真久长的时间，不 而过因为过去，中国的即种情形，予阮chiah-ê 序细做bōe到，拢无法度來祭拜我的阿嬷。今仔日有即款的機會，真正足感动的，足感恩的，我想卜讲，阿嬷伫遮，咱做囝孫序细的，有责任好好仔來看顾即tè 阿嬷歇睏的所在，长期歇睏的所在。所以，今仔日，有遮呢仔濟的好朋友，來参加即个简单的祭拜仪式，我卜真心來感谢逐个，感谢。”

(注:即段話毋是連戰的原話，只不过意思共款爾。站長我無咧看电視，無聽著連先生的原话录音，我是按報纸頂面的華文直接翻做閩南文的.)

卜离開“阿嬷”的時，連戰表示講，此去，若有機會beh佫來。